ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនៅព្រឹកថ្ងៃពុធនេះ ក្រោយពេលតម្លៃមាសប្រភេទ Spot Gold បានជួញដូរក្នុងទំហំទឹកប្រាក់ចំនួន៣៣៥១,៩៧ដុល្លារអាមេរិកក្នុងមួយអោនគិតត្រឹមពេលបិទការជួញដូរកាលពីថ្ងៃអង្គារម្សិលមិញ។

តួយ៉ាង តម្លៃមាស Spot Gold បានងើបឡើង០,២៤ភាគរយដល់ត្រឹម៣៣៥៩,៨៩ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,៥ភាគរយដល់៣៣៦៧,១០ដុល្លារក្នុងមួយអោនគិតត្រឹមម៉ោង១០:៥២នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៩៧,៨ភាគរយ ដែលធនាគារកណ្តាលអាមេរិក (Fed) នឹងរក្សាទុកអត្រាការប្រាក់ឱ្យនៅថេរដដែលក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនានេះ។

ចំណែកឯ សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបជាមួយនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់៩៩,២៩ពិន្ទុនៅព្រឹកថ្ងៃពុធនេះ បន្ទាប់ពីបានបិទការជួញដូរត្រឹម៩៩,២៣ពិន្ទុកាលពីថ្ងៃអង្គារម្សិលមិញ៕

ដោយៈ និស្ស័យ

    ភ្នំពេញៈ ផ្លូវជាតិលេខ១១ ជាផ្លូវដ៏មានសក្កានុពលតភ្ជាប់ទំនាក់ទំនងរូបវ័ន្ត ស្ថាប័ន និងប្រជាជន រវាងខេត្តព្រៃវែង និងខេត្តត្បូងឃ្មុំ ជាមួយនឹងរាជធានី-ខេត្តផ្សេងៗដទៃទៀត។

យោងតាមក្រសួងសាធារណៈការ និងដឹកជញ្ជូនបានឲ្យដឹងថា ផ្លូវជាតិនេះ ជាផ្លូវមួយដែលជួយសម្រួលដល់ចរាចរណ៍ ការដឹកជញ្ជូនទំនិញ អ្នកដំណើរ និងទេសចរណ៍ ព្រមទាំងកសិផល និងដំណាំកសិឧស្សាហកម្មផ្សេងៗជាច្រើន របស់បងប្អូនប្រជាពលរដ្ឋ និងក្រុមហ៊ុនធុរកិច្ចនានាទៅកាន់ទីផ្សារក្នុងស្រុក និងទីផ្សារអន្តរជាតិ កាន់តែមានប្រសិទ្ធភាពខ្ពស់ ឆាប់រហ័ស និងចំណាយតិច។

លើសពីនេះទៅទៀត ផ្លូវនេះមិនត្រឹមតែជួយសម្រួលដល់ចរាច​រណ៍ប៉ុណ្ណោះនោះទេ ប៉ុន្តែថែមទាំងជួយបង្ការ ការពារ និងកាត់បន្ថយនូវគ្រោះទឹកជំនន់នាពេលអនាគតផងដែរ។

ផ្លូវជាតិលេខ១១ មានប្រវែងសរុប៩៦,៤៨គីឡូម៉ែត្រ ចាប់ពីអ្នកលឿង (ចំណុចប្រសព្វផ្លូវជាតិលេខ១) ស្រុកពាមរក៍ ខេត្តព្រៃវែង ទៅដល់ថ្នល់ទទឹង (ចំណុចប្រសព្វផ្លូវជាតិលេខ៧) ស្រុកត្បូងឃ្មុំ ខេត្តត្បូងឃ្មុំ។ ផ្លូវជាតិមួយខ្សែនេះ ត្រូវបានបើកការដ្ឋានសាងសង់នៅថ្ងៃទី១៩ ខែធ្នូ ឆ្នាំ២០១៧ និងសម្ពោធដាក់ឱ្យប្រើប្រាស់ជាផ្លូវការ កាលពីថ្ងៃទី៦ ខែធ្នូ ឆ្នាំ២០២១៕

ដោយៈ គង់ សូរិយា

    អាមេរិកៈ គិតត្រឹមពាក់កណ្តាលឆ្នាំនេះ សេដ្ឋកិច្ចអាមេរិកកំពុងជួបប្រទះ នឹងការធ្លាក់ចុះគួរឱ្យកត់សម្គាល់ ជាចម្បងដោយសារតែភាពតានតឹងពាណិជ្ជកម្មកើនឡើង និងគោលនយោបាយគាំពារនិយមដែលអនុវត្តដោយប្រធានាធិបតី Donald Trump ។

ទស្សនវិស័យសេដ្ឋកិច្ចរបស់សហរដ្ឋអាមេរិក

• កំណើនផលិតផលក្នុងស្រុកសរុប

យោងតាមអង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានកែសម្រួលការព្យាករណ៍របស់ខ្លួន សម្រាប់កំណើនGDP របស់សហរដ្ឋអាមេរិកនៅឆ្នាំ 2025 មកនៅត្រឹម 1.6% ដែលជាការធ្លាក់ចុះគួរឱ្យកត់សម្គាល់ពី 2.8% ក្នុងឆ្នាំ 2024។

ការធ្លាក់ចុះនេះ បណ្តាលមកពីការកើនឡើងពន្ធគយ និងលទ្ធផលនៃភាពមិនច្បាស់លាស់នៃពាណិជ្ជកម្ម។

• អតិផរណា

អតិផរណាត្រូវបានព្យាករថា នឹងកើនឡើងដល់ជិត4% នៅចុងឆ្នាំ 2025 ដែលជំរុញដោយតម្លៃនាំចូល កាន់តែខ្ពស់ដោយសារតែពន្ធកើនឡើង។

• គោលនយោបាយពាណិជ្ជកម្ម

អត្រាពន្ធជាមធ្យមរបស់សហរដ្ឋអាមេរិក បានកើនឡើងពី 2.5% ទៅជាង15% ដែលជាកម្រិតខ្ពស់បំផុត ចាប់តាំងពីសង្គ្រាមលោកលើកទីពីរ។ កញ្ចប់ពន្ធ 10% លើការនាំចូលទាំងអស់ រួមជាមួយនឹងពន្ធបន្ថែមលើប្រទេសជាក់លាក់ បានរំខានដល់សក្ដានុពលពាណិជ្ជកម្មពិភពលោក។

ប្រតិកម្មទីផ្សារ

• ទីផ្សារភាគហ៊ុន

ការប្រកាសអំពីពន្ធគយ នៅថ្ងៃទី២ ខែមេសា ឆ្នាំ២០២៥ បាននាំឱ្យមានការគាំងទីផ្សារ ភាគហ៊ុនយ៉ាងសំខាន់ ដោយសន្ទស្សន៍សំខាន់ៗដូចជា S&P 500 និងNasdaq Composite មានការធ្លាក់ចុះយ៉ាងខ្លាំង។

• ទំនុកចិត្តរបស់វិនិយោគិន

វិវាទពាណិជ្ជកម្មដែលកំពុងបន្ត និងភាពមិនច្បាស់លាស់នៃគោលនយោបាយបានបំផ្លាញអាជីវកម្ម និងទំនុកចិត្តរបស់អ្នកប្រើប្រាស់ ដែ​លនាំឱ្យមានការកាត់បន្ថយការវិនិយោគ និងការចំណាយ។

ផលប៉ះពាល់ជាសកល

• កំណើនសកលៈ អង្គការOECD ក៏បានបន្ទាបការព្យាករណ៍កំណើន GDP សកលមកត្រឹម 2.9% សម្រាប់ទាំងឆ្នាំ 2025 និងឆ្នាំ 2026 ដែលនេះជាល្បឿនខ្សោយបំផុត ចាប់តាំងពីជំងឺរាតត្បាត COVID-19។

ការ​ធ្លាក់​ចុះ​នេះ​បង្ហាញ​ឱ្យ​ឃើញ​ជា​ពិសេស ​នៅ​ក្នុង​ប្រទេស​ដែល​មាន​ទំនាក់​ទំនង​យ៉ាង​ជិត​ស្និទ្ធ ​នឹង​ពាណិជ្ជកម្ម​សហរដ្ឋ​អាមេរិក ​ដូច​ជា​កាណាដា ម៉ិកស៊ិក និង​ចិន។

• ទំនាក់ទំនងពាណិជ្ជកម្ម

ពន្ធសងសឹកពីប្រទេសនានាដូចជា ចិន កាណាដា និងម៉ិកស៊ិក បានធ្វើឱ្យទំនាក់ទំនងពាណិជ្ជកម្មអន្តរជាតិ កាន់តែតានតឹង ធ្វើឱ្យសេដ្ឋកិច្ចធ្លាក់ចុះកាន់តែធ្ងន់ធ្ងរ។

ការពិចារណាលើគោលនយោបាយ

• Federal Reserve: Federal Reserve ប្រឈមមុខនឹងបញ្ហាក្នុងតុល្យភាពការគ្រប់គ្រងអតិផរណា ជាមួយនឹងការគាំទ្រដល់កំណើនសេដ្ឋកិច្ច។ អត្រាអតិផរណាកើនឡើង អាចពន្យារពេលការកាត់បន្ថយអត្រាការប្រាក់ដែលមានសក្តានុពល។
• ការចំណាយរបស់រដ្ឋាភិបាល

ការកាត់បន្ថយការចំណាយរបស់រដ្ឋាភិបាល ដែលកំពុងបន្ត និងការបញ្ឈប់ការងារ ត្រូវបានគេរំពឹងថានឹងដកតម្លៃចេញ ពីកំណើនទាំងមូល ដោយមានការព្យាករណ៍បង្ហាញ ពីការបង្រួមនៃកំណើន GDP ក្នុងរយៈពេលប៉ុន្មានឆ្នាំខាងមុខនេះ៕

ដោយៈ គង់ សូរិយា

    ភ្នំពេញៈ ជាដំណឹងដ៏រីករាយមួយ ដែលបណ្តាញប្រព័ន្ឋផ្លូវទឹកកម្ពុជាកាន់តែមានភាពប្រទាក់ក្រឡា ដោយសម្តេចធិបតីហ៊ុន ម៉ាណែតកំពុងសហការជាមួយរដ្ឋាភិបាលកូរ៉េ ដើម្បីតភ្ជាប់បណ្តាញផ្លូវទឹកពីទន្លេមេគង្គញលើទៅកាន់ទន្លេសាប។

សម្តេចបានបញ្ជាក់នៅក្នុងអង្គសមាជព្រឹទ្ឋសភា រដ្ឋសភាកាលពីថ្ងៃទី៣ មិថុនាថា ការតភ្ជាប់នេះ ដើម្បីធ្វើឲ្យមានតុល្យភាពទឹក ព្រោះ​ខែប្រាំងគឺទឹកហូរពីទន្លេសាបចុះមកអស់ ហើយថ្ងៃមុខអាចមានលទ្ឋភាពតភ្ជាប់ពីបឹងទន្លេសាប ឆ្ពោះទៅកាន់តំបន់ជិតក្រុងប៉ោយប៉ែត ខេត្តបន្ទាយមានជ័យ ដើម្បីធនាកាដឹកជញ្ជូនរបស់យើង ព្រោះនៅពេលព្រែកជីកហ្វូណនតេជោធ្វើរួច ការដឹកជញ្ជូនតាមផ្លូវទឹកកាន់តែសំខាន់។

សម្តេចបញ្ជាក់ថា “ការសិក្សាលើជំហាននេះ គឺសិក្សាពីបញ្ហាបរិស្ថាន និងបញ្ហាបច្ចេកទេស ដោយធ្វើយ៉ាងណាតភ្ជាប់ពីទន្លេមេគង្គលើក្នុងខេត្តស្ទឹងត្រែង តភ្ជាប់ទៅកាន់ស្ទឹងសែន ដែលមានចម្ងាយប្រមាណ​៧០គីឡូម៉ែត្រ”។ សម្តេចបន្តថា “ការធ្វើបានបែបនេះ នឹងរក្សាតុល្យ​ភាពទឹកទន្លេសាប និងទន្លេមេគង្គ និងធានាប្រព័ន្ឋផ្លូវទឹកអាចប្រើប្រាស់បានទូទាំងប្រទេស”។

សម្តេចបញ្ជាក់ទៀតថា ការសិក្សានេះធ្វើឡើងដោយទីភ្នាក់ងារអភិវឌ្ឍន៍កូរ៉េ ដើម្បីកិច្ចសហប្រតិបត្តិការអន្តរជាតិ(KOICA)៕

ភ្នំពេញៈ ប្រធានសមាគមសហគ្រិនសារព៍័ត៌មានសេដ្ឋកិច្ចកម្ពុជា(CEMEA)លោកយិន លាងគង់ ថ្នាក់ដឹកនាំ និងសមាជិក សមាជិកាទាំងអស់ បានចេញមកប្រកាសគាំទ្រយ៉ាងពេញទំហឹង ចំពោះចំណាត់ការដ៏ម៉ឺងម៉ាត់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា ទាក់ទងនឹងដំណោះស្រាយបញ្ហាព្រំដែនរវាងប្រទេសកម្ពុជា និងថៃ ដោយប្រើប្រាស់យន្តការទ្វេភាគី ការប្ដឹងទៅកាន់តុលាការយុត្តិធម៌អន្ដរជាតិ (ICJ) និងយុទ្ធសាស្រ្តការពារខ្លួនក្នុងករណីចាំបាច់។

យើងខ្ញុំទាំងអស់គ្នា សូមគាំទ្រផងដែរនូវប្រសាសន៍ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ដែលគាំទ្រឲ្យរាជរដ្ឋាភិបាលប្រទេសទាំងពីរ នាំយកបញ្ហាព្រំដែនទៅដោះស្រាយនៅតុលាការអន្តរជាតិ ដោយមិនចាំបាច់ឲ្យកម្ពុជាប្តឹង។ នេះគឺជាចំណាត់ការប្រកបដោយភាពចាស់ទុំខាងនយោបាយ នៃអ្នកដឹកនាំកម្ពុជា ដោយបានគិតគូរវែងឆ្ងាយ និងរក្សានូវភាពអត់ធ្មត់ខ្ពស់។

យើងខ្ញុំសូមអំពាវនាវដល់ប្រជាពលរដ្ឋទាំងអស់ នៅទូទាំងប្រទេ​ស មេត្តារក្សាភាពស្ងៀមស្ងាត់ និងសូមបន្តជឿទុកចិត្តលើរាជរដ្ឋាភិបាល ក្នុងការការពារអធិបតេយ្យជាតិ បូរណភាពទឹកដី ដោយព្យាយាមឲ្យអស់លទ្ធភាព មិនរុញច្រានប្រទេសឲ្យធ្លាក់ ក្នុងជម្លោះប្រដាប់អាវុធ ឬសង្រ្គាម តាមពួកជ្រុលនិយម ដែលតែងតែបញ្ឆេះកំហឹងជាតិសាសន៍ និងអំពើហិង្សា។

“យើងត្រូវការពារទឹកដីរបស់យើង ដោយផ្អែកលើច្បាប់ និងការទទួលស្គាល់ជាអន្តរជាតិ ហើយយើងក៏នៅតែប្រកាន់ជំហរទន់ភ្លន់ ប៉ុន្តែមិនទន់ជ្រាយជាដាច់ខាត”៕