ដោយៈ គង់ លាងហួរ
អារ៉ាប៊ីអាអូឌីតៈ វាជាមហិច្ឆតា ប្រកបដោយក្តីស្រម៉ៃដូចក្នុងយល់សុបិនចឹង សម្រាប់ប្រទេសអារ៉ាប៊ីអាអូឌីត ដែលបង្ហាញពីគម្រោងសាងសង់អគារកម្ពស់២.០០០ម៉ែត្រ។
ប្រសិនគ្មានការប្រែប្រួលទេនោះ មហាគំរោងយក្សនេះនៅអាចនឹងបើកការដ្ឋាននៅឆ្នាំ២០២៦ នៅក្នុងប្រទេសពោរពេញដោយភោគទ្រព្យនេះ។
ប្រសិនជាវាលេចរូបរាងពិតមែន វានឹងជាគម្រោងអគារខ្ពស់បំផុតមិនធ្លាប់មានលើពិភពលោក Rise Tower កម្ពស់២.០០០ម៉ែត្រ ស្ថិតនៅទីក្រុងរីយ៉ាដ នៃប្រទេសអារ៉ាប៊ីសាអូឌីត។
បច្ចុប្បន្ន គម្រោងអគារ Rise Tower កំពុងស្ថិតក្នុងដំណាក់កាលដេញថ្លៃ និងស្វែងរកក្រុមហ៊ុនម៉ៅការសំណង់។ គម្រោងនេះជាផ្នែកមួយនៃចក្ខុវិស័យឆ្នាំ២០៣០ របស់រដ្ឋាភិបាលអារ៉ាប៊ីសាអូឌីត ប៉ុន្តែបើ គិតមកទល់ពេលនេះ ការងារសាងសង់មិនទាន់ចាប់ផ្តើមនៅឡើយទេ។
ការសាងសង់អគារកម្ពស់២.០០០ម៉ែត្រ អាចជួបការលំបាកផ្នែកវិស្វកម្ម និងទាមទារដើមទុនវិនិយោគច្រើន ហើយផលចំណេញពីការវិនិយោគ(Return on Investment) ស្ថិតក្នុងភាពមិនច្បាស់លាស់។ លំនឹងអគារ និងជណ្តើរយន្តក៏អាចក្លាយជាឧបសគ្គផងដែរ ព្រោះអគារ Rise Tower នឹងមានកម្ពស់រហូតដល់៦៧៨ជាន់។
អគារនេះត្រូវបានរចនា ដោយក្រុមហ៊ុនស្ថាបត្យកម្មអង់គ្លេស Foster + Partners។ អគារ Rise Tower ជាផ្នែកមួយនៃគម្រោងបង្កើតតំបន់សេដ្ឋកិច្ច និងពាណិជ្ជកម្ម NorthPole នៅលើផ្ទៃដីទំហំ៣០៦គីឡូម៉ែត្រការ៉េ ស្ថិតនៅភាគខាងជើង នៃរាជធានីរីយ៉ាដ (Riyadh)។
គម្រោងសាងសង់អគារRise Tower គ្រោងចំណាយទុនវិនិយោគចំនួន៥ពាន់លានដុល្លារអាមេរិក ពីមូលនិធិវិនិយោគសាធារណៈ (PIF) របស់រដ្ឋាភិបាលអារ៉ាប៊ីសាអូឌីត។ អគារកម្ពស់២.០០០ម៉ែត្រនេះនឹងរួមមាន លំនៅដ្ឋាន អចលនទ្រព្យពាណិជ្ជកម្ម សណ្ឋាគារ ទីតាំងកំសាន្ត និងការរចនាបៃតង ។
គម្រោងដ៏មហិមានេះ អាចនឹងបង្កើតការងារប្រមាណ៨០.០០០កន្លែង ក្នុងអំឡុងពេលសាងសង់ និងក្រោយពេលសាងសង់រួច ព្រមទាំងបង្កើតផលចំណេញ សេដ្ឋកិច្ចរយៈពេលវែង ដោយរួមមាន សណ្ឋាគារ ការិយាល័យ ហាងលក់រាយ និងកន្លែងសង្កេតការណ៍លើកំពូលអគារ ស្របតាមមហិច្ឆតា នៃការធ្វើពិពិធកម្មសេដ្ឋកិច្ចរបស់អារ៉ាប៊ីសាអូឌីត៕
