ដោយវុត្ថា
ភ្នំពេញៈ អ្នកនាំពាក្យក្រសួងសាធារណការ និងដឹកជញ្ជូនបានអះអាងថា កម្ចីសម្រាប់គម្រោងស្តារ និងធ្វើឱ្យប្រសើរឡើងនូវប្រព័ន្ធហេដ្ឋារនាសម្ព័ន្ធ នៅក្នុងប្រទេសត្រូវបានកំណត់នៅក្នុងចន្លោះពី៤០០ ទៅ៥០០លានដុល្លារអាមេរិកក្នុងមួយឆ្នាំ។
លោកវ៉ាស៊ីម សូរិយា អ្នកនាំពាក្យក្រសួងសាធារណការ និងដឹកជញ្ជូនបានប្រាប់គេហទំព័រ Propertyarea.asia កាលពីរសៀលថ្ងៃទី១៥ តុលាកន្លងមកថា នៅក្នុងឆ្នាំនីមួយៗ ក្រសួង តែងតែមានផែនការសម្រាប់អភិវឌ្ឍន៍ស្ថាបនា និងស្តារនូវគម្រោងប្រព័ន្ធហេដ្ឋារនាសម្ព័ន្ធនានានៅក្នុងប្រទេស ដោយបានដាក់ជូនរដ្ឋាភិបាលសម្រេច ក្នុងការស្នើសុំកម្ចីពីប្រទេសជាដៃគូអភិវឌ្ឍន៍។
លោកបន្តថា “ក្នុងមួយឆ្នាំ យើងមានគម្រោងអភិវឌ្ឍន៍ច្រើន ដាក់ជូនរដ្ឋាភិបាលក្នុងការជ្រើសរើស ដោយក្នុងចំណោមនោះ រដ្ឋាភិបាលពិនិត្យមើលលើគម្រោងណាមួយជាអាទិភាពហើយ សម្រាប់ដាក់ស្នើសុំកម្ចី ពីដៃគូអភិវឌ្ឍន៍ ដូចកាលពីពេលថ្មីៗនេះមានគម្រោង៣ត្រូវបានជ្រើសរើសនៅក្នុងឆ្នាំ ២០២០នេះ ហើយបានដាក់ស្នើកម្ចីសាងសង់ពីប្រទេសចិន” ។
លោកបន្ថែមថា សម្រាប់កម្ចីយកមកសាងសង់ហេដ្ឋាហេដ្ឋារចនាសម្ព័ន្ធ យើងអាចមានលទ្ធភាពស្នើសុំកម្ចីដៃគូអភិវឌ្ឍន៍របស់កម្ពុជា ដូចជាប្រទេសចិន អ៊ីចឹងយើងអាចស្នើសុំកម្ចីពី៤០០ ទៅ៥០០ លានដុល្លារអាមេរិកក្នុងមួយឆ្នាំ។
លោកពន្យល់ថា “ការស្នើសុំកម្ចីយកមកសាងសង់ ហេដ្ឋារចនាសម្ព័ន្ធនេះ អាស្រ័យលើសេដ្ឋកិច្ចកម្ពុជាផងដែរ ហើយការកសាងហេដ្ឋារចនសម្ព័ន្ធនេះ ផ្តល់នូវសារៈសំខាន់អ្វីខ្លះដល់់សេដ្ឋកិច្ចក្នុងប្រទេស“ ។ លោកថ្លែងថា“យើងស្នើសុំគេ បើគិតថា សេដ្ឋកិច្ចរបស់យើងមិនល្អក៏គេមិនឲ្យដែរ ហើយយើងបើគ្មានលទ្ធភាពក្នុងការសងគេ ក៏យើងមិនស្នើសុំកម្ចីពីគេដែរ” ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធាណការ និងដឹកជញ្ជូធ្លាប់បានពន្យល់ថា ប្រទេសណាក៏ដោយនៅលើពិភពលោក គឺខ្ចីថវិកាមកកសាងប្រទេសជាតិ។ លោកបន្តថាថា កម្ពុជាក៏មានថវិកានៅក្នុងដៃដែរ ក៏ប៉ុន្ដែថវិកាទាំងនេះចែកទៅក្រសួងនានា ជាពិសេសការកសាងហេដ្ឋារចនាសម្ព័ន្ធ ត្រូវប្រើប្រាស់ថវិកាច្រើន ទើបកម្ពុជាខ្ចីថវិកាពីបរទេស ខណៈកម្ពុជាខ្ចីមានការប្រាក់ទាប។
លោកថ្លែងថា “គ្រប់ប្រទេសទាំងអស់ គេខ្ចីមកពីធនាគារពិភពលោក ខ្ចីពីធនាគារអភិវឌ្ឍន៍អាស៊ី ខ្ចីពី JICA ខ្ចីពីកូរ៉េ ខ្ចីពីចិន មិត្តណាឲ្យយើងខ្ចីថវិកាឲ្យមានការប្រាក់ទាប គឺខ្ចីដើម្បីមកកសាងហេដ្ឋារចនាសម្ព័ន្ធ” ។
លោក ស៊ុន ចាន់ថុលបន្តថា កម្ពុជានៅមានឱកាស និងលទ្ធភាពជាច្រើនសម្រាប់ខ្ចីថវិកាពីបរទេស ដើម្បីកសាងហេដ្ឋារចនាសម្ព័ន្ធបន្ថែមទៀត” ។ លោកបន្ដថា “យើងខ្ចីលុយមែន ប៉ុន្ដែយើងការពារគ្រប់គ្រងប្រាក់កម្ចីនេះបានល្អណាស់ ក្រសួងសេដ្ឋកិច្ច និងហិរញ្ញវត្ថុ លោកគ្រប់គ្រងបានល្អណាស់” ។
លោកបន្ថែមថា សព្វថ្ងៃនេះ អត្រាប្រាក់កម្ចីលើផលិតផល ក្នុងស្រុកសរុបយើងមានតែ២១ភាគរយទេ បើយើងចែកប្រាក់កម្ចីដែលខ្ចីគេនេះ មកចែកផលិតផលស្រុកយើង គឺ២១ភាគរយ ។ លោកបន្ថែមថា អត្រាប្រាក់កម្ចីលើផលិតផល ក្នុងស្រុក២១ភាគរយនេះ គឺនៅទាបណាស់ ដោយសារតែកម្ពុជាខ្ចីថវិកាពីបរទេស មានការប្រយ័ត្នប្រយែងយ៉ាងខ្លាំង មិនចេះតែខ្ចីថវិកាពីបរទេសឡើយ។
លោកបន្ថែមទៀថា “ដូច្នេះការខ្ចីថវិកាពីបរទេសមានសារៈសំខាន់ណាស់ “គេឲ្យខ្ចីហើយ កុំខ្លាចខ្ចី” ប៉ុន្ដែត្រូវគ្រប់គ្រងបំណុលឲ្យបានត្រឹមត្រូវ។លោកថា “ការកសាងហេដ្ឋារចនាសម្ព័ន្ធនៅកម្ពុជា ដើម្បីទាក់ទាញអ្នកវិនិយោគ និងបង្កើតការងារជូនពលរដ្ឋ” ៕
