ដោយ ហ្សូលី
ភ្នំពេញៈ សណ្ឋាគារលំដាប់ផ្កាយប្រាំ ដែលមានទីតាំងស្ថិតចំកណ្តាលទីក្រុងភ្នំពេញ សម្រេចកំណត់ពេលបើកដំណើរការជាផ្លូវការ បន្ទាប់ពីពន្យាពេលថ្ងៃបើកដំណើរម្តងរួចមកហើយ គឺនៅចុងខែកញ្ញា ឆ្នាំ ២០២០ កន្លងទៅ។
សណ្ឋាគារ Hyatt នេះបានកំណត់ពេលវេលាច្បាស់លាស់ គឺគ្រោងបើកដំណើរការនៅត្រីមាសទី១ ឆ្នាំ២០២១ ប៉ុន្តែមិនទាន់បញ្ជាក់ថ្ងៃជាក់លាក់នៅឡើយទេ។ ចំនែកសាខារបស់សណ្ឋាគារនេះ ដែលមានទីតាំងនៅខេត្តសៀមរាប គ្រោងនឹងស្វាគមន៍សារជាថ្មីនៅថ្ងៃទី៥ ខែវិច្ឆិកា ខាងមុខ បន្ទាប់ពីបិទមួយរយៈដោយសារការរាតត្បាតនៃវិបត្តិកូវីដ ១។
រចនាបថរបស់សណ្ឋាគារនេះ ច្នៃស្របតាមកេរដំណែលដ៏សម្បូរបែបរបស់កម្ពុជា ដោយរួមបញ្ជូលរវាងស្ថាបត្យកម្មខ្មែរ និងជំនាន់អាណានិគមបារាំង ដែលគូរប្លង់ដោយស្ថាបត្យករសិង្ហបុរី និងសិល្បករសហសម័យជនជាតិខ្មែរ ។
សណ្ឋាគារ Hyatt Regency Phnom Penh គឺជាសណ្ឋាគារលំដាប់ផ្កាយប្រាំដែលមានបន្ទប់សរុប២៤៧ បន្ទប់ និងមានភោជនីយដ្ឋាន សាលប្រជុំ កន្លែងស្ប៉ា និងស្កាយបារ។
ឧបនាយករដ្ឋមន្ត្រីជា សុផារ៉ា រដ្ឋមន្ត្រីក្រសួងដែនដី នគរូបនីយកម្ម និងសំណង់ ធ្លាប់បានឱ្យដឹងថា ជាមួយការបណ្តាក់ទុនប្រមាណ១០០លានដុល្លារ លើការសាងសង់សណ្ឋាគារលំដាប់ផ្កាយប្រាំ Hyatt នេះ នឹងបង្ហាញជំនឿចិត្តបន្ថែមសម្រាប់ វិនិយោគិនបរទេសដែលមានបំណងមកវិនិយោគនៅកម្ពុជា។
ក្រុមហ៊ុនសណ្ឋាគារ Hyatt មានទីស្នាក់ការកណ្តាល នៅក្នុងរដ្ឋ Chicago សហរដ្ឋអាមេរិក នឹងមានសាខាចំនួន៦៦៧ ក្នុង៥៤ប្រទេស៕
