ដោយ: គង់ លាងហួរ

អន្តរជាតិ: តម្លៃហាងឆេងមាសបានស្ថិតក្នុងសភាពទ្រឹងក្នុងការជួញដូរនាព្រឹកថ្ងៃព្រហស្បតិ៍នេះ ខណៈក្រុមអ្នកវិនិយោគមួយចំនួនបានលក់មាសចេញដើម្បីទទួលបានផលចំណេញ បន្ទាប់ពីតម្លៃមាសបានហក់ឡើងថ្លៃដល់៣.៣៤៣ដុល្លារក្នុងមួយអោនក្នុងការជួញដូរកាលពីថ្ងៃពុធម្សិលមិញ។

តួយ៉ាង តម្លៃមាស Spot Gold បានស្ថិតនៅទ្រឹងត្រឹមជាង៣.៣៤៣ដុល្លារក្នុងមួយអោន។ ប៉ុន្តែ តម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,២២ភាគរយដល់៣៣៥៣,៩០ដុល្លារក្នុងមួយអោនគិតត្រឹមម៉ោង១០:៥៦នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៥៩ភាគរយ ដែលធនាគារកណ្តាលអាមេរិក (Fed) នឹងអាចទម្លាក់អត្រាការប្រាក់ចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់ត្រឹម៩៩,៥៨ពិន្ទុនាព្រឹកថ្ងៃព្រហស្បតិ៍នេះ បន្ទាប់ពីបានបិទការជួញដូរត្រឹម៩៩,៣៨ពិន្ទុកាលពីថ្ងៃពុធម្សិលមិញ។

ចំណែក តម្លៃលោហៈធាតុប្រាក់ Spot silver បានធ្លាក់ចុះ១,៣ភាគរយដល់៣២,៥៥ដុល្លារក្នុងមួយអោន ខណៈតម្លៃផ្លាទីនបានធ្លាក់ចុះ០,៧៣ភាគរយដល់៩៧២,៩ដុល្លារក្នុងមួយអោន ហើយតម្លៃ palladium បានធ្លាក់ចុះ១,៦៤ភាគរយដល់៩៦៣,៥០ដុល្លារក្នុងមួយអោនគិតត្រឹមម៉ោង១០:៥៩នាទីព្រឹក៕

ដោយ: គង់ លាងហួរ

អន្តរជាតិ: យោងតាមទិន្នន័យបានបង្ហាញឱ្យដឹងថា តម្លៃផ្ទះថ្មីនៅប្រទេសចិនបានធ្លាក់ចុះក្នុងរយៈពេល២២ខែជាប់ៗគ្នាគិតត្រឹមខែមីនា ឆ្នាំ២០២៥។ប៉ុន្តែ អត្រានៃការធ្លាក់ចុះនេះបានបន្តរួមតូច ដោយសារការដាក់ចេញវិធានការគាំទ្ររបស់រដ្ឋាភិបាលចិន។

តម្លៃផ្ទះថ្មីនៅតាមទីក្រុងចំនួន៧០ របស់ប្រទេសចិន បានធ្លាក់ចុះក្នុងរង្វង់ជាមធ្យម០,១ភាគរយកាលពីខែមីនា បើធៀបនឹងខែកុម្ភៈ។ នេះបើយោងតាមទិន្នន័យ ដែលចេញផ្សាយដោយការិយាល័យស្ថិតិជាតិចិន (NBS)។

ប៉ុន្តែ បើធៀបនឹងខែមីនា ឆ្នាំ២០២៤ តម្លៃផ្ទះថ្មីនៅប្រទេសចិនបានធ្លាក់ចុះ៥ភាគរយនៅខែមីនា ឆ្នាំ២០២៥។ នេះជាសញ្ញាល្អប្រសើរឡើង បន្ទាប់ពីតម្លៃផ្ទះថ្មីបានធ្លាក់ចុះ៥,២ភាគរយនៅក្នុងខែកុម្ភៈ ឆ្នាំ២០២៥ ធៀបនឹងខែកុម្ភៈ ឆ្នាំមុន។

ជាមួយគ្នានេះ តម្លៃផ្ទះប្រភេទទី២ បានធ្លាក់ចុះ០,២ភាគរយក្នុងខែមីនា ឆ្នាំ២០២៥ ដោយរួមតូចពីការធ្លាក់ចុះ០,៣ភាគរយក្នុងខែកុម្ភៈ។ប្រសិនបើប្រៀបធៀបនឹងខែមីនា ឆ្នាំ២០២៤ តម្លៃផ្ទះប្រភេទទី២ នៅខែមីនា ឆ្នាំ២០២៥ បានធ្លាក់ចុះ៧,៣ភាគរយ បើធៀបនឹងការធ្លាក់ចុះ៧,៥ភាគរយកាលពីកុម្ភៈ។

ក្នុងចំណោមទីក្រុងទាំង៧០នោះ គេសង្កេតឃើញមានទីក្រុងចំនួន២៤ ដែលបានប្រកាសពីការកើនឡើងក្នុងអត្រាប្រចាំខែនៃតម្លៃផ្ទះថ្មីសម្រាប់ខែមីនា ខណៈកាលពីខែកុម្ភៈ គេសង្កេតឃើញមានទីក្រុងចំនួន១៨ប៉ុណ្ណោះ បានប្រកាសពីការកើនឡើងនៃតម្លៃផ្ទះថ្មី។ ចំណែក តម្លៃផ្ទះប្រភេទទី២ បានកើនឡើងក្នុងទីក្រុងចំនួន១០។

លោក Yan Yuejin អនុប្រធានវិទ្យាស្ថានស្រាវជ្រាវអចលនទ្រព្យ E-House China ដែលមានមូលដ្ឋាននៅទីក្រុងសៀងហៃ បានឱ្យដឹងថា “កំណើននៃចំនួនទីក្រុង ដែលប្រកាសពីការកើនឡើងនៃតម្លៃផ្ទះបានឆ្លុះបញ្ចាំងពីសភាពប្រសើរឡើងនៃទំនុកចិត្តនៅលើទីផ្សារ”។

លោកបានបន្ថែមថា “បរិយាកាសគោលនយោបាយអំណោយផលសម្រាប់ការទិញផ្ទះ និងសូចនាករតម្លៃផ្ទះវិជ្ជមាននឹងផ្តល់ការគាំទ្រកាន់តែខ្លាំងសម្រាប់ទីផ្សារអចលនទ្រព្យចិននៅក្នុងត្រីមាសទី២ ឆ្នាំ២០២៥” ៕ប្រភព: SCMP៕

ដោយៈ សហសេវិក

ម៉ាឡេស៊ីៈ ខណៈពេលធ្វើដំណើរទៅដល់ទីក្រុងគូឡាឡាំពួរ ដើម្បីបំពេញទស្សនកិច្ចផ្លូវរដ្ឋ នៅប្រទេសម៉ាឡេស៊ីនៅថ្ងៃទី១៥ ខែមេសា លោកXi Jinping ប្រធានរដ្ឋចិនបានចុះផ្សាយអត្ថបទនៅប្រព័ន្ធសារព័តមានម៉ាឡេស៊ីដូចជា កាសែតSin Chew Daily និងកាសែតThe Starជាដើមដែលមានចំណងជើងថា “ធ្វើឱ្យនាវាមិត្តភាពចិន-ម៉ាឡេស៊ី បើកទៅរកអនាគតកាន់តែល្អប្រសើរ”។

អត្ថបទនេះលើកឡើងថា ចិននិងម៉ាឡេស៊ីជាប្រទេសជិតខាងដ៏មេត្រីភាពដែលមានដែនសមុទ្រជាប់គ្នា។ ផ្លូវសូត្រតាមសមុទ្រគឺជាសាក្សី នៃការប្រាស្រ័យទាក់ទងដ៏មេត្រីភាព រវាងប្រទេសទាំងពីរដែលមានរយៈពេលពាន់ឆ្នាំ។ ចាប់តាំងពីបានបង្កើតទំនាក់ទំនង ការទូតមក ជានិច្ចកាល ប្រទេសចិន និងម៉ាឡេស៊ី តែងតែឈរលើមូលដ្ឋាននៃភាពជាម្ចាស់ការខាងយុទ្ធសាស្ត្រ គោរពផ្លូវអភិវឌ្ឍន៍របស់គ្នាទៅវិញទៅមក គាំទ្រគ្នាទៅវិញទៅមក លើបញ្ហាពាក់ព័ន្ធនឹងផលប្រយោជន៍ស្នូល និងកង្វល់សំខាន់ៗរៀងៗខ្លួន ដែលបានបង្កើតជាគំរូនៃការជួយគ្នាទៅវិញទៅមកនិងកិច្ចសហប្រតិបត្តិការឈ្នះ -ឈ្នះរវាងប្រទេសនិងប្រទេស។

អត្ថបទនេះបានសង្កត់ធ្ងន់ថា ប្រទេសចិននិងម៉ាឡេស៊ី គឺជាសហគមន៍រួមវាសនាមួយ ដែលរួមសុខរួមទុក្ខ និងមានភាពស្អិតល្មួតនឹងគ្នា។ ប្រទេសចិនមានឆន្ទៈ រួមសហការជាមួយម៉ាឡេស៊ី និងបណ្តាប្រទេសអាស៊ានដទៃទៀត ដើម្បីដើរស្របតាមចរន្តប្រវត្តិសាស្ត្រ អំពីសន្តិភាពនិងការអភិវឌ្ឍ។ ជម្នះចរន្តបញ្រ្ចាសនៃឯកតោភាគីនិយម និងគាំពារនិយម ជំរុញសហគមន៍រួមវាសនាចិន-ម៉ាឡេស៊ី ដែលប្រកបដោយយុទ្ធសាស្រ្តកម្រិតខ្ពស់ឱ្យឆ្ពោះទៅមុខ ក៏ដូចជាពួតដៃគ្នាកសាងសហគមន៍រួមវាសនាចិន-អាស៊ានដែលកាន់តែជិតស្និទ្ធផងដែរ៕

ដោយ: គង់ លាងហួរ
អន្តរជាតិ: ប្រជាជនឥណ្ឌូនេស៊ីលំដាប់អ្នកមានកំពុងសម្រុករក្សាទុកប្រាក់រាប់រយលានដុល្លារអាមេរិកនៅក្រៅប្រទេស ខណៈមានការព្រួយបារម្ភកាន់តែខ្លាំងឡើងលើគោលនយោបាយរបស់ប្រធានាធិបតីលោក Prabowo Subianto និងស្ថិរភាពសេដ្ឋកិច្ច។

ការទិញមាស រូបិយបណ្ណគ្រីបតូ និងអចលនទ្រព្យក្លាយជាជម្រើសដ៏ពេញនិយមរបស់ប្រជាជនឥណ្ឌូនេស៊ីលំដាប់អ្នកមាន។ ការទិញទ្រព្យសកម្មទាំងអស់នេះជាមធ្យោបាយដើម្បីរក្សាទុកទ្រព្យសម្បត្តិ។

បុគ្គលិកធនាគារឯកជនមួយរូបបានទម្លាយប្រាប់កាសែត Bloomberg ថា “អតិថិជនក្នុងស្រុកមួយចំនួនដែលមានទ្រព្យសម្បត្តិចន្លោះពី១០០លានដុល្លារអាមេរិកទៅ៤០០លានដុល្លារបានបំប្លែងទ្រព្យសកម្មចំនួន១០ភាគរយនៃទំហំទ្រព្យសកម្មសរុបរបស់ពួកគេទៅជាគ្រីបតូ។

ប្រភពដដែលបានគូសបញ្ជាក់ទៀតថា “ការផ្លាស់ប្តូរនេះបានចាប់ផ្តើមកើតមានឡើងនៅក្នុងខែតុលា ឆ្នាំ២០២៤ នៅពេលដែលលោក Prabowo ឡើងមកកាន់អំណាច។ ប៉ុន្តែ ការផ្លាស់ប្តូរត្រូវបានពន្លឿនយ៉ាងឆាប់រហ័ស បន្ទាប់ពីប្រាក់រូពៀបានដាំក្បាលចុះក្នុងខែមីនា ឆ្នាំនេះ”។

ការប្រកាសផែនការចំណាយថវិកាជាតិយ៉ាងច្រើនសន្ធឹកសន្ធាប់របស់រដ្ឋបាលលោក Prabowo បានបង្កការព្រួយបារម្ភដល់វិនិយោគិន ព្រោះផែនការនេះអាចបំពានវិន័យសារពើពន្ធ ដែលរដ្ឋាភិបាលឥណ្ឌូនេសុីក្នុងរយៈពេលប៉ុន្មានអាណត្តិកន្លងមកបានកំណត់។ ការណ៍នេះជះផលប៉ះពាល់ដល់ទាំងរូបិយបណ្ណ និងទីផ្សារភាគហ៊ុនរបស់ឥណ្ឌូនេសុី។

លោក Chan អតីតថ្នាក់់ដឹកនាំប្រតិបត្តិជាន់ខ្ពស់នៅក្រុមហ៊ុនធំមួយរបស់ឥណ្ឌូនេស៊ី ដែលបានស្នើសុំមិនប្រើឈ្មោះពេញបានអះអាងថា “ខ្ញុំបានបង្កើនការទិញគ្រីបតូប្រភេទ USDT ក្នុងរយៈពេលប៉ុន្មានខែថ្មីៗនេះ។ ការណ៍នេះអនុញ្ញាតឱ្យខ្ញុំអាចរក្សាតម្លៃទ្រព្យសកម្មរបស់ខ្ញុំ ហើយខ្ញុំនឹងបញ្ជូនទ្រព្យសកម្មឌីជីថលនេះទៅក្រៅប្រទេស ប្រសិនបើចាំបាច់ ដោយមិនចាំបាច់ស្ពាយប្រាក់ឆ្លងដែនឡើយ”។

លោកបន្តទៀតថា “ទស្សនវិស័យនៃសេដ្ឋកិច្ចរបស់ប្រទេសឥណ្ឌូនេស៊ី និងហានិភ័យចំពោះស្ថិរភាពនយោបាយក្នុងស្រុកពិតជាបានធ្វើឱ្យខ្ញុំមានការព្រួយបារម្ភជាខ្លាំង”៕ប្រភព: Bloomberg៕

ដោយ: គង់ លាងហួរ
អន្តរជាតិ: អ្នកជំនាញមួយរូបបានលើកឡើងថា និន្នាការសំខាន់ៗមួយចំនួនកំពុងលេចចេញឡើងក្នុងទីផ្សារការិយាល័យរបស់ប្រទេសហ្វីលីពីន ដោយបង្ហាញទាំងបញ្ហាប្រឈម និងឱកាសសម្រាប់អ្នកជួល និងម្ចាស់អគារ។

ក្រៅពីទីផ្សារនៅរដ្ឋធានីម៉ានីល ទីផ្សារការិយាល័យនៅទីក្រុងផ្សេងៗទៀត ដូចជាទីក្រុង Cebu និងទីក្រុង Pampanga នៅតែមានតម្រូវការជួលប្រកបទៅដោយចីរភាព ជាពិសេសការជួលដោយបណ្តាក្រុមហ៊ុនបច្ចេកវិទ្យា។

ចំណែក ទីផ្សារការិយាល័យដែលកំពុងរីកចម្រើនដូចជានៅទីក្រុង Davao សម្រេចបានការកើនឡើងនៃតម្រូវការ។និន្នាការទាំងនេះមានសភាពខុសផ្ទុយពីទីផ្សារនៅរដ្ឋធានីម៉ានីល ដែលជួបប្រទះអត្រាការិយាល័យទំនេរដ៏ខ្ពស់។

ដើម្បីទាញយកប្រយោជន៍ពីនិន្នាការនេះ អ្នកអភិវឌ្ឍន៍ត្រូវបានលើកទឹកចិត្តឱ្យធ្វើពិពិធកម្មការវិនិយោគទៅកាន់ទីក្រុង ដែលមានការផ្គត់ផ្គង់ការិយាល័យនៅមានកម្រិត។

ជាក់ស្តែង បណ្តាក្រុមហ៊ុនអភិវឌ្ឍន៍អចលនទ្រព្យធំៗ ដូចជា ក្រុមហ៊ុន Robinsons Land និងក្រុមហ៊ុន Megaworld បាននិងកំពុងបោះទុនវិនិយោគលើគម្រោងសំខាន់ៗនៅទីក្រុង Iloilo ទីក្រុង Bacolod និងទីក្រុង Davao ជាដើម។

ទន្ទឹមនឹងនេះ ការសាងសង់អគារការិយាល័យឱ្យមានគុណភាពខ្ពស់ជាកត្តាដ៏មានសារៈសំខាន់ក្នុងការធានាឱ្យមានកំណើនទីផ្សារការិយាល័យប្រកបដោយចីរភាព និងការទាក់ទាញអ្នកជួលរយៈពេលវែង។

ម្យា៉ងវិញទៀត លក្ខខណ្ឌសេដ្ឋកិច្ចសកលអាចជំរុញសន្ទុះទីផ្សារការិយាល័យរបស់ប្រទេសហ្វីលីពីនបន្ថែមទៀត។គោលនយោបាយពន្ធគយរបស់រដ្ឋបាលលោកប្រធានាធិបតីអាមេរិក ដូណាល់ ត្រាំ ត្រូវបានគេរំពឹងថា នឹងធ្វើឱ្យបណ្តាក្រុមហ៊ុនអាមេរិកមួយចំនួនបង្ខំចិត្តផ្លាស់ប្តូរមូលដ្ឋានផលិតកម្មទៅក្រៅប្រទេស។

និន្នាការនេះអាចជំរុញឱ្យមានការកើនឡើងនៃតម្រូវការជួលការិយាល័យនៅក្នុងប្រទេសហ្វីលីពីន ខណៈក្រុមហ៊ុននានាកំពុងស្វែងរកទីតាំងផលិតកម្ម ដែលចំណាយថ្លៃដើមទាប ហើយហ្វីលីពីនជាគោលដៅដ៏ទាក់ទាញមួយសម្រាប់ក្រុមហ៊ុនអាមេរិក៕ប្រភព: Business World៕

ដោយៈ គង់ ម៉ាណា

    ភ្នំពេញៈ ទៅផ្សារសណ្ឋាគារ ក្នុងវិស័យបដិសណ្ឋារកិច្ចកម្ពុជា បង្ហាញសញ្ញាសុទិដ្ឋិនិយម ដោយសារកំណើននៃការមកដល់របស់ភ្ញៀវទេសចរណ៍អន្តរជាតិ។

យោងតាមការសិក្សាថ្មីមួយ ដែលចេញផ្សាយដោយក្រុមហ៊ុនអន្តរជាតិCBRE Cambodiaបានបង្ហាញឲ្យដឹងក្នុងសប្តាហ៍នេះថា លំហូរភ្ញៀវទេសចរណ៍បរទេស ចូលមកកាន់ប្រទេសកម្ពុជា សម្រេចបានចំនួន១,២៦លាននាក់ ក្នុងរយៈពេល២ខែដំបូងនៃឆ្នាំ២០២៥នេះ ហក់ឡើង២៧,៩ភាគរយ បើធៀបនឹងរយៈពេល២ខែដំបូងដូចគ្នាកាលពីឆ្នាំមុន។

របាយការណ៍ដដែលបានបញ្ជាក់ថា ជាមួយនឹងការស្ទុះងើបឡើងវិញ នៃវិស័យទេសចរណ៍ សណ្ឋា​គារថ្មីចំនួនជាង៥០០បន្ទប់ ត្រូវបានចាក់បញ្ចូ​លទៅកាន់ទីផ្សារក្នុងត្រីមាសទី១ ឆ្នាំនេះ ខណៈការស្នាក់នៅបន្ទប់សណ្ឋាគារផ្កាយ៥ នៅរាជធានីភ្នំពេញមានតម្លៃជាមធ្យមចំនួន៣២៩ដុល្លារក្នុងមួយយប់។

“តម្រូវការសណ្ឋាគារត្រូវបានគេរំពឹងថានឹងកើនឡើង ខណៈព្រលានយន្តហោះអន្តរជាតិតេជោ គ្រោងនឹងបើកដំណើរការ នៅខែកក្កដាខាងមុខ រួមជាមួយនឹងគំនិតផ្តួចផ្តើមនានា រវាងរដ្ឋាភិបាលកម្ពុជាជាមួយវិស័យឯកជន ក្នុងការលើកកម្ពស់វិស័យទេសចរណ៍ នៅរាជធានីភ្នំពេញ”៕នេះបើយោងតាមរបាយការណ៍ដដែល៕

ដោយ: គង់ លាងហួរ
អន្តរជាតិ: បណ្តាក្រុមហ៊ុនអាមេរិកជាច្រើនបានសម្រុកធ្វើការបញ្ជាទិញទំនិញពីបរទេសដើម្បីពន្លឿនការនាំចូល បន្ទាប់ពីប្រធានាធិបតីអាមេរិកលោក ដូណាល់ ត្រាំ បានសម្រេចពន្យារពេលចំនួន៩០ថ្ងៃលើការដំឡើងពន្ធខ្ពស់ចំពោះទំនិញនាំចូលមកពីជុំវិញពិភពលោក លើកលែងតែទំនិញមកពីប្រទេសចិន។

លោកស្រី Lee Mayer នាយិកាប្រតិបត្តិ និងជាស្ថាបនិកក្រុមហ៊ុនរចនាតុបតែងគ្រឿងសង្ហារិមនៅក្នុងផ្ទះ Havenly Brands ដែលមានមូលដ្ឋាននៅទីក្រុង Denver បានអះអាងថា “ក្រុមហ៊ុនរបស់លោកស្រីកំពុងបញ្ជាទិញគ្រឿងសង្ហារិមពីរោងចក្រនៅប្រទេសកម្ពុជា និងប្រទេសវៀតណាម”។

នាពេលបច្ចុប្បន្ន ក្រុមហ៊ុនអាមេរិក Havenly Brands បាននាំចូលគ្រឿងសង្ហារិមកាន់តែច្រើនមកពីប្រទេសវៀតណាម និងកម្ពុជា ខណៈក្រុមហ៊ុននេះកំពុងកាត់បន្ថយការពឹងផ្អែកលើការនាំចូលគ្រឿងសង្ហារិមមកពីប្រទេសចិន។

ជាមួយគ្នានេះ ក្រុមហ៊ុន Amazon ត្រូវបានគេរាយការណ៍ថា បានលុបចោលការបញ្ជាទិញផលិតផលមួយចំនួនមកពីប្រទេសចិន។ បណ្តាក្រុមហ៊ុនលក់រាយ ដូចជាក្រុមហ៊ុន Walmart និងក្រុមហ៊ុន Target បានព្យាករណ៍ថា ការបញ្ជាទិញទំនិញរបស់ពួកគេនឹងធ្លាក់ចុះយ៉ាងគំហុកនៅក្នុងឆមាសទី២ ឆ្នាំ២០២៥។

លោកស្រី Lee Mayer បានលើកឡើងបន្តទៀតថា “នេះជាស្ថានភាពដ៏លំបាកមួយនៅក្នុងការធ្វើប្រតិបត្តិការ ពីព្រោះយើងមិនអាចដឹងច្បាស់អំពីអ្វី ដែលនឹងកើតឡើង ឬមិនកើតឡើងនាពេលអនាគតនោះទេ”។

បណ្តាក្រុមហ៊ុនលក់រាយដូចជា ក្រុមហ៊ុន Nike និងក្រុមហ៊ុន Best Buy អាចប្រឈមមុខនឹងផលវិបាកខ្លាំងជាងគេពីសង្រ្គាមពាណិជ្ជកម្មរបស់លោក ត្រាំ ដោយសារក្រុមហ៊ុនទាំងនេះពឹងផ្អែកលើមជ្ឈមណ្ឌលផលិតកម្មសំខាន់ៗរួមមានប្រទេសចិន វៀតណាម និងឥណ្ឌូនេស៊ី។

លោកស្រីបានបន្ថែមថា “ប្រសិនបើការអនុវត្តន៍ពន្ធត្រូវបានពន្យារពេលត្រឹមតែ៩០ថ្ងៃ នោះយើងត្រូវពន្លឿនការបញ្ជាទិញទំនិញចូលមកកាន់សហរដ្ឋអាមេរិក មុនពេលការពន្យារពេលផុតកាលកំណត់។ ប៉ុន្តែ ការនាំចូលរបស់យើងមកពីចិននៅតែបន្តផ្អាកទាំងស្រុង”៕ប្រភព: US News & World Report៕

ដោយ: គង់ លាងហួរ
អន្តរជាតិ: យោងតាមកាសែត Financial Times បានចុះផ្សាយថា ការធ្លាក់ចុះនៃតម្លៃប្រេងឆៅកំពុងដាក់បន្ថែមសម្ពាធផ្នែកហិរញ្ញវត្ថុទៅលើគម្រោងវិនិយោគធំៗរបស់រដ្ឋាភិបាលអារ៉ាប៊ីសាអូឌីតក្រោមចក្ខុវិស័យប្រកបដោយមហិច្ឆិតាឆ្នាំ២០៣០។

ក្រុមសេដ្ឋវិទូបានអះអាងឱ្យដឹងថា រាជរដ្ឋាភិបាលអារ៉ាប៊ីសាអូឌីតអាចនឹងត្រូវរៀបចំផែនការថ្មីដើម្បីកាត់បន្ថយការចំណាយថវិកាជាតិប្រចាំឆ្នាំ២០២៥ ឱ្យបានលើសពីអត្រា៣,៧ភាគរយ ដែលកំណត់ក្រោមផែនការដំបូង ព្រោះតម្លៃប្រេងឆៅបានបន្តធ្លាក់ចុះមកនៅត្រឹមជាង៦០ដុល្លារប៉ុណ្ណោះក្នុងមួយបារ៉ែល។

តម្លៃនេះទាបជាងកម្រិត ដែលអាចជួយរក្សាតុល្យភាពថវិកាជាតិរបស់ប្រទេសអារ៉ាប៊ីសាអូឌីត ដែលជាប្រទេសពឹងផ្អែកខ្លាំងលើប្រាក់ចំណូលពីការលក់ប្រេងឆៅទៅកាន់ទីផ្សារពិភពលោក។

ផែនការកាត់បន្ថយការចំណាយថវិកាជាតិកើតឡើង ស្របពេលដែលអារ៉ាប៊ីសាអូឌីតបន្តជម្នះសាងសង់គម្រោងតម្លៃរាប់រយពាន់លានដុល្លារ រួមមានដូចជាគម្រោងទីក្រុង Neom ដែលជាផ្នែកមួយនៃផែនការរបស់អារ៉ាប៊ីសាអូឌីត ក្នុងការធ្វើពិពិធកម្មសេដ្ឋកិច្ច។

លោកស្រី Monica Malik ប្រធានសេដ្ឋវិទូរបស់ធនាគារ Abu Dhabi Commercial Bank បានលើកឡើងថា “ការបន្តធ្លាក់ចុះយ៉ាងគំហុក និងជានិរន្តរនៃតម្លៃប្រេងឆៅអាចនឹងតម្រូវឱ្យរដ្ឋាភិបាលសម្រេចកាត់បន្ថយការចំណាយកាន់តែធំ ដើម្បីកាត់បន្ថយឱនភាព និងទប់ស្កាត់បំណុលរបស់រដ្ឋាភិបាលមិនឱ្យប៉ោង”។

គម្រោងខ្នាតយក្សមួយចំនួនក្រោមផែនការចក្ខុវិស័យឆ្នាំ២០៣០ ដែលបានកំណត់ដាក់ចេញក្នុងឆ្នាំ២០១៦ ដូចជារមណីយដ្ឋាននៅសមុទ្រក្រហម បានចាប់ផ្តើមដាក់ឱ្យដំណើរការហើយ។

ប៉ុន្តែ គម្រោងធំៗជាច្រើនទៀត ដែលកំពុងស្ថិតក្រោមការដ្ឋានសាងសង់ ដូចជាគម្រោងអភិវឌ្ឍន៍ទីក្រុងវាលខ្សាច់នាពេលអនាគត Neom បានប្រឈមមុខនឹងការកាត់បន្ថយទំហំ និងការពន្យារពេលសាងសង់។

គម្រោងទាំងនេះទទួលបានទុនវិនិយោគពីមូលនិធិវិនិយោគសាធារណៈ(PIF)របស់ប្រទេសអារ៉ាប៊ីសាអូឌីត ដែលពឹងផ្អែកលើប្រភពប្រាក់ចំណូលពីការលក់ប្រេងឆៅដើម្បីចាក់បញ្ចូលទៅក្នុងមូលនិធិ៕ប្រភព: Financial Times៕