ដោយស៊ីវ ម៉េង
ភ្នំពេញ: ក្រុមហ៊ុនផ្សារទំនើបធំៗជាច្រើន បាននិងកំពុងចាច់ផ្តើមប្រកួតប្រជែងគ្នាលើទឹកដីខ័ណ្ឌសែនសុខ ដែលជាតំបន់រីកចម្រើនយ៉ាងលឿន នៃភាគខាងជើងឈៀងខាងលិចក្រុងភ្នំពេញ។
ការទៅដល់នៃផ្សារទំនើប AEON MALL2 ផ្សារទំនើប MAKRO ផ្សារទំនើបនៃក្រុមហ៊ុនឌីហ្វេសអាយឡាក់គី ផ្សារ Global House និងផ្សារទំនើបនៃក្រុមហ៊ុនជីព ម៉ុងបានធ្វើឲ្យតំបន់នេះមានភាពរីកចម្រើនខ្លាំង និងទាក់ទាញការចាប់អារម្មណ៍កាន់តែខ្លាំងពីអ្នកវិនិយោគជាតិ និងអន្តរជាតិសាងសង់បុរីជាច្រើននៅតំបន់នេះផងដែរ។
លោក Stephane Pariente នាយកប្រតិបត្តិក្រុមហ៊ុនផ្សារទំនើប Lucky និងហ្កាឌៀនបានមានប្រសាសន៍ឲ្យដឹង ក្នុងពិធីសម្ភោធសាខាផ្សារទំនើបរបស់ខ្លួនកាលពីម្សិលម៉ិញនេះថា ក្រុមហ៊ុនឌីហ្វេសអាយឡាក់គី មានសាខាផ្សារទំនើបចំនួន១៧ និងហ្គាឌៀនចំនួន១០។ ដោយមានការខិតខំប្រឹងប្រែង យកចិត្តទុកដាក់ពីបុគ្គលិក និងថ្នាក់ដឹកនាំគ្រប់ជាន់ថ្នាក់ទាំងអស់ ក្រុមហ៊ុនឌីហ្វេសអាយឡាក់គី និងប្តេជ្ញាថែរក្សារជាផ្សារទំនើបដែលឈានមុខគេនៅប្រទេសកម្ពុជា។
លោកបន្តថា “ផ្សារទំនើបឡាក់គី តែងតែផ្តោតសំខាន់លើការផ្តល់ជូនអតិថិជននូវទំនិញ ដែលមានគុណភាពល្អបំផុតនិងផលិតផលគ្រប់ប្រភេទ ដែលមានកត្តានុភាពសំរាប់ប្រើប្រាស់ដល់អតិថិជន”។
លោកបន្តថា “ក្រុមហ៊ុនឌីហ្វេសអាយឡាក់គី មានមោទនភាពនិងមានភាពរីករាយជាខ្លាំង នូវការនាំមកនូវផ្សារទំនើបឡាក់គី និងហ្គាឌៀនសាខាសែនសុខ”។
បច្ចុប្បន្នមានបុរីជាច្រើននៅតំបន់នេះ ដូចជាបុរីភ្នំពេញថ្មី បុរីវិមានភ្នំពេញ បុរីប៉េង ហួត បុរីពិភពថ្មី បុរីអង្គរភ្នំពេញ បុរីARATAដែលវិនិយោគដោយក្រុមហ៊ុនជប៉ុនជាដើម។
យោងតាមរបាយការណ៍របស់ក្រុមហ៊ុន CBRE Cambodia បានរកឃើញថា ផ្សារទំនើបតូច ធំចំនួន១៣ គ្រោងបើកដំណើរការនៅឆ្នាំ២០១៨នេះ ប៉ុន្តែក្នុងចំណោមគំរោងទាំងនោះ មានគំរោងផ្សារទំនើបមួយចំនួនបានពន្យាពេល ដោយសារការសាងសង់មិនទាន់ពេលវេលា។
អ្នកនាងអាន សុធីតានាយិកាប្រចាំប្រទេសនៃក្រុមហ៊ុន CBRE Cambodia បានថ្លែងថា ការរីកចម្រើនផ្សារទំនើបនៅកម្ពុជាឆ្លុះបញ្ចាំងពីកំនើនអំណាចនៃការទិញ ដោយសារការរីកចម្រើនសេដ្ឋកិច្ចសង្គមកម្ពុជា ពិសេសអ្វីដែលយើងមើលឃើញគឺចំនួនផ្សារទំនើបដែលមានបច្ចុប្បន្នមិនទាន់ច្រើននោះទេ ធៀបនឹងទំហំផ្សារនិងចំនួនប្រជាពលរដ្ឋរស់នៅទីក្រុងនេះ ប៉ុន្តែប្រសិនជាផ្សារទំនើបកាន់តែច្រើនឡើងត្រូវបានបង្កើតបន្ថែមទៀត វានឹងធ្វើឲ្យទីផ្សារមានបញ្ហា ដោយសារការផ្គត់ផ្គង់អាចលើសតម្រូវការ។
លោកវ៉ា វីរៈអគ្គនាយកក្រុមហ៊ុន Century21 Fortuna Investment បានមានប្រសាសន៍ឲ្យដឹងផងដែរថា តំបន់ស្ថិតនៅក្នុងខ័ណ្ឌសែនសុខ មានការរីកចម្រើនលឿន និងមានហេដ្ឋារចនាសម្ព័ន្ឋល្អប្រសើរ ហេតុនេះអ្នកវិនិយោគដែលចូលមកវិនិយោគតំបន់នេះពួកគេពិតជាបានសិក្សាទីផ្សាររួមហើយ ទើបពួកគេវិនិយោគ។លោកបន្តថា អ្នកវិនិយោគមើលឃើញអំណាចនៃការទិញកើនឡើង ទើបពួកគេចូលទៅវិនិយោគតំបន់នេះ ដោយសារលំហូរប្រជាជនចូលទៅរស់នៅតំបន់នេះច្រើន ព្រោះបច្ចុប្បន្នមានបុរីជាង១០ហើយ បាននិងកំពុងវិនិយោគនៅតំបន់នេះ។
លោកបន្តថា “បើយើងមើលមួយភ្លេតគឺផ្សារហាក់មានចំនួនច្រើន ប៉ុន្តែបើយើងមើលកំនើនប្រជាជន និងការចាប់យកចំណែកទីផ្សារខុសៗគ្នា ពីអ្នកវិនិយោគនៅតំបន់នោះ ចំនួនផ្សារទាំងនោះមិនច្រើននោះទេ”៕
