ដោយ វុត្ថា
ភ្នំពេញៈ ជាថ្មីម្តងទៀត អគ្គនាយកដ្ឋានសណង់ នៃក្រសួងរៀបចំដែនដី នគរូបនីយកម្ម និងសំណង់ក្រើនរំលឹកដល់ម្ចាស់សំណង់ បណ្តុំលំនៅឋានមានលក្ខណៈបុរី បុរី អគារស្នាក់នៅរួម អគារពាណិជ្ជកម្ម អគារការិយាល័យ រោងចក្រ ឧស្សាហកម្ម ឃ្លាំង ស្ថានីយ៍ សណ្ឋាគារ ផ្ទះសំណាក់ និងដេប៉ូចែកចាយប្រេងឥន្ទនៈ និងឧស្ម័ន ទាំងស់ដែលបានសាងសង់រួចមុនច្បាប់ស្តីពី សំណង់ចូលជាធរមាន ត្រូវមកដាក់ពាក្យស្នើសុំវិញ្ញាបនបត្រពីអាជ្ញាធរមានសត្ថកិច្ច។
យោងតាមសេចក្តីជូនដំណឹង ដែលចេញផ្សាយកាលពីចុងសប្តាហ៍កន្លងមកនេះឱ្យដឹងថា ម្ចាស់សំណង់ដែលកំពុងប្រើប្រាស់អាស្រ័យផល លើសំណង់ទាំងនោះដោយមិនមានលិខិតអនុញ្ញាតសាងសង់ ឬបានសាងសង់ខុសពីលិខិតអនុញ្ញាតសាងសង់ និងម្ចាស់សំណង់ដែលមានសិទ្ធិអនុញ្ញាតសាងសង់ ប៉ុន្តែមិនមានលិខិតបើករដ្ឋាន ឬលិខិតបិតការដ្ឋាន ដែលបានសាងសង់រួចមុនថ្ងៃ២ ខែវិច្ឆិកា ឆ្នាំ២០១៩ តម្រូវឱ្យមានលិខិតអនុញ្ញាសាងសង់ និងលិខិតបើក-បិទការដ្ឋាន។
សេចក្តីជូនដំណឹងដដែលបានបន្តថា “ម្ចាស់សំណង់ត្រូវអញ្ជើញ មកដាក់ពាក្យស្នើសុំវិញ្ញាបនបត្រ យប្រើប្រាស់សំណង់ពីអាជ្ញាធរមានសត្ថកិច្ច ស្របតាមព្រះរាជក្រមលេខ នស/រកម១១១៩/០១៩ចុះថ្ងៃទី៦ ខែធ្នូឆ្នាំ ២០១៩ ដាក់ឱ្យប្រើប្រាស់ច្បាប់ស្តីពីសំណង់ ត្រង់មាត្រ៤៤ និងស្របតាមប្រកាសលេខ១៧៧ នស/ប្រកាស ចុះថ្ងៃទី៦ខែធ្នូ ឆ្នាំ២០១៩ ស្តីពីបែបបទ និងនិតិវិធីនៃការផ្តល់វិញ្ញាបនបត្រប្រើប្រាស់សំណង់ ដែលបានសាងសង់រួចមុនច្បាប់ស្តីពីសំណង់ចូលជាធរមាន” ។
សេចក្តីជូនដំណឹងបន្ថែមថា “ចំពោះសំណង់ដែលបានសាងសង់រួច មុនថ្ងៃទី២០ ខែធ្នូឆ្នាំ១៩៩៧ ម្ចាស់សំណង់ក៏អាចដាក់ពាក្យស្នើសុំវិញ្ញាបនបត្រ ប្រើប្រាស់សំណង់របស់ខ្លួនពីអាជ្ញាធរមានសមត្ថកិច្ចបាន” ។
ក្រសួងរៀបចំដែនដីពន្យល់ថា ការផ្តល់វិញ្ញាបនបត្រប្រើប្រាស់សំណង់នេះ បានកំណត់ និងទុកពេលជូនម្ចាស់សំណង់ ដាក់ពាក្យស្នើសុំវិញអនុវត្តរយៈពេល២ឆ្នាំក្រោយពេលច្បាប់ស្តីពី សំណង់ចូលជាធរមាន គឺចាប់ពីថ្ងៃទី២ ខែវិច្ឆិកា ឆ្នាំ ២០១៩ ដល់ថ្ងៃទី ២ ខែវិច្ឆិកា ឆ្នាំ២០២។ ម្ចាស់សំណង់ដែលពាក់ព័ន្ធ អាចមកបំពេញបែបបទ ស្នើសុំវិញ្ញាបនបត្រប្រើប្រាស់សំណង់ នៅច្រកចេញចូលតែមួយនៃរដ្ឋបាលសាលាស្រុក ក្រុង ខណ្ឌ រដ្ឋបាលរាជធានីខេត្ត ឬនៅច្រកចេញចូល តែមួយនៅក្រសួងរៀបចំដែនដី នគរូបនីយកម្ម និងសំណង់ទៅតាមសមត្ថកិច្ច នៃការផ្តល់លិខិតអនុញ្ញាតសាងសង់។
ក្រសួងរៀបចំដែនដីបញ្ជាក់ថា “ក្នុងករណីម្ចាស់សំណង់ខាងលើ មិនអនុវត្តបញ្ញាត្តិច្បាប់ និងផុតរយៈពេលនៃការកំណត់ដូចខាងលើ អជ្ញាធរមានសមត្ថកិច្ច នឹងអនុវត្តទោសប្បញ្ញត្តិតាមច្បាប់ស្តីពីសំណង់ជាធរមាន” ៕
