កិច្ចប្រជុំកំពូលខ្សែក្រវ៉ាត់ និងផ្លូវនឹងប្រារពធ្វើនៅទីក្រុងហុងកុង នាខែកញ្ញាខាងមុខ

ដោយៈ គង់ សូរិយា

    ភ្នំពេញៈ តំណាងក្រុមប្រឹក្សាអភិវឌ្ឍន៍ពាណិជ្ជកម្មរបស់តំបន់​ស្វយ័ត​ហុងកុង (Hong Kong Trade Development Council) បានបង្ហើបឲ្យដឹងថា កិច្ចប្រជុំកំពូលខ្សែក្រវ៉ាត់ និងផ្លូវនឹង​ប្រារពធ្វើនៅទីក្រុងហុងកុងនាខែកញ្ញាខាងមុខនេះ។

ព័ត៌មាននេះ ត្រូវបានបង្ហាញឲ្យដឹងក្នុងពេលលោកឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា អមដោយលោកជំទាវ ឧកញ៉ា នួន ពេជ្រសុផល​អគ្គនាយករងជាន់ខ្ពស់សភាពាណិជ្ជកម្ម​កម្ពុជាបានទទួលជំនួបសម្តែងការគួរសម និងពិភាក្សាការងារជាមួយនឹង តំណាងក្រុមប្រឹក្សាអភិវឌ្ឍន៍ពាណិជ្ជ​កម្មរបស់តំបន់ស្វយ័តហុងកុង នៅទីក្រុងភ្នំពេញ (Hong Kong Trade Development Council)។

គោលបំណងនៃជំនួបនេះគឺ ពិភាក្សា និងជម្រាបអំពីកិច្ចប្រជុំ​កំពូល​ផ្លូវ និងខ្សែក្រវ៉ាត់លើកទី១០ ដែលនឹងប្រព្រឹត្តទៅនៅថ្ងៃទី១០-១១ ខែកញ្ញា ឆ្នាំ២០២៥ នៅទីក្រុងហុងកុង នៃសាធារណរដ្ឋប្រជា​មានិតចិន។

នាឱកាសនេះផងដែរ តំណាងក្រុមប្រឹក្សាអភិវឌ្ឍន៍ពាណិជ្ជកម្ម​របស់តំបន់ស្វយ័តហុងកុង បាននាំមកនូវលិខិតអញ្ជើញ ដើម្បីគោរព​អញ្ជើញ អ្នកឧកញ៉ា គិត ម៉េង និងជាប្រធានក្រុមប្រឹក្សាពិគ្រោះ​យោ​បល់ធុ​រកិច្ចអាស៊ានសម្រាប់កម្ពុជា និងគណៈប្រតិភូសភាពាណិជ្ជកម្ម​កម្ពុជា អញ្ជើ​ញចូលរួមកិច្ចប្រជុំកំពូលខាងលើ៕