ដោយ វុត្ថា
ភ្នំពេញៈ គម្រោងលំនៅឋានតម្លៃសមរម្យ និងកម្រិតខ្ពស់នឹងបន្តពង្រីកខ្លួននៅតាមបណ្តោយផ្លូវជាតិសំខាន់ៗ រហូតដល់ជាង៣០គីឡូម៉ែត្រចេញពីភ្នំពេញ ស្របពេលដែលតម្រូវការលំនៅឋានតែបន្តកើនឡើង ទោះបីប្រទេសកម្ពុជាស្ថិតនៅក្នុងកាលៈទេសៈណាក៏ដោយ។
អគ្គនាយកក្រុមហ៊ុន Premium Group លោកម៉ាន់ ចាន់ឌី បានប្រាប់គេហទំព័រ Propertyarea.asia នៅថ្ងៃទី២២ ខែកញ្ញា ឆ្នាំ ២០២០នេះឱ្យដឹងថា នៅតាមបណ្តោយផ្លូវជាតិសំខាន់ៗ ចេញពីភ្នំពេញទៅកាន់បណ្តាខេត្តនានារបស់កម្ពុជា មានគម្រោងលំនៅឋានតម្លៃសមរម្យ និងកម្រិតខ្ពស់នៅតែបន្តកើនឡើង ជាមួយនឹងតម្រូវការ និងប្រជាពល រដ្ឋនៅតែបន្តសម្រុកមករស់នៅក្នុងទីក្រុងភ្នំពេញ។
លោកបន្តថា “ការពង្រីករបស់ទីក្រុងភ្នំពេញបច្ចុប្បន្ននេះ នៅមានកម្រិតនៅឡើយបើធៀបជាមួយនឹងបណ្តាទីក្រុងនានា នៅក្នុងប្រទេសតំបន់អាស៊ាន ដូច្នេះតម្រូវការនៃការអភិវឌ្ឍទាំងគម្រោងលំនៅឋានតម្លៃមធ្យម និងកម្រិតខ្ពស់ នឹងបន្តពង្រីកបន្ថែមទៀត ដោយយ៉ាងណាស់៣០គីឡូម៉ែត្រពីភ្នំពេញបន្ថែមទៀត” ។
លោកបន្ថែមថា ជាមួយនឹងការអភិវឌ្ឍន៍ និងពង្រីកហេដ្ឋារចនាសម្ព័ន្ធផ្លូវថ្នល់របស់រាជរដ្ឋាភិបាលនាពេលបច្ចុប្បន្ននេះ កាន់តែមានភាពប្រសើរ និងល្អស្អាត និងជួយជំរុញឱ្យ និងបង្ករលក្ខណៈល្អប្រសើរសម្រាប់ អ្នកអភិវឌ្ឍន៍លំនៅឋានគ្រប់ប្រភេទ ទៅអភិវឌ្ឍន៍ គម្រោងរបស់ពួកគេ នៅតាមបណ្តោយផ្លូវជាតិសំខាន់ៗចេញពីភ្នំពេញ។
លោកម៉ាន់ ច័ន្ទឌីបានបន្ថែមថា ការពង្រីកគម្រោងអភិវឌ្ឍន៍លំនៅឋាន ទាំងតម្លៃសមរម្យ និងកម្រិតខ្ពស់ នៅតាមផ្លូវសំខាន់ចេញពីភ្នំពេញរហូតដល់ជាង៣០គីឡូម៉ែត្រនេះ ស្របពេលដែលទីក្រុងភ្នំពេញ មានភាពមមាញឹកចរាចរណ៍ និងបរិយាកាសបរិស្ថានមិនសូវមានអំណោយផលផងដែរ។
លោកច្រឹក សុខនីម ប្រធានសមាគមភ្នាក់ងារ និងវាយតម្លៃអចលវត្ថុកម្ពុជាបានឱ្យដឹងដែរថា ទោះក្នុងកាលៈទេសៈបែបណា តម្រូវការលំនៅឋាន នៅតែបន្តមានពីសំណាក់ពលរដ្ឋកម្ពុជា ទាំងតម្លៃវិញក៏មិនចុះផងដែរ ដើម្បីឆ្លើយតបទៅតម្រូវការនេះ អ្នកអភិវឌ្ឍន៍ បន្តអភិវឌ្ឍន៍គម្រោងលំនៅឋានទាំងតម្លៃកម្រិតមធ្យម និងកម្រិតខ្ពស់។
លោកបន្តថា តាមការមើលឃើញជាក់ស្តែង នៅតាមបណ្តោយផ្លូវជាតិសំខាន់ៗចេញពីភ្នំពេញទៅតាមបណ្តាខេត្ត មានគម្រោងអភិវឌ្ឍន៍ទាំងលំនៅឋានកម្រិតមធ្យម និងកម្រិតខ្ពស់ ជាច្រើនមានការកើនឡើងច្រើន និងបន្តរីកចំរើនបន្ថែមទៀតក្រោយពេលដែលហេដ្ឋារចនាសម្ព័ន្ធមួយចំនួនត្រូវបានបញ្ចប់ការសាងសង់។
យោងតាមរបាយការណ៍របស់ក្រសួងរៀបចំដែនដី នគរូបនីយកម្មនិងសំណង់បាន ឱ្យដឹងថា តម្រូវការលំនៅឋានទាំងកម្រិតធម្យម និងខ្ពស់ នៅក្នុងប្រទេសកម្ពុជាមានចំនួនប្រមាណ៥ម៉ឺនខ្នងនៅក្នុងមួយឆ្នាំៗ ដែលភាគច្រើនជាតម្រូវការរបស់យុវជន និងអ្នកដែលទើបរៀបការរួច៕
