ដោយ: គង់ លាងហួរ
អន្តរជាតិ: យោងតាមមជ្ឈមណ្ឌលស្រាវជ្រាវ Kasikorn (K-Research) បានឱ្យដឹងថា ការបិទរោងចក្រនៅក្នុងប្រទេស​ថៃអាច​នឹង​មានស្ថានភាព​កាន់តែធ្ងន់ធ្ងរនៅឆ្នាំ២០២៥នេះ ដោយសារ​តែការធ្លាក់ចុះនៃវិស័យផលិតកម្ម និងបញ្ហាប្រឈមផ្នែកសេដ្ឋកិច្ច។

មជ្ឈមណ្ឌល​​ Kasikorn បន្តថា ការបិទរោងចក្រកាលពីឆ្នាំ២០២៤ មានចំនួនជាង១០០រោងចក្រក្នុងមួយខែ​​។ ក្នុងនោះ ​ការបិទសហគ្រាសធុនតូច និងមធ្យម (SMEs) ​មាន​ចំនួនច្រើន​ជាង​គេ​ ដោយសារ​តែ​ការធ្លាក់ចុះនៃលំហូរមូលធន។

ជាមធ្យម បណ្តាក្រុមហ៊ុន ដែលបានបិទរោងចក្រនៅក្នុងប្រទេសថៃកាលពីឆ្នាំ២០២៤មានទំហំដើមទុនវិនិយោគតិចជាងរោងចក្រដែលបានបិទទ្វារនៅឆ្នាំ២០២៣ ចំនួន៣,៨ដង​។

គិតចាប់ពីឆ្នាំ២០២១ដល់ឆ្នាំ២០២២ គេបានសង្កេតឃើញមានការបិទរោងចក្រចំនួន៤.៨៥៥កន្លែង និងការបើករោងចក្រថ្មីចំនួន១.៨១៨កន្លែង។ តួលេខនេះ​បង្ហាញថា រោងចក្រប្រមាណ១២៧កន្លែងបាន​បិទទ្វារជាមធ្យមក្នុងមួយខែ។ ​​

ចាប់ពីឆ្នាំ២០២៣ ដល់ឆ្នាំ២០២៤ គេសង្កេតឃើញមានការបិទរោងចក្រចំនួន៤.៣០២កន្លែង និងការបើករោងចក្រថ្មីចំនួន៣.០៣៤កន្លែង។ តួលេខនេះ​បង្ហាញថា ជាមធ្យម មានរោងចក្រចំនួន៥៣កន្លែងបិទទ្វារក្នុងមួយខែ។

ស្ថាប័ន K-Research បានកត់សម្គាល់ថា រោងចក្រឧស្សាហកម្មគ្រឿងសង្ហារឹម គ្រឿងអេឡិចត្រូនិច កាត់ដេរ យានយន្ត និងដែកថែប បានបិទ​ទ្វារច្រើនជាងគេ។

កត្តាសំខាន់ៗ ដែលនាំឱ្យរោងចក្រទាំងនោះសម្រេចចិត្ដបិទទ្វារ រួមមាន​ ​​ការធ្លាក់ចុះនៃកំណើន​សេដ្ឋកិច្ច​ថៃ​​​​ និងតម្រូវការក្នុងស្រុក រួមទាំងបញ្ហា​រចនាសម្ព័ន្ធ​ក្នុង​វិស័យ​ផលិតកម្ម​ ដែល​ធ្វើឱ្យ​សមត្ថភាព​ប្រកួតប្រជែង​របស់​សហគ្រាស​ធុន​តូច និង​មធ្យម​ក្នុងស្រុក​
បន្តធ្លាក់ចុះ។

ទន្ទឹមនឹង​នោះ សង្គ្រាមពាណិជ្ជកម្មរវាងសហរដ្ឋអាមេរិកជាមួយប្រទេសចិន និងការប្រកួតប្រជែងកាន់តែខ្លាំង​​ឡើងទាំង​ក្នុង​ស្រុក និងទំនិញនាំចូលក៏បានជះផលប៉ះពាល់ដល់ការប្រកួតប្រជែងរបស់សហគ្រាសធុនតូច និងមធ្យមនៅក្នុងប្រទេសថៃផងដែរ៕ប្រភព: Bangkok Post៕

ដោយៈ គង់ សូរិយា

    ភ្នំពេញៈ  លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរស៊ីវិល បានបញ្ជាក់ជុំវិញព្រលានយន្តហោះអន្តរជាតិតេជោ ដែលជាប់ជាស្ថាបត្យកម្ម ដ៏មានឥទ្ធិពលរបស់ពិភពលោក ដែ​លផ្សព្វផ្សាយដោយCNN ដោយរចនាបទឡើងពីក្រុមហ៊ុន 𝐅𝐨𝐬𝐭𝐞𝐫 and 𝐏𝐚𝐫𝐭𝐧𝐞𝐫𝐬។

លើកឡើងក្នុងកម្មវិធីមួយ លោក ស៊ីន ចាន់សិរីវុត្ថា បានបញ្ជាក់ថា “កន្លងមកនេះពាក់ព័ន្ធទៅនឹងកិត្ដិនាម និងសក្ដានុពល នៃអាកាសយានដ្ឋានអន្ដរជាតិតេជោថ្មីនេះ យើងដឹងស្រាប់ហើយថា ថ្មីៗនេះគឺទូរទស្សន៍CNN បានផ្សព្វផ្សាយ និងលើកសរសើរ អំពីសមទ្ធិផលនៃការសាងសង់ អាកាសយានដ្ឋាននេះ”។លោកបន្ថែមថា “យើងដឹងហើយថា ស្ថាបត្យកម្មដែលរៀបចំរចនាបទឡើង ដោយក្រុមហ៊ុន 𝐅𝐨𝐬𝐭𝐞𝐫 and 𝐏𝐚𝐫𝐭𝐧𝐞𝐫𝐬 មិនមែនជាការចៃដន្យនោះទេ គឺមានការចូលរួមដេញថ្លៃ សម្រាប់ឌីហ្សាញអាកាសយានដ្ឋានថ្មីនេះ”។

លោកស៊ីន ចាន់សិរីវុត្ថា បានលើកឡើងថា 𝐅𝐨𝐬𝐭𝐞𝐫 and 𝐏𝐚𝐫𝐭𝐧𝐞𝐫𝐬 គឺជាក្រុមហ៊ុនលំដាប់ពិភពលោក ដែលក្រុមហ៊ុនភាគច្រើន តែងតែយកលំនាំតាមក្រុមហ៊ុននេះ នៅពេលដែលចេញគម្រោងនីមួយៗ។

នាពេលថ្មីៗនេះ ទូរទស្សន៍ដ៏ល្បីរបស់សហរដ្ឋអាមេរិក CNN បានចុះផ្សាយថា អាកាសយានដ្ឋាន​អន្តរជាតិតេជោ (Techo International Airport) នឹងក្លាយជាស្ថាបត្យកម្មដ៏មានឥទ្ធិពល លើពិភពលោក ឆ្នាំ២០២៥ ក្នុងចំណោមស្ថាបត្យកម្មចំនួន១១។

ព្រលានយន្តហោះអន្តរជាតិតេជោ គ្រោងនឹងបញ្ចប់ការសាងសង់ និងផ្ទេរនូវប្រតិបត្តិការពីព្រលានយន្តចាស់ ទៅព្រលានយន្តហោះថ្មី នៅក្នុងខែឧសភា ឆ្នាំ២០២៥ ហើយបើគ្មានអ្វីប្រែប្រួលទេនោះ អាកា​សយានដ្ឋានអន្តរជាតិតេជោ គ្រោងនឹងដាក់សម្ពោធជាផ្លូវការ នៅក្នុងអំឡុងខែកក្កដា ឆ្នាំ២០២៥៕

ដោយៈ សហការី

    ភ្នំពេញៈ សហស្ថាបនិក និងជាអគ្គនាយកគេហទំព័រpropertyarea.asia & Cambodiafinancialtimes.com​ លោកយិន លាងគង់ នៅថ្ងៃទី៧ ឆ្នាំ​២០២៥នេះ​ បានផ្ញើលិខិតគោរពជូនពរ​សម្តេចកិត្តិព្រឹទ្ធបណ្ឌិត​ប៊ុន​ រ៉ានី​ ហ៊ុនសែន​ ប្រធានកាកបាទក្រហ​មកម្ពុជា​ ក្នុងឱកាសខួបទី១១៤ ទិវាអន្តរជាតិនារី​៨ មីនា ឆ្នាំ២០២៥។

លោកយិន លាងគង់បានលើកឡើងថា ក្នុងឱកាសដ៏មហោឡារិក​ឧត្តុង្គឧត្តម ដែលនារីនៅក្នុងព្រះរាជាណាចក្រកម្ពុជា និងនៅទូទាំងសកលលោក ប្រារព្ធខួបទី១១៤ ទិវាអន្តរជាតិនារី ៨មីនា ឆ្នាំ២០២៥ ក្រោមប្រធានបទ “សិទ្ធិ សមភាព និងភាពអង់អាចចំពោះស្ត្រី និងក្មេងស្រីគ្រប់រូប” យើងខ្ញុំជាថ្នាក់ដឹកនាំ បុគ្គលិកទាំងអស់នៃគេហទំព័រទាំងពីរ សូមគោរពសម្តែងនូវសេចក្តី សោមនស្សរីករាយឥតឧបមា និងសូមគោរពជូននូវសព្ទសាធុការពរជ័យ បវរសួស្តី សិរីមង្គល វិបុលសុខ បវរមហាប្រសើរគ្រប់ប្រការជូន សម្ដេចកិត្តិព្រឹទ្ធបណ្ឌិតសូមមានសុខភាពល្អបរិបូរណ៍កម្លាំង កាយមាំមួន បញ្ញាញាណភ្លឺថ្លាវាងវៃ និងមានជន្មាទីឃាយុយឺនយូរ បន្តដឹកនាំកាកបាទក្រហមកម្ពុជា ក្នុងបុព្វហេតុមនុស្សធម៌នាំមុខគេនៅកម្ពុជា។

ក្នុងឱកាសដ៏វិសេសវិសាលនេះ យើងខ្ញុំទាំងអស់គ្នានៃគេហទំព័រpropertyarea.asia& Cambodiafinancilatimes.com សូមគោរពកោតស្ញប់ស្ញែង នូវគំរូវីរភាពដ៏ឧត្តុង្គឧត្តម និងសូមសម្តែងនូវកតញ្ញុតាធម៌យ៉ាងជ្រាលជ្រៅបំផុតចំពោះ សម្តេចកិត្តិព្រឹទ្ធបណ្ឌិតជានិមិត្តរូបនៃស្ត្រីគំរូដ៏ឆ្នើម មានឆន្ទៈមោះមុត មនសិការអង់អាចក្លាហាន ធ្វើមហាពលិកម្មយ៉ាងធំធេង ដើម្បីបុព្វហេតុជាតិ សាសនា ព្រះមហាក្សត្រ ជាពិសេសលើកកម្ពស់សិទ្ធិ និងការចូលរួមរបស់ស្ត្រី និងក្មេងស្រី ក្នុងវិស័យឌីជីថល ដែលមានការវិវឌ្ឍជាបន្តបន្ទាប់ ប្រកបដោយប្រសិទ្ធភាព និងសុវត្ថិភាព ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា និងក្របខណ្ឌគោលនយោបាយ ក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រីនិងក្មេងស្រី។

ក្នុងឱកាសដ៍ប្រពៃថ្លៃថ្លានេះ យើងខ្ញុំទាំងអស់គ្នាសូមលើកហត្ថប្រណម្យបួងសួង ដល់គុណបុណ្យព្រះរតនត្រ័យ តេជះបារមីនៃវត្ថុស័ក្ដិសិទ្ធិទាំងអស់ក្នុងលោក ទេវតាថែរក្សាទឹកដីនៃព្រះរាជាណាចក្រកម្ពុជា សូមជួយអភិបាលប្រោះព្រំគ្រងរក្សា សម្ដេចកិត្តិព្រឹទ្ធបណ្ឌិតប្រធាន និងសម្ដេចអគ្គមហា សេនាបតីតេជោហ៊ុន សែន ព្រមទាំងបុត្រា បុត្រី ចៅៗ ទាំងអស់ជាទីស្រឡាញ់ សូមបានប្រកបដោយព្រះពុទ្ធពរទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

ដោយ: គង់ លាងហួរ
អន្តរជាតិ: យោងតាមកាសែត South China Morning Post បានរាយការណ៍ថា ការលក់អចលនទ្រព្យនៅតំបន់រដ្ឋបាលពិសេសទីក្រុងហុងកុងនៃប្រទេសចិនបានដាំក្បាលចុះដល់កម្រិតទាបបំផុតមិនធ្លាប់មានក្នុងរយៈពេល៥ខែកាលពីខែកុម្ភៈ ឆ្នាំ២០២៥។

ការណ៍នេះជាសញ្ញាបង្ហាញឱ្យឃើញពីការប្រកាន់គោលជំហរយ៉ាងប្រុងប្រយ័ត្នក្នុងចំណោមបណ្តាអ្នកទិញផ្ទះ និងអ្នកវិនិយោគ ស្របពេលមានភាពតានតឹងកាន់តែខ្លាំងឡើងរវាងទីក្រុងវ៉ាស៊ីនតោន និងទីក្រុងប៉េកាំង។

កិច្ចព្រមព្រៀងនៃការលក់ផ្ទះ ការិយាល័យ ហាងលក់ទំនិញ ចំណតរថយន្ត និងអចលនទ្រព្យឧស្សាហកម្មនៅក្នុងខែកុម្ភៈ ឆ្នាំ២០២៥បានដាំក្បាលចុះប្រមាណ១៣ភាគរយមកនៅត្រឹមចំនួន៤.៣០៧កិច្ចព្រមព្រៀង បើធៀបនឹងខែមករាកន្លងទៅ។

ជាមួយគ្នានោះ ទំហំទឹកប្រាក់សរុប ដែលទទួលបានពីកិច្ចព្រមព្រៀងទាំងនេះបានដាំក្បាលចុះ២៣ភាគរយមកនៅត្រឹមចំនួន២៨,២៩ពាន់លានដុល្លារហុងកុង (ប្រហែល៣,៦៤ពាន់លានដុល្លារអាមេរិក)។

លោកស្រី Yeung Ming-yee អ្នកជំនាញជាន់ខ្ពស់របស់ទីភ្នាក់ងារអចលនទ្រព្យ Centaline បានអះអាងថា “ទិន្នន័យខាងលើបានឆ្លុះបញ្ចាំងពីភាពប្រុងប្រយ័ត្នរបស់អ្នកទិញ និងអ្នកវិនិយោគ ចាប់តាំងពីមុនពេលដែលលោក ដូណាល់ ត្រាំ ស្បថចូលកាន់តំណែងជាប្រធានាធិបតីសហរដ្ឋអាមេរិកជាផ្លូវការនៅក្នុងខែមករា”។

លោកស្រីបន្ថែមថា“ក្រៅពីកត្តាខាងលើ ប្រជាពលរដ្ឋហុងកុងជាច្រើនបានសម្រុកធ្វើដំណើរទៅក្រៅប្រទេសក្នុងឱកាសបុណ្យចូលឆ្នាំថ្មីប្រពៃណីចិន ហើយពួកគេបានពន្យារពេលក្នុងការទិញផ្ទះ”។

ក្រោយពីបានហក់ឡើងដល់កម្រិតខ្ពស់បំផុតក្នុងរយៈពេល៧ខែកាលពីខែវិច្ឆិកា ឆ្នាំមុនរួចមក ចំនួនកិច្ចព្រមព្រៀងលក់អចលនទ្រព្យនៅទីក្រុងហុងកុងបានដាំក្បាលចុះមកវិញអស់រយៈពេល៣ខែជាប់ៗគ្នា រាប់ចាប់តាំងពីខែធ្នូ ឆ្នាំមុន ដល់ខែកុម្ភៈ ឆ្នាំ២០២៥នេះ៕ប្រភព: SCMP៕

ដោយៈ សហសេវិក

ភ្នំពេញៈ លោកយិន លាងគង់ សហស្ថាបនិក និងជាអគ្គនាយកគេហទំព័រPropertyareea.asia & Cambodiafinancialtimes.com បានផ្ញើសារលិខិតជូនពរលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការនៃសមាគមកាយឬឫទ្ធិនារីកម្ពុជា និងជាអនុប្រធានសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) នៅក្នុងឱកាសប្រារព្ធខួបលើកទី ១១៤ ទិវាអន្តរជាតិនារី ៨មីនា ឆ្នាំ២០២៥ ក្រោមប្រធានបទ “សិទ្ធិ សមភាព និងភាពអង់អាច ចំពោះស្ត្រីនិងក្មេងស្រីគ្រប់រូប”។

នៅសារលិខិតជូនពររបស់លោកយិន លាងគង់បានបញ្ជាក់ “នៅក្នុងឱកាសដ៏មហាសិរីមង្គលាភិរម្យ ឧត្តុង្គឧត្តមប្រពៃថ្លៃថ្លាបំផុត ប្រកប​ដោយសេចក្តីសោមនស្សរីករាយ ឥតឧបមានៃការប្រារព្ធទិវាអន្តរជាតិនារី ៨មីនា ឆ្នាំ២០២៥ ក្រោមប្រធានបទ “សិទ្ធិ សមភាព និងភាពអង់អាច ចំពោះស្ត្រីនិងក្មេងស្រីគ្រប់រូប”តាងនាមថ្នាក់ដឹកនាំ និងបុគ្គលិកទាំងអស់ និងក្នុងនាមខ្ញុំផ្ទាល់ ខ្ញុំសូមសម្តែងនូវមនោសញ្ចេតនាយ៉ាងជ្រាលជ្រៅ ព្រមជាមួយអំណរសាទរយ៉ាងក្រៃលែង និងសូមប្រសិ​ទ្ធពរជ័យ សិរីមង្គល មហាប្រសើរជូនចំពោះ លោកជំទាវបណ្ឌិត សូមបានប្រកបដោយសុខភាពល្អបរិបូរណ៍ កាយពលមាំមួន បញ្ញាញាណភ្លឺថ្លា និងជន្មាយុយឺនយូរតរៀងទៅ”។

ឆ្លៀតក្នុងវរោកាសដ៏វិសេសវិសាលនេះ យើងខ្ញុំទាំងអស់គ្នាសូមសម្តែងនូវការគោរព និងកោតសរសើរ ដោយស្មោះអស់ពីដួងចិត្តជូនចំពោះគំរូវីរភាព ដ៏ឆ្នើមរបស់លោកជំទាវបណ្ឌិត ដែលខិតខំប្រឹងប្រែង លះបង់អស់ពីកម្លាំងកាយ កម្លាំងចិត្ត បញ្ញាស្មារតីដ៏ឈ្លាសវៃប្រកប​ដោយគតិបណ្ឌិតក្នុងការបំពេញបេសកកម្ម ជាប្រវត្តិសាស្ត្រលើវិស័យមនុស្សធម៌ ដោយពុំមានការរើសអើងពូជសាសន៍ សាសនា ពណ៌សម្បុរ និងនិន្នាការ នយោបាយឡើយ។

ជាងនេះទៅទៀតលោកជំទាវបណ្ឌិត ជាកុលស្ត្រីដ៏ឆ្នើមមួយរូប ជាឧត្តមភរិយាដ៏ប្រពៃថ្លៃថ្លា និងជាមាតាប្រកបដោយចរិយាធម៌ដ៏ប្រសើ​រក្រៃលែង មានស្នាដៃ និងគំនិតឈ្លាសវៃ ប៉ិនប្រសប់ ក្នុងការដឹកនាំ​សមាគមកាយឫទ្ធិនារីកម្ពុជា និងសមាគមគ្រូពេទ្យស្ម័គ្រចិត្តយុវជនសម្តេចតេជោ(TYDA) ដើម្បីបម្រើបុព្វហេតុជាតិមាតុភូមិ និងប្រជាជនកម្ពុជា ព្រមទាំងបានរួមចំណែកជាមួយរាជរដ្ឋាភិបាលក្នុងការងារ មនុស្សធម៌ ប្រកបដោយគុណធម៌និងសប្បុរសធម៌ ជួយដោះស្រាយទុក្ខលំបា​កជូនប្រជាពលរដ្ឋរងគ្រោះគ្រប់រូប គ្រប់ទីកន្លែងទូទាំងប្រទេស និងបានខិតខំលើកកម្ពស់សមភាពយេនឌ័រ សីលធម៌សង្គម គុណតម្លៃស្ត្រី និងតម្លៃ គ្រួសារ ដែលជាគំរូវីរភាពដ៏ប្រពៃសម្រាប់ស្ត្រីគ្រប់រូប។

ជាថ្មីម្តងទៀត យើងខ្ញុំទាំងអស់គ្នាសូមបួងសួង ដល់គុណបុណ្យព្រះរតនត្រ័យកែវទាំងបី វត្ថុស័ក្តិសិទ្ធិ ក្នុងលោក និងទេវតាថែរក្សាព្រះរាជាណាចក្រកម្ពុជា សូមជួយប្រោះព្រំសព្ទសាធុការពរ បវរសួស្តី ជ័យមង្គល វិបុលសុខ មហាប្រសើរគ្រប់ប្រការជូនចំពោះ លោកជំទាវបណ្ឌិត និងសម្តេចមហាបវរធិបតី ព្រមទាំងបុត្រាបុត្រីជាទីស្រឡាញ់ សូមបានប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕