ដោយៈវឌ្ឍនៈ
ភ្នំពេញៈ តាមការសង្កេតជាក់ស្ដែង អ្នកអភិវឌ្ឍន៍ដីឡូត៏ជាច្រើនបានបង្វែរការអភិវឌ្ឍរបស់ខ្លួន ទៅរកការអភិវឌ្ឍលំនៅឋានជំនួសវិញ ស្របពេលកំណើនតម្រូវការលំនៅឋាន ក្នុងប្រទេសក៏ចាប់ផ្ដើមកើនឡើងខ្ពស់ជាពិសេសនៅក្នុងរយៈពេលប៉ុន្មានមកនេះ។
លោកថាន់ ចាន់ណា អគ្គនាយកនៃក្រុមហ៊ុនអភិវឌ្ឍន៍អចលទ្រព្យ ចាន់ណាលែនដ៍បានឱ្យដឹងតាមទូរស័ព្ទកាលពីព្រឹកថ្ងៃទី១៣ មិថុនាកន្លងមកថា ក្នុងរយៈកាលពីក្រុមហ៊ុនលោក ជាក្រុមហ៊ុនអភិវឌ្ឍន៍ដីឡូត៏ តែក្រោយមកក៏ឃើញពីទីផ្សារនៃលំនៅឋានក្នុងរាជធានីភ្នំពេញ មានសន្ទុះកើនឡើងខ្ពស់លោកក៏សម្រេចចិត្តបង្វែរការអភិវឌ្ឍរបស់ខ្លួនទៅរកលំនៅឋានវិញ។
លោកបន្តថា កាលពីដំបូងក្រុមហ៊ុនបានសាកល្បង ក្នុងការអភិវឌ្ឍលំនៅឋានត្រឹម៤០ផ្ទះប៉ុណ្ណោះ ប៉ុន្តែដោយសារតែសង្កេតឃើញថាអតិថិជនបានគាំទ្រភ្លូកទឹកភ្លូកដី ទើបជំរុញឱ្យមានការអភិវឌ្ឍលំនៅឋានជាបន្តបន្ទាប់។ រហូតដល់ពេលនេះ ក្រុមហ៊ុនបានអភិវឌ្ឍន៍លំនៅឋានរាប់រយល្វែងដើម្បីបំពេញតម្រូវការអតិថិជន។
លោកបន្ថែមថា លោកមើលថាទីផ្សារលំនៅឋាន នៅក្នុងប្រទេសកម្ពុជានៅតែមានសន្ទុះកើនឡើង ពីមួយឆ្នាំទៅមួយឆ្នាំ ស្របជាមួយនឹងការរីកចម្រើននៃទីក្រុងភ្នំពេញ ដូច្នេះក្រុមហ៊ុននឹងជ្រើសរើសរកទីតាំងថ្មី សម្រាប់ការអភិវឌ្ឍបំពេញតម្រូវការ ។
ក្រៅពីក្រុមហ៊ុនមួយនេះ ក៏មានក្រុមហ៊ុនជាច្រើនទៀត បានបង្វែរការអភិវឌ្ឍរបស់ខ្លួន ពីការអភិវឌ្ឍដីឡូត៏ ទៅជាក្រុមហ៊ុនអភិវឌ្ឍន៍លំនៅឋាន ហើយក៏មានក្រុមហ៊ុនទទួលជោគជ័យ គួរជាទីពេញចិត្តផងដែរ ជាពិសេសគម្រោងលំនៅឋានដែលមានទីតាំងនៅជាយក្រុង ។
អ្នកនាងគឹមគិនកេសា អ្នកគ្រប់គ្រងជាន់ខ្ពស់នៃក្រុមហ៊ុនCBRE Cambodia ក៏បានលើកឡើងផងដែរថា តម្រូវការលំនៅឋាននៅក្នុងរាជធានីភ្នំពេញនៅតែមាន ស្របជាមួយនឹងកំណើន ប្រជាជនមករស់នៅក្នុងរាជធានីភ្នំពេញកាន់តែច្រើន ។
អ្នកនាងបន្តថា “លំនៅឋានដែលមានការកែច្នៃ និងរចនាប្លែកៗតែងតែទទួលបានការគាំទ្រ ហើយតំបន់ជាយក្រុង គឺជាតំបន់ដែលទាក់ទាញទៅលើការទីផ្សារលំនៅឋានជាច្រើន និងមានអ្នកគាំទ្រជាច្រើនផងដែរ”៕
