ដោយ: គង់ លាងហួរ
អន្តរជាតិ: យោងតាមរបាយការណ៍ថ្មី របស់ក្រុមហ៊ុន Angsana Council និងធនាគារDBS Bank បានឱ្យដឹងថា កំណើនសេដ្ឋកិច្ចរបស់តំបន់អាស៊ាន និងលំហូរវិនិយោគផ្ទាល់ពីបរទេស (FDI) ចូលមកកាន់តំបន់អាស៊ាន នឹងវ៉ាដាច់ប្រទេសចិន ក្នុងរយៈពេល១ទសវត្សរ៍ខាងមុខ។
យោងតាមទស្សនវិស័យសេដ្ឋកិច្ចអាស៊ាន ចាប់ពីឆ្នាំ២០២៤ ដល់ឆ្នាំ២០៣៤ ដែលបានសិក្សារួមគ្នាដោយស្ថាប័នទាំង២ខាងលើ បានព្យាករណ៍ឃើញ ពីគន្លងសេដ្ឋកិច្ចដ៏រឹងមាំសម្រាប់តំបន់អាស៊ាន ដោយសារកត្តាប្រជាសាស្រ្ត និងការផ្លាស់ប្តូរខ្សែសង្វាក់ផ្គត់ផ្គង់សកល។
របាយការណ៍បានព្យាករណ៍ថា បណ្តាប្រទេសសេដ្ឋកិច្ចធំៗចំនួន៦ ដូចជា ឥណ្ឌូនេស៊ី ម៉ាឡេស៊ី ហ្វីលីពីន សិង្ហបុរី ថៃ និងវៀតណាម នឹងសម្រេចបានកំណើន GDP ប្រចាំឆ្នាំបូករួមបញ្ចូលគ្នាជាមធ្យមចំនួន៥,១% ចាប់ពីពេលនេះដល់ឆ្នាំ២០៣៤ខាងមុខ។
អត្រាកំណើននេះត្រូវបានគេរំពឹងថា នឹងវ៉ាដាច់កំណើន GDP របស់ប្រទេសចិនក្នុងរង្វង់៣,៥% ទៅ៤,៥% ក្នុងរយៈពេលដូចគ្នា។
វៀតណាមត្រូវបានគេរំពឹងថា នឹងឈរនាំមុខគេ ជាមួយនឹងអត្រាកំណើនសេដ្ឋកិច្ចខ្ពស់បំផុត ក្នុងរង្វង់៦,៦% តាមពីក្រោយដោយកំណើនសេដ្ឋកិច្ច ហ្វីលីពីនក្នុងរង្វង់៦,១%។ កំនើនសេដ្ឋកិច្ចសិង្ហបុរី ត្រូវបានគេរំពឹងថា នឹងកើនឡើងក្នុងអត្រា២,៥% ទាបជាងគេបំផុត ក្នុងចំណោមប្រទេសទាំង៦។
លោក Charles Ormiston អ្នកជំនាញមួយរូបនៅក្រុមហ៊ុន Angsana Council បានគូសបញ្ជាក់ថា “កំណើនសេដ្ឋកិច្ចដ៏រឹងមាំរបស់តំបន់អាស៊ាន និងការធ្វើពិពិធកម្មរបស់ក្រុមហ៊ុនផលិតកម្មនានា ចេញពីប្រទេសចិនក្លាយជាកត្តាជំរុញដ៏សំខាន់”។
លើសពីនេះ របាយការណ៍បានព្យាករណ៍ ឃើញកំណើននៃការវិនិយោគពីបរទេសនៅតំបន់អាស៊ាន។ តួយ៉ាង កាលពីឆ្នាំ២០២៣ បណ្តាប្រទេសសេដ្ឋកិច្ចធំៗទាំង៦ ខាងលើបានទាក់ទាញលំហូរ FDI សរុបបញ្ចូលគ្នាចំនួន២០៦ពាន់លានដុល្លារ កើនឡើងលើសពីលំហូរFDI ចំនួន៤២,៧ពាន់លានដុល្លាររបស់ប្រទេសចិនជាលើកដំបូង ក្នុងរយៈពេល១ទសវត្សរ៍ ហើយនិន្នាការនេះត្រូវបានគេរំពឹងថា នឹងនៅតែបន្តកើតមាន។
ក្នុងន័យនេះ លោក Ormiston បានលើកឡើងថា “តំបន់អាស៊ាន គួរតែពង្រឹងការផលិតថាមពលបៃតង ព្រោះវានឹងក្លាយជាកត្តាទាក់ទាញលំហូរ FDI ខណៈក្រុមហ៊ុនផលិតកម្មនានានៅទូទាំងពិភពលោក កំពុងខិតខំព្យាយាមកាត់បន្ថយការបំភាយឧស្ម័នកាបូន ចេញពីរោងចក្ររបស់ពួកគេ៕ប្រភព:Pardafas.com៕
