ចូលរួមក្នុង Chanel : Property Area Asia ដើម្បីទទួលបានព័ត៌មានយ៉ាងឆាប់រហ័ស

ព្រះសីហនុ៖ នាព្រឹកថ្ងៃចន្ទ ទី២៨ ខែមេសា ឆ្នាំ២០២៥ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា(ក.អ.ក.) តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីក្នុងពិធីបើកការដ្ឋានសាងសង់ រោងចក្រដំឡើងរថយន្តរបស់ក្រុមហ៊ុន ប៊ី វ៉ាយ ឌី ខេមបូឌា ឯ.ក (BYD CAMBODIA CO., LTD.) រួមជាមួយ ឯកឧត្តម Wang Wenbin ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិនប្រចាំនៅកម្ពុជា។ ពិធីនេះមានការចូលរួមពី ឯកឧត្តមអភិបាល នៃគណៈអភិបាលខេត្តព្រះសីហនុ, លោកអគ្គនាយកគ្រប់គ្រងផ្នែកលក់ប្រចាំតំបន់អាស៊ីប៉ាហ្វិក នៃក្រុមហ៊ុន BYD, ថ្នាក់ដឹកនាំក្រសួងសាធារណការ និងដឹកជញ្ជូន ក្រសួងរ៉ែ និងថាមពល ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ អគ្គនាយកដ្ឋានគយ និងរដ្ឋាករកម្ពុជា តំណាងក្រសួងស្ថាប័ន និងមន្ទីរពាក់ព័ន្ធពាក់ព័ន្ធ, ភ្ញៀវកិត្តិយសជាតិ អន្តរជាតិ ព្រមទាំងថ្នាក់ដឹកនាំ បុគ្គលិក កម្មករនិយោជិតរបស់ក្រុមហ៊ុន BYD Cambodia។

រោងចក្រដំឡើងរថយន្តរបស់ក្រុមហ៊ុន BYD Cambodia ដែលប្រារព្ធពិធីបើកការដ្ឋានសាងសង់នាព្រឹកនេះ ជាក្រុមហ៊ុនបុត្រសម្ព័ន្ធរបស់ក្រុមហ៊ុន BYD Auto Industry។ ក្រុមហ៊ុនគ្រោងនឹងបណ្ដាក់ទុនប្រមាណ ៣២លានដុល្លារអាម៉េរិក សម្រាប់ដំណាក់កាលទី១ លើការបង្កើតរោងចក្រផ្គុំដំឡើងយានយន្ត
ប្រភេទ CKD នៅលើផ្ទៃដីប្រមាណ ១២ហិកតា ក្នុងតំបន់សេដ្ឋកិច្ចពិសេសក្រុងព្រះសីហនុ សម្រាប់ដំឡើងរថយន្តអគ្គិសនីសុទ្ធ (EV) និងអគ្គិសនីលាយសាំង (PHEV) ជាមួយនឹងសមត្ថភាពដំឡើងរថយន្តប្រមាណ ១ម៉ឺនគ្រឿង ក្នុងមួយឆ្នាំៗ ទៅតាមដំណាក់កាល។ រោងចក្រដំឡើងរថយន្ត BYD Cambodia គ្រោងនឹងបញ្ចប់ការសាងសង់នៅខែតុលា និងចាប់ផ្តើមដំណើការផលិតកម្មដំឡើងរថយន្តអគ្គិសនីជាលើកដំបូងនៅកម្ពុជា នាដើមខែវិច្ឆិកា ឆ្នាំ២០២៥ ខាងមុខនេះ។

ថ្លែងក្នុងឱកាសនេះ ឯកឧត្តមឧបនាយករដ្ឋមន្ត្រី បានសម្តែងនូវការអបអរសាទរ និងវាយតម្លៃខ្ពស់ចំពោះក្រុមហ៊ុន BYD Cambodia សម្រាប់ការសម្រេចចិត្តក្នុងការបណ្តាក់ទុនវិនិយោគនៅកម្ពុជាលើវិស័យយានយន្តអគ្គិសនី បន្ទាប់ពីឯកឧត្តមបានដឹកនាំគណៈប្រតិភូ ក.អ.ក. ទៅគោះទ្វារវិនិយោគដោយផ្ទាល់ ដល់ទីស្នាក់ការកណ្តាលរបស់ក្រុមហ៊ុន BYD នៅទីក្រុងស៊ិនជិន សាធារណរដ្ឋប្រជាមានិតចិន កាលពីថ្ងៃទី២០ ខែតុលា ឆ្នាំ២០២៣ កន្លងទៅ។

ក្នុងសុន្ទរកថាប្រកាសបេីកការដ្ឋាននោះ ឯកឧត្តមឧបនាយករដ្ឋមន្ត្រី បានលើកឡើងអំពីការរួមចំណែកជួយដល់ការអភិវឌ្ឍសេដ្ឋកិច្ច និងសង្គមកម្ពុជា ពីសំណាក់រដ្ឋាភិបាលនិងប្រជាជនចិន តាមរយៈគំនិតផ្តួចផ្តើមខ្សែក្រវ៉ាត់ និងផ្លូវ (BRI) និងបានរំលេចអំពីលទ្ធផលជាផ្លែផ្កានៃទស្សនកិច្ចផ្លូវរដ្ឋរបស់ ឯកឧត្តម ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិន ដែលស្តែងឱ្យឃើញពីការរួមគ្នាពូនជ្រំថែរក្សា និងបន្តរឹតចំណងមិត្តភាពទំនាក់ទំនងការទូតកម្ពុជា-ចិន ឱ្យកាន់តែមានភាពល្អប្រសើរឡើង ក្នុងនាមជាដៃគូយុទ្ធសាស្ត្រគ្រប់ជ្រុងជ្រោយ និងជាមិត្តដែកថែប រួមទាំងសម្រេចឱ្យបាននូវការកសាងសហគមន៍វាសនារួមកម្ពុជា-ចិន ក្នុងយុគសម័យថ្មី។

ជាមួយគ្នានេះ ឯកឧត្តមឧបនាយករដ្ឋមន្ត្រី បានលើកឡើងពីការកើនឡើងនៃគម្រោងវិនិយោគ ក៏ដូចជាវត្តមានរបស់ក្រុមហ៊ុន BYD នៅកម្ពុជា ដែលបង្ហាញឱ្យឃើញពីការជឿទុកចិត្តរបស់វិនិយោគិនមកលើរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប៉ិនប្រសព្វរបស់ប្រមុខដឹកនាំគ្រប់ជំនាន់ រួមជាមួយនឹងការធ្វើបរមភាវូបនីយកម្មរបស់ ក.អ.ក. ដែលជាសេនាធិការរបស់រាជរដ្ឋាភិបាលលើការងារវិនិយោគ ដែលបាននិងកំពុងបន្តធ្វើឱ្យប្រសើរឡើងនូវបរិយាកាសធុរកិច្ច និងវិនិយោគ តាមរយៈការជំរុញផ្សព្វផ្សាយនូវច្បាប់ស្ដីពីវិនិយោគ ការគោះទ្វារវិនិយោគនៅក្រៅប្រទេស ព្រមទាំងការធ្វើសាមញ្ញកម្មនីតិវិធីពាក់ព័ន្ធនានា។

ឆ្លៀតក្នុងឱកាសនេះ ឯកឧត្តមឧបនាយករដ្ឋមន្ត្រី បានស្នើឱ្យក្រុមហ៊ុន ពិនិត្យលទ្ធភាពជំរុញឱ្យរោងចក្រដែលជាខ្សែច្រវាក់ផលិតកម្មរបស់ខ្លួនមកវិនិយោគនៅកម្ពុជាបន្ថែមទៀត។ ឯកឧត្តមឧបនាយករដ្ឋមន្ត្រី ក៏បានលើកទឹកចិត្តដល់វិនិយោគិនទាំងអស់ ឱ្យបន្តចូលរួមផ្សព្វផ្សាយបទពិសោធន៍ល្អៗអំពីបរិយាកាសវិនិយោគនៅកម្ពុជា ទៅកាន់វិនិយោគិនផ្សេងៗទៀតនៅក្នុងសហគមន៍ធុរកិច្ចរបស់ខ្លួន ដើម្បីទាក់ទាញការវិនិយោគបន្ថែមទៀតមកកម្ពុជា សំដៅបង្កើតការងារបន្ថែមជូនបងប្អូនប្រជាពលរដ្ឋ ក៏ដូចជាចូលរួមជំរុញកំណើនសេដ្ឋកិច្ចជាតិផងដែរ៕

ចូលរួមក្នុង Chanel : Property Area Asia ដើម្បីទទួលបានព័ត៌មានយ៉ាងឆាប់រហ័ស

ដោយ: គង់ លាងហួរ
អន្តរជាតិ: អតិថិជនរបស់ក្រុមហ៊ុនដឹកជញ្ជូនទំនិញតាមរយៈផ្លូវសមុទ្រ Hapag-Lloyd របស់ប្រទេសអាល្លឺម៉ង់ បានសម្រេចលុបចោលចំនួន៣០ភាគរយនូវការបញ្ជាទិញទំនិញពីប្រទេសចិនទៅកាន់សហរដ្ឋអាមេរិក ដោយសារជម្លោះពាណិជ្ជកម្មរវាងប្រទេសទាំងពីរ។

ផ្ទុយ​ទៅ​វិញ តម្រូវ​ការ​បញ្ជាទិញទំនិញ​មកពី​ប្រទេស​ថៃ កម្ពុជា និង​វៀតណាម មាន​ការ​កើន​ឡើង​យ៉ាង​គំហុក។នេះបើយោងតាមការឱ្យដឹងពីអ្នកនាំពាក្យក្រុមហ៊ុនដឹកជញ្ជូនទំនិញតាមរយៈផ្លូវសមុទ្រ Hapag-Lloyd ។

អ្នកនាំពាក្យរូបនោះបានគូសបញ្ជាក់ថា ក្នុងករណីមួយចំនួន ក្រុមហ៊ុន Hapag-Lloyd បាននិងកំពុងប្រើប្រាស់នាវាតូចៗសម្រាប់បើកបរនៅលើផ្លូវឆ្ពោះទៅកាន់សហរដ្ឋអាមេរិក ដោយរក្សាទុកចំនួននាវាឆ្លងកាត់ឱ្យនៅដដែល។

មូលនិធិរូបិយវត្ថុអន្តរជាតិ(IMF)បានព្រមានកាលពីពេលថ្មីៗនេះថា កំណើនសេដ្ឋកិច្ចសកលនឹងថយចុះនៅក្នុងរយៈពេលប៉ុន្មានខែខាងមុខ ដោយសារឥទ្ធិពលនៃការដំឡើងពន្ធដ៏ខ្ពស់របស់លោកប្រធានាធិបតីអាមេរិក ដូណាល់ ត្រាំ លើដៃគូពាណិជ្ជកម្ម។

យ៉ាងណាមិញ លោក ត្រាំ បានបង្ហាញពីសុទិដ្ឋិនិយមថា លោកនឹងជំរុញឱ្យមានវឌ្ឍនភាពនៃការចរចារកិច្ចព្រមព្រៀងជាមួយប្រទេសចិន ក្នុងគោលបំណងកាត់បន្ថយអត្រាពន្ធសងសឹកគ្នាទៅវិញទៅមកយ៉ាងច្រើនលើសលប់លើការដោះដូរទំនិញរវាងប្រទេសមហាអំណាចទាំង២។

បណ្តាប្រទេសមានសេដ្ឋកិច្ចកំពុងរីកចម្រើនត្រូវបានគេរំពឹងថា នឹងព្យាយាមរិះរកវិធីសាស្រ្តផ្សេងៗក្នុងគោលដៅដើម្បីកាត់បន្ថយផលប៉ះពាល់ពីពន្ធគយរបស់សហរដ្ឋអាមេរិក។ នេះបើយោងតាមលោកស្រី Lavanya Venkateswaran សេដ្ឋវិទូនៅធនាគារសិង្ហបុរី OCBC ។

លោកស្រីបានបន្តទៀតថា “ក្នុងរយៈពេលខ្លី អាជ្ញាធរ ឬរដ្ឋាភិបាលរបស់ប្រទេសនានាត្រូវដាក់ចេញនូវគោលនយោបាយសារពើពន្ធ និងរូបិយវត្ថុ ដើម្បីផ្តល់ការគាំទ្រដល់វិស័យ ដែលរងផលប៉ះពាល់។ សម្រាប់រយៈពេលមធ្យម អាជ្ញាធរត្រូវធ្វើពិពិធកម្មដៃគូពាណិជ្ជកម្ម និងការវិនិយោគ”៕ប្រភព: Reuters៕

ចូលរួមក្នុង Chanel : Property Area Asia ដើម្បីទទួលបានព័ត៌មានយ៉ាងឆាប់រហ័ស

ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះក្នុងការជួញដូរនាព្រឹកថ្ងៃច័ន្ទដើមសប្តាហ៍នេះ ខណៈភាពតានតឹងពាណិជ្ជកម្មរវាងសហរដ្ឋអាមេរិក និងប្រទេសចិនបានបង្ហាញសញ្ញានៃការថយចុះនាពេលថ្មីៗនេះ ដោយបានជះផលប៉ះពាល់ទៅលើតម្រូវការទ្រព្យសកម្មដ៏មានសុវត្ថិភាព ដូចជាមាស។

តួយ៉ាង តម្លៃមាស Spot Gold បានធ្លាក់ចុះ០,៧៤ភាគរយដល់៣២៩៣,៤៩ដុល្លារក្នុងមួយអោន។ ចំណែក តម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,១៩ភាគរយដល់៣៣០៤,៧០ដុល្លារក្នុងមួយអោនគិតត្រឹមម៉ោង១០:៥៣នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៥៧,៤ភាគរយ ដែលធនាគារកណ្តាលអាមេរិក (Fed) នឹងអាចទម្លាក់អត្រាការប្រាក់ចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹយងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងដល់ត្រឹម៩៩,៦៣ពិន្ទុនាព្រឹកថ្ងៃច័ន្ទនេះ បន្ទាប់ពីបានបិទការជួញដូរត្រឹម៩៩,៤៧ពិន្ទុកាលពីថ្ងៃសុក្រសប្តាហ៍មុន។

ចំណែក តម្លៃលោហៈធាតុប្រាក់ Spot silver បានធ្លាក់ចុះ០,៧៦ភាគរយដល់៣២,៧៦ដុល្លារក្នុងមួយអោន ខណៈតម្លៃផ្លាទីនបានងើបឡើង០,០១ភាគរយដល់៩៧៣ដុល្លារក្នុងមួយអោន ហើយតម្លៃ palladium បានងើបឡើង០,១៩ភាគរយដល់៩៣៨,៥ដុល្លារក្នុងមួយអោនគិតត្រឹមម៉ោង១០:៥៥នាទីព្រឹក៕

ចូលរួមក្នុង Chanel : Property Area Asia ដើម្បីទទួលបានព័ត៌មានយ៉ាងឆាប់រហ័ស

ដោយ: គង់ លាងហួរ
អន្តរជាតិ: ប្រទេសឥណ្ឌូនេសុីកំពុងសម្រុកសាងសង់គម្រោងទីក្រុង “Nuanu Creative City”ក្រោមទំហំទុនវិនិយោគចំនួន៧០លានដុល្លារអាមេរិកនៅលើកោះបាលី ដោយរួមមានអគារលំនៅដ្ឋាន និងអគារពាណិជ្ជកម្ម។នេះបើយោងតាមកាសែត Jakarta Globe។

កោះបាលីត្រូវបានគេទទួលស្គាល់ថា ជាគោលដៅទេសចរណ៍ដ៏ទាក់ទាញបំផុតមួយរបស់ពិភពលោក ដោយសារសម្រស់ធម្មជាតិ និងបេតិកភណ្ឌវប្បធម៌នៅលើកោះនេះ។ កោះបាលីបានទាក់ទាញភ្ញៀវទេសចរណ៍បរទេសចំនួនជាង៦,៣លាននាក់មកពីជុំវិញពិភពលោកកាលពីឆ្នាំ២០២៤ ដោយបានវ៉ាដាច់កម្រិតមុនការរាតត្បាតនៃជំងឺកូវីដ-១៩ និងកើនឡើង២០,១ភាគរយបើប្រៀបធៀបទៅនឹងឆ្នាំ២០២៣។

គម្រោងទីក្រុង “Nuanu Creative City”ស្ថិតនៅលើផ្ទៃដីទំហំ៤៤ហិកតាតាមបណ្តោយឆ្នេរសមុទ្រនៅក្នុងទីក្រុង Tabanan របស់កោះបាលីក៏បានប្រកាសបើកទ្វារចំហចំពោះបណ្តាវិនិយោគិនទាំងក្នុងស្រុក និងក្រៅប្រទេសផងដែរ។

តំបន់ទីក្រុង Nuanu Creative City ដែលរំពឹងថា នឹងក្លាយជាមជ្ឈមណ្ឌលសម្រាប់ការច្នៃប្រឌិត ឬនវានុវត្តន៍ សិល្បៈ និងការរស់នៅ កំពុងបន្តស្ថិតក្រោមការអភិវឌ្ឍន៍ និងគ្រោងបើកសម្ពោធដាក់ឱ្យដំណើរការជាផ្លូវការនៅខែសីហា ឆ្នាំ២០២៥នេះ។

គម្រោងទីក្រុងនេះបានចំណាយទុនវិនិយោគជាង៣០លានដុល្លារលើការងារហេដ្ឋារចនាសម្ព័ន្ធ ដូចជា ផ្លូវថ្នល់ អគ្គិសនី និងប្រព័ន្ធលូ។ បច្ចុប្បន្ន គម្រោងនេះកំពុងស្វែងរកបណ្តាអ្នកវិនិយោគ ដែលចាប់អារម្មណ៍ក្នុងការកសាងគម្រោងលំនៅដ្ឋាន និងអគារពាណិជ្ជកម្មនៅក្នុងទីក្រុងប្រកបដោយភាពច្នៃប្រឌិត។

លោក Lev Kroll នាយកប្រតិបត្តិរបស់គម្រោងទីក្រុង Nuanu Creative City បានអះអាងថា យើងនឹងបើកចំហដំណាក់កាលបន្ទាប់នៃការអភិវឌ្ឍន៍ទីក្រុង Nuanu ដល់បណ្តាវិនិយោគិនផ្សេងទៀតដើម្បីសហការគ្នា។

លោកបញ្ជាក់បន្ថែមថា គម្រោងនេះទទួលបានការចាប់អារម្មណ៍ និងការសាកសួរជាច្រើនពីបណ្តាអ្នកវិនិយោគមកពីបណ្តាប្រទេសចំនួន១២ ហើយយើងកំពុងធ្វើការរៀបចំកិច្ចព្រមព្រៀងនានាដើម្បីសហការគ្នា៕ប្រភព: Jakarta Globe៕

ចូលរួមក្នុង Chanel : Property Area Asia ដើម្បីទទួលបានព័ត៌មានយ៉ាងឆាប់រហ័ស

ដោយ: គង់ លាងហួរ
អន្តរជាតិ: បណ្តាក្រុមហ៊ុនមូលធនឯកជនជាច្រើនក្នុងតំបន់អាសុីបានសហការគ្នាក្នុងការបង្កើតសម្ព័ន្ធភាពមួយ ក្នុងគោលបំណងសម្របសម្រួលទុនវិនិយោគចំនួន៣៥ពាន់លានដុល្លារអាមេរិកចូលទៅកាន់ប្រទេសវៀតណាមក្នុងរយៈពេល១ទសវត្សរ៍ខាងមុខ។

សម្ព័ន្ធភាពត្រូវបានបង្កើតឡើងរវាងបណ្តាក្រុមហ៊ុនមូលធនឯកជននានា ដូចជាក្រុមហ៊ុន Golden Gate Ventures ក្រុមហ៊ុន Do Ventures និងក្រុមហ៊ុន Monk’s Hill Ventures ដោយដាក់ឈ្មោះសម្ព័ន្ធភាពនេះថា “ទីភ្នាក់ងារមូលធនឯកជនវៀតណាម”។

លោក Vinnie Lauria សមាជិកក្រុមប្រឹក្សាភិបាលរបស់ទីភ្នាក់ងារខាងលើបានមានប្រសាសន៍ឱ្យដឹងថា ការចងសម្ព័ន្ធភាពនេះមានគោលដៅដើម្បីជួយសម្រួលដល់ការវិនិយោគក្នុងវិស័យនានា រាប់ចាប់ពី វិស័យកសិកម្មដល់ការអប់រំ និងការថែទាំសុខភាព។

លោក Lauria ក្នុងនាមជាដៃគូស្ថាបនិកក្រុមហ៊ុន Golden Gate បានអះអាងថា “វៀតណាមជាទីផ្សារដ៏មានសក្តានុពល។ ការសម្រេចបង្កើតទីភ្នាក់ងារមូលធនឯកជនវៀតណាម ដោយសារយើងសង្កេតឃើញមានការវិវឌ្ឍន៍សំខាន់ៗក្នុងប្រទេសវៀតណាម រួមមានការដំឡើងប្រាក់ឈ្នួល កំណើនសេដ្ឋកិច្ច កំណើនលំហូរ FDI កំណើននៃការនាំចេញក្រោយវិបត្តិជំងឺកូវីដ-១៩ កម្មវិធីនវានុវត្តន៍ថ្មីរបស់រដ្ឋាភិបាលវៀតណាម និងការអភិវឌ្ឍន៍ហេដ្ឋារចនាសម្ព័ន្ធយ៉ាងឆាប់រហ័ស”។

បណ្តាអ្នកវិនិយោគជាច្រើនបានបង្ហាញក្តីសង្ឃឹមខ្ពស់ចំពោះសក្តានុពលរបស់ប្រទេសនេះ ស្របពេលភាពតានតឹងរវាងសហរដ្ឋអាមេរិក និងចិនកំពុងជំរុញឱ្យក្រុមហ៊ុនអន្តរជាតិធំៗផ្លាស់ប្តូរទីតាំងរោងចក្រ និងកំណត់គោលដៅទីផ្សារថ្មី។

ជាមួយគ្នានេះ សេដ្ឋកិច្ចឌីជីថលរបស់វៀតណាមត្រូវបានគេរំពឹងថា នឹងកើនឡើងលើសទំហំទឹកប្រាក់៩០ពាន់លានដុល្លារក្នុងឆ្នាំ២០៣០ បើធៀបនឹង ៣០ពាន់លានដុល្លារកាលពីឆ្នាំមុន។ នេះបើយោងតាមរបាយការណ៍រួមពីក្រុមហ៊ុន Google ក្រុមហ៊ុន Temasek Holdings និងក្រុមហ៊ុន Bain & Co។

និន្នាការនៃការចាប់ផ្តើមបើកអាជីវកម្មថ្មី ឬ Start-up របស់វៀតណាមបានផ្ទុះឡើងក្នុងរយៈពេលប៉ុន្មានឆ្នាំកន្លងមកនេះ ដោយសារការកើនឡើងនៃក្រុមហ៊ុនដូចជា ក្រុមហ៊ុនអភិវឌ្ឍន៍ហ្គេម VNG Corp។ ប៉ុន្តែ វិស័យបច្ចេកវិទ្យារបស់ប្រទេសនេះបានជួបបញ្ហាប្រឈមក្នុងការការស្រូបទាញដើមទុន ចាប់តាំងពីមានវិបត្តិសេដ្ឋកិច្ច ក្រោយផ្ទុះវិបត្តិជំងឺរាតត្បាតសកល។

យោងតាមរបាយការណ៍របស់ក្រុមហ៊ុន Google បានឱ្យដឹងថា កាលពីឆ្នាំ២០២១ ប្រទេសវៀតណាមបានទាក់ទាញទុនវិនិយោគពីទីផ្សារបច្ចេកវិទ្យា Start-up ចំនួន២,៦ពាន់លានដុល្លារតាមរយៈកិច្ចព្រមព្រៀងឯកជនចំនួន២៣៣ កើនឡើងពីចំនួន៧០០លានដុល្លារតាមរយៈការចុះកិច្ចព្រមព្រៀងចំនួន១៤០ ក្នុងឆ្នាំ២០២០៕ប្រភព: Bloomberg៕