ដោយៈ រ៉ាណេត
ភ្នំពេញៈ តំបន់ស្ថិតនៅលើផ្លូវជាតិលេខ៣ ដែលកំពុងពន្លឿនការស្ថាបនាផ្លូវឱ្យកាន់តែធំទូលាយល្អប្រសើរងាយស្រួលធ្វើដំណើរ និងគ្រោងបញ្ចប់ក្នុងពេលខាងមុខនេះ បានធ្វើឲ្យតម្លៃដី បានកើនឡើងខ្ពស់រហូត ដល់ប្រមាន៤០០ដុល្លារក្នុងមួយម៉ែត្រការ៉េ ឬអាចលើពៅនេះក៏មានអាស្រ័យទៅតាមទីតាំង និងតំបន់ទីប្រជុំជន។
អគ្គនាយកក្រុមហ៊ុនអចលនទ្រព្យ Show up Real Estate លោកអ៊ិន ណាង ដែលជាអ្នកអភិវឌ្ឍន៍លំនៅដ្ឋាន និងពុះលក់ដីឡូតិ៍នៅក្នុងតំបន់ផ្លូវជាតិលេខ៣ បានមានប្រសាសន៍នៅរសៀលថ្ងៃទី១៥ ខែធ្នូ ឆ្នាំ២០២០នេះថា សកម្មភាពនៃការទិញលក់ទាំងផ្នែកដីធ្លី និងលំនៅដ្ឋាន ស្ថិតនៅតំបនើផ្លូវជាតិលេខ៣ នៅពេលបច្ចុប្បន្ននេះមានការធ្លាក់ចុះបន្តិចបើធៀប ទៅនឹងកាលពីពាក់កណ្តាកឆ្នាំ២០២០ ជាពិសេសក្រោយមានការផ្ទុះឡើងនូវព្រឹត្តិការណ៍២៨វិច្ឆិកា កាលពីពេលថ្មីៗនេះ។
លោកបន្តថា “សកម្មភាពទិញលក់ គឺមានការធ្លាក់ចុះបន្តិច ទាំងដីឡូតិ៍ទាំងលំនៅដ្ឋានថ្មីៗ ដែលទើបសាងសង់ ប៉ុន្តែបើនិយាយពីតម្លៃដីវិញនៅតែខ្ពស់មិនធ្លាក់ចុះនោះទេ”។ រាប់ចាប់គិតពីចំណុចរង្វង់មូលចោមចៅ រហូតចំណុចគីឡូលេខ២០ គឺបើស្ថិតនៅជាប់ផ្លូវជាតិលេខ៣ គឺនៅតែថ្លៃ រហូតនៅទីតាំងខ្លះ ស្ថិតនៅក្នុងចន្លោះ៣៥០-៤០០ដុល្លារក្នុងមួយម៉ែត្រ ឬនៅទីប្រជុំជន ដែលមានការធ្វើអាជីវកម្ម ដោយកន្លែងមានតម្លៃលើសនេះក៏មានដែរ”។
លោកអ៊ិន ណាង បានបញ្ជាក់ទៀតថា ដោយសារតែតម្លៃដីនៅជាប់ផ្លូវជាតិលេខ៣មានកម្រិតខ្ពស់ ការពុះឡូតិ៍លក់ហាក់មិនសូវមាននោះទេ ហើយសម្រាប់អ្នកអភិវឌ្ឍន៍លំនៅដ្ឋានភាគច្រើន បានលើមរំលងមិនចាប់ទិញ សម្រាប់សាងសង់លំនៅដ្ឋានលក់នោះទេ ព្រោះជាទូទៅដីដែលមានតម្លៃ ចាប់ពីជាង៣៥០ដុល្លារក្នុងមួយម៉ែត្រឡើងទៅ ពិបាកក្នុងការទិញ សម្រាប់សាងសង់លំនៅដ្ឋានលក់ ក្នុងតម្លៃត្រឹម១០ម៉ឺនដុល្លារក្នុងមួយខ្នងនោះណាស់។
ស្រដៀងទៅនឹងការលើកឡើងខាងលើនេះ ប្រធានក្រុមប្រឹក្សាភិបាលក្រុមហ៊ុនភ្នាក់ងារអចលនទ្រព្យ DEYTHMEY Real Estate លោក វិន ឈុនហ៊ាត បានមានប្រសាសន៍ថា “ទីតាំងដែលស្ថិតនៅជាប់ផ្លូវជាតិលេខ៣ ក្នុងរង្វង់គីឡូ២០ ឆ្ពោះមកកាន់រាជធានីភ្នំពេញ មិនសូវមានដីពុះឡូត៍នោះទេ ដោយភាគច្រើនទីតាំងដែលមានសកម្មភាពពុះច្រើន គឺចុះពីផ្លូវជាតិចាប់ពី១០០ម៉ែត្រចូលទៅក្នុងភូមិ ដែលមានតម្លៃចាប់ពី៦៥០០ដុល្លារក្នុងមួយឡូតិ៍ឡើងទៅ ឬថ្លៃជាងនេះសម្រាប់ដីឡូតិ៍ដែលស្ថិតជួរមុខ ឬនៅលើទីតាំងល្អ។
លោកបានបញ្ជាក់ថា “ពេលនេះតម្លៃដីក្នុងតំបន់នេះហាក់នៅទ្រឹង ប៉ុន្តែប្រសិនបើនៅឆ្នាំក្រោយ បញ្ហាកូវីដ១៩ត្រូវបានទប់ស្កាត់បានជោគជ័យខ្ពស់ នោះតម្លៃដីនឹងអាចឡើងថ្លៃជាងនេះបន្តិច ខណៈពេលដែលគម្រោងនៃការអភិវឌ្ឍ និងវិនិយោគពីសំណាក់អ្នករកស៊ីទាំងក្នុង និងក្រៅស្រុកចាប់ផ្តើមមានសកម្មភាពឡើងវិញ”៕
