ដោយ: គង់ លាងហួរ
អន្តរជាតិ: នៅថ្ងៃទី២ ខែមេសា ឆ្នាំ២០២៥ ប្រធានាធិបតីអាមេរិក លោក ដូណាល់ ត្រាំ បានប្រកាសអំពីការដំឡើងពន្ធជាបន្តបន្ទាប់ សំដៅលើបណ្តាប្រទេសអាស៊ានមួយចំនួន ព្រមទាំងដៃគូពាណិជ្ជកម្មសំខាន់ៗក្នុងតំបន់។

រដ្ឋបាលលោក ត្រាំ បានសម្រេចដាក់ពន្ធចំនួន៤៩ភាគរយលើការនាំចូលទំនិញមកពីកម្ពុជា ខណៈការនាំចូលទំនិញពីប្រទេសវៀតណាមត្រូវជាប់ពន្ធ៤៦ភាគរយ។

ជាមួយគ្នានេះ ការនាំចូលទំនិញពីប្រទេសថៃទៅកាន់សហរដ្ឋអាមេរិកត្រូវបង់ពន្ធ៣៦ភាគរយ ខណៈការនាំចូលទំនិញពីឥណ្ឌូណេស៊ីត្រូវជាប់ពន្ធ៣២ភាគរយ។ រីឯការនាំចូលទំនិញមកពីប្រទេសម៉ាឡេស៊ីត្រូវបង់ពន្ធ២៤ភាគរយ។

របាំងពន្ធគយទាំងនេះនឹងជះផលប៉ះពាល់ខ្លាំងលើសេដ្ឋកិច្ចអាស៊ាន ជាពិសេសបណ្តាប្រទេសដែលពឹងផ្អែកលើការនាំចេញទៅកាន់សហរដ្ឋអាមេរិក។ប៉ុន្តែ បើទោះបីជាមានបញ្ហាប្រឈមផ្នែកសេដ្ឋកិច្ចយ៉ាងណាក្តី ក៏វានឹងមិនដល់ថ្នាក់នាំឱ្យអាស៊ានដួលរលំឡើយ។

ផ្ទុយទៅវិញ ក្តីបារម្ភពិតប្រាកដស្ថិតនៅត្រង់ថា ការដំឡើងពន្ធអាចជះផលប៉ះពាល់ដល់សាមគ្គីភាពរបស់អាស៊ាន និងបង្កើតសម្ពាធអត្រាអតិផរណា។

សេដ្ឋកិច្ចអាស៊ាន​ធ្លាប់បាន​ទទួលរង​នូវ​ផលប៉ះពាល់​ពី​កត្តាខាងក្រៅ​ជាច្រើនលើករួចមកហើយ រាប់ចាប់ពី​ វិបត្តិ​ហិរញ្ញវត្ថុ​អាស៊ី​ឆ្នាំ១៩៩៧ រហូតដល់​សង្រ្គាម​ពាណិជ្ជកម្ម​រវាង​សហរដ្ឋអាមេរិក និង​ចិន។ យ៉ាងណាមិញ ក្របខណ្ឌស្ថាប័នរបស់អាស៊ាន ដូចជាសហគមន៍សេដ្ឋកិច្ចអាស៊ាន (AEC) ជួយរក្សាភាពធន់ក្នុងតំបន់។

ទោះជាយ៉ាងណា សាមគ្គីភាពរបស់អាស៊ានអាចនឹងត្រូវបានតេស្តសាកល្បង ខណៈបណ្តាប្រទេសសមាជិកអាស៊ាន ដែលទទួលរងការដំឡើងពន្ធខ្ពស់ពីសហរដ្ឋអាមេរិក ដូចជាកម្ពុជា និងវៀតណាមអាចនឹងស្វែងរកការចរចាដាច់ដោយឡែកជាមួយសហរដ្ឋអាមេរិក។

ផលប៉ះពាល់នៃគោលនយោបាយពន្ធគយរបស់លោក ត្រាំ នឹងធ្វើឱ្យអត្រាអតិផរណាទាំងនៅសហរដ្ឋអាមេរិក និងនៅទូទាំងពិភពលោកកើនឡើង។ នៅពេលតម្លៃនាំចូលកើនឡើង នោះតម្លៃទំនិញ ដែលលក់ទៅឱ្យអ្នកប្រើប្រាស់ ក៏នឹងកើនឡើងផងដែរ។

លោកស្រី Deborah Elms នាយិកាប្រតិបត្តិនៃមជ្ឈមណ្ឌលពាណិជ្ជកម្មអាស៊ី បានអះអាងថា ផលប៉ះពាល់នៃពន្ធគយលើខ្សែសង្វាក់ផ្គត់ផ្គង់បង្កើតសម្ពាធអតិផរណារយៈពេលវែង ជាពិសេសឧស្សាហកម្ម ដែលពឹងផ្អែកលើពាណិជ្ជកម្មពិភពលោក។

លោក Jeff Friedman អ្នកជំនាញខាងគោលនយោបាយពាណិជ្ជកម្មនៅសកលវិទ្យាល័យ Harvard បានព្រមានបន្ថែមថា ពន្ធសងសឹកពីបណ្តាប្រទេសសមាជិកអាស៊ានអាចធ្វើឱ្យអតិផរណាកើនឡើងកាន់តែខ្ពស់។

ដើម្បីទប់ទល់នឹងសម្ពាធផ្នែកសេដ្ឋកិច្ចទាំងនេះ តំបន់អាស៊ានត្រូវពង្រឹងភាពជាដៃគូពាណិជ្ជកម្ម តាមរយៈកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) កិច្ចព្រមព្រៀងភាពជាដៃគូអន្តរប៉ាស៊ីហ្វិក (CPTPP) និងកិច្ចសហប្រតិបត្តិការ South-South។

ក្រៅពីនេះ បណ្តាប្រទេសសមាជិកអាស៊ានទាំង១០ ក៏ត្រូវពង្រីកទំហំនៃការដោះដូរពាណិជ្ជកម្មជាមួយសហភាពអឺរ៉ុប (EU) និងក្រុមប្រឹក្សាសហប្រតិបត្តិការឈូងសមុទ្រ (GCC) នៅក្នុងតំបន់មជ្ឈឹមបូព៌ាផងដែរ៕ប្រភព: Bernama៕

ដោយ: គង់ លាងហួរ
អន្តរជាតិ: បាតុភូតគ្រោះរញ្ជួយដីនាពេលថ្មីៗនេះ បានជះផលប៉ះពាល់លើទីផ្សារខុនដូតម្លៃ៤៥០ពាន់លានបាតរបស់ទីក្រុងបាងកកប្រទេសថៃ ដោយបង្កឱ្យមានការព្រួយបារម្ភអំពីសុវត្ថិភាពអគារខ្ពស់ៗ និងបានជំរុញឱ្យអតិថិជនពន្យារពេលក្នុងការទិញ។
ក្រុមអ្នកជំនាញបានព្យាករណ៍ថា ការលក់ខុនដូក្នុងទីក្រុងបាងកកនឹងធ្លាក់ចុះក្នុងរយៈពេលចន្លោះពី១ខែទៅ២ខែខាងមុខ ជាពិសេសប៉ះពាល់ដល់គម្រោងអគារខុនដូខ្ពស់កប់ពពក ដោយសារទំនុកចិត្តរបស់អ្នកទិញបានថយចុះ ក្រោយការរញ្ជួយដី។

លោក Phattarachai Taweewong នាយកផ្នែកស្រាវជ្រាវ និងទំនាក់ទំនងនៅក្រុមហ៊ុន Colliers International Thailand បានចាត់ទុកការរញ្ជួយដីនេះថា ជា “កត្តាអវិជ្ជមានដ៏ធំមួយ ដែលជះឥទ្ធិពលលើទីផ្សារ ខណៈទីផ្សារនាពេលបច្ចុប្បន្នកំពុងជួបប្រទះការផ្គត់ផ្គង់លើសតម្រូវការស្រាប់ទៅហើយ”។

លោករំពឹងថា ការលក់យូនីតខុនដូនៅរាជធានីបាងកកក្នុងឆមាសទី១ ឆ្នាំ២០២៥នេះនឹងសម្រេចបានចំនួនទាបជាងការព្យាករណ៍ ខណៈអ្នកទិញត្រូវការការធានាឡើងវិញអំពីសុវត្ថិភាពអគារ។

លោក Phattarachai បានពន្យល់ថា“នាពេលនេះ អ្នកទិញកំពុងផ្តល់អាទិភាពលើគុណភាពសំណង់អគារ ដែលអាចទប់ទល់នឹងការរញ្ជួយដី។ ហើយទំនុកចិត្តលើគុណភាពសំណង់ និងវិធានការកាត់បន្ថយគ្រោះមហន្តរាយប្រកបដោយប្រសិទ្ធភាពជារឿងសំខាន់”។

ស្ថានភាពនេះទាមទារឱ្យមានការចាត់វិធានការភ្លាមៗពីរាជរដ្ឋាភិបាលថៃ និងបណ្តាអ្នកអភិវឌ្ឍន៍ ដើម្បីស្ដារទំនុកចិត្តទីផ្សារឡើងវិញ។

លោក Prasert Taedullayasathit ប្រធានសមាគមខុនដូថៃបានកត់សម្គាល់ថា អគារថ្មីដែលសាងសង់ឡើងក្រោយឆ្នាំ២០០៧ ត្រូវបានរចនាឡើងឱ្យមានភាពធន់នឹងការរញ្ជួយដីខ្លាំង។ ព្រឹត្តិការណ៍នេះក៏ជាការដាស់តឿនឱ្យមានការត្រួតពិនិត្យអគារឱ្យបានហ្មត់ចត់ និងការជួសជុលថែទាំឱ្យបានជាប្រចាំ។

លោក Surachet Kongcheep ប្រធានផ្នែកស្រាវជ្រាវ និងប្រឹក្សានៅក្រុមហ៊ុន Cushman & Wakefield Thailand បានសង្កត់ធ្ងន់ថា ការព្រួយបារម្ភអំពីការរញ្ជួយដីនៅពេលនេះនឹងក្លាយជាមូលដ្ឋានសំខាន់ក្នុងការសម្រេចចិត្តរបស់អ្នកទិញខុនដូ។

លោកក៏បានលើកឡើងផងដែរអំពីសារៈសំខាន់នៃការផ្តល់សេវាធានារ៉ាប់រងក្នុងករណីមានគ្រោះមហន្តរាយផ្សេងៗ ជាពិសេសសម្រាប់អគារចាស់ៗ ដែលប្រឈមភាពងាយរងគ្រោះខ្លាំងជាងគេ៕ប្រភព: The Nation៕

ដោយៈ គង់ ម៉ាណា

ភ្នំពេញៈ ក្រុមមន្រ្តីបានបើកកិច្ចប្រជុំ បន្តពិនិត្យវឌ្ឍនភាពការងារតភ្ជាប់ប្រព័ន្ធចែករំលែកទិន្នន័យ និងនីតិវិធីចុះបញ្ជីគម្រោងវិនិយោគនៅថ្នាក់ក្រោមជាតិ តាមប្រព័ន្ធ cdcIPM រវាងក្រុមប្រឹក្សាអភិវឌ្ឍន៍កម្ពុជា និងក្រសួងមហាផ្ទៃ។

លោកហ៊ាង សុទ្ធាយុត្តិ អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាអភិវឌ្ឍន៍កម្ពុជា (ក.អ.ក.) ជាមួយនិងលោកឧត្តមសេនីយ៍ឯក ហោ សំអាត អគ្គនាយក អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ក្រសួងមហាផ្ទៃ (ក.ម.ផ.) បានអញ្ជើញបន្តដឹកនាំកិច្ចប្រជុំពិគ្រោះយោបល់ កម្រិតបច្ចេកទេសលើការតភ្ជាប់ប្រព័ន្ធចែករំលែកទិន្នន័យ និងនីតិវិធីចុះបញ្ជីគម្រោងវិនិយោគ នៅថ្នាក់ក្រោមជាតិតាមប្រព័ន្ធគ្រប់គ្រងគម្រោងវិនិយោគកម្ពុជា (ប្រព័ន្ធ cdcIPM)។

កិច្ចប្រជុំនេះមានការចូលរួមពី លោកជ័យ សម្បត្តិផល្លា ប្រធានផ្នែកនៃលេខាធិការដ្ឋាន គណៈកម្មាធិការជាតិអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) លោកប្រធាននាយកដ្ឋានមុខងារ និងធនធាន នៃអគ្គនាយកដ្ឋានរដ្ឋបាល ក.ម.ផ. លោកស្រី រ័ត្ន ធានី តំណាងច្រកចេញចូលតែមួយនៃក.អ.ក. ព្រមទាំងក្រុមការងារជំនាញរបស់ ក.អ.ក. ក.ម.ផ. និងគ.ជ.អ.ប។

 កិច្ចប្រជុំនាឱកាសនេះ ត្រូវបានរៀបចំឡើង ដើម្បីបន្តពិនិត្យពិភា​ក្សាលើវឌ្ឍនភាពការងារខាងលើ ដែលបន្តពីកិច្ចប្រជុំលើកទី២ នៅទីស្តីការក្រសួងមហាផ្ទៃ កាលពីថ្ងៃទី២០ ខែមីនា ឆ្នាំ២០២៥ កន្លងទៅ៕

ដោយ: គង់ លាងហួរ
អន្តរជាតិ: តុលាការធម្មនុញ្ញកូរ៉េខាងត្បូងនៅថ្ងៃសុក្រនេះបានសម្រេចដកលោកប្រធានាធិបតី Yoon Suk Yeol ចេញពីមុខតំណែង ជុំវិញការប្រកាសច្បាប់អាជ្ញាសឹកកាលពី៤ខែមុន ដោយបានបង្កឱ្យមានការភ្ញាក់ផ្អើល និងការផ្ទុះបាតុកម្មប្រឆាំងតវ៉ាយ៉ាងផុសផុល។

ប្រទេសកូរ៉េខាងត្បូងនឹងត្រូវរៀបចំការបោះឆ្នោតជ្រើសរើសប្រធានាធិបតីថ្មីក្នុងរយៈពេល៦០ថ្ងៃ។ ក្នុងអំឡុងរយៈពេល៦០ថ្ងៃទៅមុខ លោកនាយករដ្ឋមន្ត្រី Han Duck-soo នឹងនៅតែបន្តធ្វើជាប្រធានាធិបតីស្តីទីដដែល។

ប្រធានាធិបតីថ្មី​នឹង​ចូល​កាន់​តំណែង​ភ្លាមៗ​ ក្រោយពីគណៈកម្មាធិការ​ជាតិ​ទទួលបន្ទុករៀបចំ​ការ​បោះឆ្នោត​របស់កូរ៉េខាងត្បូងប្រកាស​លទ្ធផល។

យោងតាមការស្ទង់មតិបង្ហាញថា មេដឹកនាំបក្សប្រឆាំងដ៏ធំ លោក Lee Jae-myung ដែលបានចាញ់លោក Yoon ក្នុងការបោះឆ្នោតយ៉ាងប្រកៀកប្រកិតកាលពីឆ្នាំ២០២២ កំពុងបន្តទទួលបានសំឡេងគាំទ្រនាំមុខគេ ដោយគ្មានគូប្រជែងធំដុំឡើយ។

ការស្តារស្ថិរភាពនយោបាយនៅក្នុងស្រុក និងការចរចានានាជាមួយលោកប្រធានាធិបតីអាមេរិក ដូណាល់ ត្រាំ នឹងក្លាយជាភារកិច្ចអាទិភាពក្រោមរដ្ឋបាលរបស់ប្រធានាធិបតីថ្មីរបស់ប្រទេសកូរ៉េខាងត្បូង។

លោក ត្រាំ បាននិងកំពុងដាក់សម្ពាធពន្ធគយលើបណ្តាប្រទេសជុំវិញពិភពលោក រួមទាំងសម្ព័ន្ធមិត្ត និងទាមទារឱ្យប្រទេសកូរ៉េខាងត្បូងបង់ថ្លៃការពារបន្ថែមទៀត ជាថ្នូរនឹងការរក្សាកងទ័ពអាមេរិកឱ្យឈរជើងនៅទីនោះ។

ភាពតានតឹងនៅឧបទ្វីបកូរ៉េក៏កំពុងកើនឡើងខ្ពស់ផងដែរ។ លោក Yoon បានប្រកាន់ជំហរមុឺងមាត់ប្រឆាំងនឹងកូរ៉េខាងជើង ស្របពេលដែលទីក្រុងព្យុងយ៉ាងព្យាយាមបង្កើនសមត្ថភាពយោធា និងអវកាស និងជំរុញទំនាក់ទំនងកាន់តែជិតស្និទ្ធជាមួយរុស្ស៊ី៕ប្រភព: Reuters៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះក្នុងការជួញដូរនាព្រឹកថ្ងៃសុក្រនេះ ខណៈក្រុមអ្នកវិនិយោគមួយចំនួនបានលក់មាសចេញវិញដើម្បីទទួលបានផលចំណេញ បន្ទាប់ពីប្រធានាធិបតីអាមេរិកលោក ដូណាល់ ត្រាំ បានបង្ហាញពីភាពច្បាស់លាស់នៃវិធានការពន្ធគយរបស់លោក។

តួយ៉ាង តម្លៃមាស Spot Gold បានធ្លាក់ចុះ០,៥៣ភាគរយដល់៣០៩៦,៣១ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,២២ភាគរយដល់៣១១៤,៧០ដុល្លារក្នុងមួយអោនគិតត្រឹមម៉ោង១០:៥៤នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៦៦ភាគរយ ដែលធនាគារកណ្តាលអាមេរិក (Fed) នឹងអាចទម្លាក់អត្រាការប្រាក់ចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះមកនៅត្រឹម១០១,៦៤ពិន្ទុនាព្រឹកថ្ងៃសុក្រនេះ បន្ទាប់ពីបានបិទការជួញដូរត្រឹម១០២,០៧ពិន្ទុកាលពីថ្ងៃព្រហស្បតិ៍ម្សិលមិញ។

ចំណែក តម្លៃលោហៈធាតុប្រាក់ Spot silver បានធ្លាក់ចុះ១,២២ភាគរយដល់៣១,៥៨ដុល្លារក្នុងមួយអោន ខណៈតម្លៃផ្លាទីនបានធ្លាក់ចុះ០,៦៣ភាគរយដល់៩៥០,៦០ដុល្លារក្នុងមួយអោន ហើយតម្លៃ palladium បានធ្លាក់ចុះ០,៤៦ភាគរយដល់៩២៦,៥ដុល្លារក្នុងមួយអោនគិតត្រឹមម៉ោង១០:៥៦នាទីព្រឹក៕

ដោយ: គង់ លាងហួរ
អន្តរជាតិ: យោងតាមការស្ទង់មតិថ្មីមួយបានរកឃើញថា ចំនួនជាង៥០ភាគរយនៃអ្នកឆ្លើយសំណួរសរុប២.០២៣នាក់នៅទូទាំងបណ្តាប្រទេសអាស៊ានចំនួន១១ ដោយរាប់បញ្ចូលទីម័រខាងកើត នឹងឈរនៅខាងសហរដ្ឋអាមេរិក ប្រសិនបើតំបន់នេះត្រូវបានបង្ខំឱ្យជ្រើសរើសរវាងចិន និងសហរដ្ឋអាមេរិក។

ការស្ទង់មតិនេះត្រូវបានធ្វើឡើងដោយវិទ្យាស្ថាន ISEAS-Yusof Ishak ក្នុងទីក្រុងសិង្ហបុរី ចន្លោះពីថ្ងៃទី៣ ខែមករា រហូតដល់ថ្ងៃទី១៥ ខែកុម្ភៈ ឆ្នាំ២០២៥ ដោយវាយតម្លៃការយល់ឃើញរបស់ប្រជាជនក្នុងតំបន់អាស៊ានលើបញ្ហាយុទ្ធសាស្ត្រ និងឥទ្ធិពលរបស់ប្រទេសមហាអំណាចធំៗ។

នៅពេលត្រូវបានស្នើសុំឱ្យជ្រើសរើសរវាងសហរដ្ឋអាមេរិក និងចិន អ្នកឆ្លើយសំណួរចំនួន៥២,៣ភាគរយបានជ្រើសរើសសហរដ្ឋអាមេរិក ខណៈដែលអ្នកឆ្លើយសំណួរចំនួន៤៧,៧ភាគរយទៀតគាំទ្រប្រទេសចិន។

គម្លាតខុសគ្នាដ៏ខ្លីរវាងការគាំទ្រសហរដ្ឋអាមេរិក និងចិន នេះសរបង្ហាញឱ្យឃើញថា អាស៊ានព្យាយាមរក្សានូវតុល្យភាពរវាងទំនាក់ទំនងសេដ្ឋកិច្ចជាមួយទីក្រុងប៉េកាំង និងទំនាក់ទំនងសន្តិសុខជាមួយទីក្រុងវ៉ាសុីនតោន។

របាយការណ៍ស្ទង់មតិរបស់វិទ្យាស្ថានខាងលើបានគូសបញ្ជាក់ថា ចំនួនជាង៥០ភាគរយនៃអ្នកឆ្លើយសំណួរទាំង២.០២៣នាក់ ជឿជាក់ថា សមាគមប្រជាជាតិអាស៊ីអាគ្នេយ៍ ឬអាស៊ានគួរពង្រឹងភាពធន់ និងឯកភាពរបស់ខ្លួន ដើម្បីទប់ទល់នឹងសម្ពាធពីមហាអំណាចពិភពលោកទាំងពីរ។

តំបន់អាស៊ាន ដែលមានប្រជាជនសរុបបញ្ចូលគ្នាចំនួន៦៨០លាននាក់ កំពុងក្លាយជាទីតាំងភូមិសាស្ត្រ ដែលមានសារៈសំខាន់កាន់តែខ្លាំងឡើងចំពោះផលប្រយោជន៍របស់សហរដ្ឋអាមេរិក និងផលប្រយោជន៍របស់ចិន។

មជ្ឈដ្ឋាននៃអ្នកចូលរួមឆ្លើយសំណួរក្នុងការស្ទង់មតិរបស់វិទ្យាស្ថាន ISEAS-Yusof Ishak រួមមាន អ្នកស្រាវជ្រាវ អ្នកតំណាងប្រព័ន្ធផ្សព្វផ្សាយ អង្គការមិនមែនរដ្ឋាភិបាល (NGOs) មន្ត្រីរដ្ឋាភិបាលក្នុងតំបន់អាស៊ាន តំណាងវិស័យឯកជន និងសមាជិកសង្គមស៊ីវិល៕ប្រភព: CNA៕

ដោយៈ ម៉ាណា

    ភ្នំពេញៈ ថ្នាក់ដឹកនាំសម្ព័ន្ឋឧស្សាហកម្មកៅស៊ូវៀតណាម ប្រចាំនៅកម្ពុជា បានបង្ហាញចំណាប់អារម្មណ៍វិនិយោគ លើវិស័យថាមពលស្អាត និងពង្រីកការវិនិយោគនៅកម្ពុជា។

ព័ត៌មាននេះ ត្រូវបានលើកឡើងក្នុងពេលលោកជា វុទ្ឋី អគ្គលេខាធិការគណៈកម្មាធិការវិនិយោគកម្ពុជា និងសហការីបានទទួលជួបពិភាក្សាការងារជាមួយគណៈប្រតិភូ សម្ព័ន្ធឧស្សាហកម្មកៅស៊ូវៀតណាមប្រចាំកម្ពុជា ដឹកនាំដោយលោក Trương Minh Trung អគ្គនាយករងទី១នៃក្រុមហ៊ុន Vietnam Rubber Group និងជាប្រធានគណៈកម្មាធិការអភិវឌ្ឍកៅស៊ូ១០០.០០០ហិកតានៅកម្ពុជាកាលពីថ្ងៃទី៣ មេសា។

លោកអគ្គលេខាធិការ បានសម្តែងនូវការស្វាគមន៍យ៉ាងកក់ក្តៅដល់គណៈប្រតិភូ និងបានថ្លែងនូវការកោតសរសើរ ចំពោះសម្ព័ន្ធឧស្សា​ហកម្មកៅស៊ូវៀតណាមប្រចាំកម្ពុជា ដែលបានខិតខំជំរុញការអភិវឌ្ឍឧស្សហកម្មកៅស៊ូនៅកម្ពុជា នាពេលកន្លងមក និងបានចូលរួមក្នុងសកម្មភាពសង្គមមួយចំនួន។

លោកអគ្គលេខាធិការ ក៏បានជម្រាបជូនគណៈប្រតិភូដោយសង្ខេបពីស្ថានភាពថ្មីៗ នៃបរិយាកាសវិនិយោគនៅកម្ពុជា ព្រមទាំងបានលើកឡើងពីវត្តមាន របស់ក្រុមហ៊ុនផលិតសំបកកង់យានយន្តនៅកម្ពុជា ដែលបានធ្វើឱ្យមានកំណើន នៃតម្រូវការជ័រកៅស៊ូក្នុងស្រុក។

ក្នុងន័យនេះ លោកអគ្គលេខាធិការ បានលើកទឹកចិត្តឱ្យសម្ព័ន្ធឧស្សាហកម្មកៅស៊ូវៀតណាមប្រចាំកម្ពុជា ធ្វើការបណ្តាក់ទុនវិនិយោគបង្កើតតំបន់កសិ-ឧស្សាហកម្មមួយដើម្បីប្រមូលផ្តុំ ក្រុមហ៊ុនធ្វើការកែច្នៃជ័រកៅស៊ូ ដើមកៅស៊ូ ឬកសិផលផ្សេងៗទៀត ដែលកំពុងមានសក្តានុពល ដើម្បីផ្គត់ផ្គង់ដល់ឧស្សាហកម្មក្នុងស្រុក ដែលកំពុងមានតម្រូវការកើនឡើងពីមួយថ្ងៃទៅមួយថ្ងៃ។

ជាមួយគ្នានេះ លោក Trương Minh Trung ប្រធានគណៈប្រតិភូបានថ្លែងអំណរគុណដល់ លោកអគ្គលេខាធិការដែលបានចំណាយពេលវេលាដ៏មមាញឹក ទទួលជួបគណៈប្រតិភូដោយបានជម្រាបជូននូវសភាពការណ៍ថ្មីៗ នៃសកម្មភាពវិនិយោគនៅកម្ពុជា ជាពិសេស ឧស្សាហកម្មកៅស៊ូ។

លោក Trương Minh Trung បានជម្រាបជូនពីវឌ្ឍនភាពការងាររបស់សម្ព័ន្ធ ឧស្សាហកម្មកៅស៊ូវៀតណាមប្រចាំកម្ពុជា និងបានបង្ហាញពីចំណាប់អារម្មណ៍ ក្នុងការពង្រីកការវិនិយោគក្នុងវិស័យផលិតថាមពលស្អាតនៅកម្ពុជា ដោយបានស្នើសុំការគាំទ្រពីក្រុមប្រឹក្សាអភិវឌ្ឍន៍កម្ពុជា។

បន្ថែមលើនេះ លោកTrương Minh Trung បានឯកភាពតាមសំណើរបស់ឯកឧត្តមអគ្គលេខាធិការ ធ្វើការគិតគូរវិនិយោគបង្កើតតំបន់កសិ-ឧស្សាហកម្ម ដើម្បីធ្វើការកែច្នៃកសិផល។

ជាការឆ្លើយតប លោកជា វុទ្ឋី បានសម្តែងនូវការគាំទ្រដល់គម្រោងពង្រីកការវិនិយោគ របស់ក្រុមហ៊ុនក្នុងវិស័យផលិតថាមពលស្អាតនៅកម្ពុជា។ ក្រុមប្រឹក្សាអភិវឌ្ឍន៍កម្ពុជានៅតែបន្តគាំទ្រ ថែទាំការវិនិយោគរបស់វៀតណាម ដែលកំពុងមានសកម្មភាពនៅកម្ពុជា និងរង់ចាំស្វាគមន៍ដោយក្តីរីករាយ ចំពោះការវិនិយោគបន្ថែមពីវៀតណាម៕

ដោយៈ គង់ សូរិយា

    ភ្នំពេញៈ បើគិតត្រឹមខែមេសា ឆ្នាំ 2025 ទីផ្សារអចលនវត្ថុរបស់កម្ពុជា កំពុងជួបប្រទះនឹងរយៈពេលនៃស្ថិរភាព ដោយមានការរំពឹងទុកនៃកំណើនបន្តិចម្តងៗ ដែលរងឥទ្ធិពលដោយកត្តាសេដ្ឋកិច្ច និងវិស័យជាក់លាក់មួយចំនួន។

ទស្សនវិស័យសេដ្ឋកិច្ច

សេដ្ឋកិច្ច​កម្ពុជា​ត្រូវ​បាន​គេ​ព្យាករ​ថា ​នឹង​មាន​កំណើន​ប្រមាណ​៦%​ក្នុង​ឆ្នាំ​២០២៥ ដែល​ត្រូវ​បាន​ជំរុញ​ដោយ​លទ្ធផល​ដ៏​រឹងមាំ ​ក្នុង​វិស័យ​ទេសចរណ៍​និង​ការ​នាំ​ចេញ។

គន្លងសេដ្ឋកិច្ចវិជ្ជមាននេះត្រូវបានគេរំពឹងថា នឹងគាំទ្រដល់ការងើបឡើងវិញបន្តិចម្តងៗ នៅក្នុងវិស័យអចលនទ្រព្យ។

សកម្មភាពក្នុងវិស័យអចលនទ្រព្យ

    វិស័័យអចលនទ្រព្យ ត្រូវបែងចែកជាច្រើនផ្នែកដូចជា បុរី ខុនដូ ដីឡូត៍ លំនៅដ្ឋាន ទីផ្សារលក់រាយ ការិយាល័យ អាផាតម៉ិនជាដើម។

• សកម្មភាពសំណង់

ក្នុងរយៈពេលប្រាំបីខែដំបូងនៃឆ្នាំ 2024 ការវិនិយោគលើវិស័យសំណង់មានចំនួនសរុប ប្រហែល២១៩០លានដុល្លារ ដែលបង្ហាញពីការប្តេជ្ញាចិត្តយ៉ាងប្រុងប្រយ័ត្ន ប៉ុន្តែកំពុងបន្តចំពោះគម្រោងអភិវឌ្ឍន៍។

• តម្លៃអចលនទ្រព្យ

ទីផ្សារអចលនទ្រព្យលំនៅដ្ឋានបែបសហកម្មសិទ្ឋ និងលំនៅដ្ឋានប្រណីត បានឃើញការកែសម្រួលតម្លៃ ដោយខុនដូលំដាប់ខ្ពស់ មានតម្លៃជាមធ្យមប្រហែល $2,714 ក្នុងមួយម៉ែត្រការ៉េ ដែលឆ្លុះបញ្ចាំងពីការថយចុះបន្តិច។

• ទីផ្សារការិយាល័យ

អត្រាកាន់កាប់ការិយាល័យជារួម បានបង្ហាញពីកំណើនមធ្យម ដោយតម្លៃជួល នៅតែស្ថិតស្ថេរប្រហែល $27 ក្នុងមួយម៉ែត្រការ៉េ សំរាប់ការិយាល័យកម្រិតA៕

• ទីផ្សារលក់រាយ

ជាមួយនឹងការប្រកួតប្រជែងបានកើនឡើង ការកាន់កាប់បានធ្លាក់ចុះបន្តិច ដោយតម្លៃជួលបឋមនៅតែរក្សាបានប្រហែល $22.1 ក្នុងមួយម៉ែត្រការ៉េ។

បញ្ហាប្រឈម និងការព្យាករណ៍

ទោះបីជាមានសូចនាករសេដ្ឋកិច្ចវិជ្ជមានក៏ដោយ វិស័យអចលនទ្រព្យប្រឈមមុខនឹងបញ្ហា រួមទាំងការធ្លាក់ចុះ នៃការវិនិយោគបរទេស និងការផ្គត់ផ្គង់លើសតម្រូវការ នៅក្នុងផ្នែកអចលនទ្រព្យមួយចំនួន។

អ្នកជំនាញព្យាករណ៍ថា ការស្ទុះងើបឡើងវិញកាន់តែច្បាស់នៅក្នុងទីផ្សារអចលនទ្រព្យ អាចនឹងកើតឡើងនៅចន្លោះឆ្នាំ 2026 និងឆ្នាំ 2027 ដែលស្របតាមការស្ទុះងើបឡើងវិញ នៃសេដ្ឋកិច្ចទូលំទូលាយ និងបង្កើនទំនុកចិត្តរបស់វិនិយោគិន។

ខណៈពេលដែលទីផ្សារអចលនទ្រព្យកម្ពុជា នៅតែស្ថិតក្នុងដំណាក់កាលនៃស្ថិរភាពនៅដើមឆ្នាំ2025 នោះកំណើនសេដ្ឋកិច្ចមូលដ្ឋាន និងការអភិវឌ្ឍដែលកំពុងបន្ត បានបង្ហាញពីមូលដ្ឋានគ្រឹះសម្រាប់ការងើបឡើងវិញបន្តិចម្តងៗ នៅក្នុងប៉ុន្មានឆ្នាំខាងមុខនេះ៕