ដោយវុត្ថា
ភ្នំពេញៈ អ្នកជំនាញអចលនទ្រព្យអន្តរជាតិ លោកស្រីអាន សុធីតានាយិកាប្រចាំប្រទេសនៃក្រុមហ៊ុនCBRE Cambodiaបានថ្លែងថា ផ្នែកចំនួនពីរនៃវិស័យអចលនទ្រព្យ នឹងមានភាពរីកចម្រើនខ្លាំងនៅឆ្នាំ២០២១ខាងមុខនេះ។
លោកស្រីបានមានប្រសាសន៍ឲ្យដឹង នៅក្នុងកិច្ចសម្ភាសជាមួយនឹងគេហទំព័រ propertyarea.asia កាលពីពេលថ្មីៗនេះឱ្យដឹងថា មានវិស័យមួយចំនួននៅក្នុងវិស័យអចលនទ្រព្យនៅក្នុងប្រទេសកម្ពុជា នឹងបន្តទាក់ទាញការវិនិយោគជាតិងអន្តរជាតិ នៅក្នុងឆ្នាំក្រោយនេះ។
លោកស្រីថ្លែងថា “អ្វីដែលខ្ញុំមើលឃើញនៅក្នុងឆ្នាំ២០២១ ខាងមុខនេះ ទីផ្សារលំនៅឋាននឹងមានភាពល្អប្រសើរ បន្ទាប់មក គឺផ្នែកឧស្សាហកម្មដែលភាគច្រើនរងផលប៉ះពាល់ពីបណ្តាប្រទេសផ្សេងៗ ដែលនឹងទាក់ទាញវិនិយោគនៅក្នុងប្រទេសកម្ពុជា”។
លោកស្រីបន្តថា “នៅក្នុងឆ្នាំ២០២១ខាងមុខនេះ ទីផ្សារការិយាល័យ សម្រាប់កម្រិត B និងC នៅតែមានការគាំទ្រពីអតិថិជនជួល និងមួយវិញទៀត គឺទីផ្សារលក់រាយដែលនឹងត្រឡប់ដូចភាពដើមវិញជាបណ្តើរ នៅឆ្នាំក្រោយនេះ ហើយអ្វីដែលទទួលរនូវផប៉ះពាល់ខ្លាំងគឺវិស័យសណ្ឋាគារ”។
វិស័យអចលនទ្រព្យស្ទើរគ្រប់ផ្នែកនៅក្នុងឆ្នាំ ២០២០នេះ បានទទួលរងនូវផលប៉ះពាល់យ៉ាងធ្ងន់ធ្ងរ ពីការរីករាលដាលពីជំងឺកូវីដ ១៩ ប៉ុន្តែ អ្នជំនាញមើលឃើញថាមានវិស័យមួយចំនួននៅក្នុងផ្នែកនេះ នឹងមានសន្ទុះឡើងវិញនៅឆ្នាំ ២០២១ ខាងមុខ។
ទីប្រឹក្សាសមាគមអចលនទ្រព្យសាកល ស្ថាបនិកនិងជាអគ្គនាយកនៃគេហទំព័រPropertyarea.asia លោកយិន លាងគង់ដែលបានតាមដានដំណើរវិវត្តន៍ នៃសេដ្ឋកិច្ច និងអចលនទ្រព្យបានថ្លែងថា គ្រប់ស្ថាប័នហិរញ្ញវត្ថុធំៗលើពិភពលោក សុទ្ឋតែព្យាករណ៍ពីសន្ទុះនៃការងើបឡើងវិញ នៃសេដ្ឋកិច្ចកម្ពុជានៅឆ្នាំ២០២១ ហើយរដ្ឋាភិបាលបានព្យាករណ៍ផងដែរថា សេដ្ឋកិច្ចកម្ពុជានឹងងើបឡើង៣,៥ភាគរយ ដែលជាសញ្ញាវិជ្ជមានសំរាប់វិស័យនេះ។
លោកបន្តថា “ស្ទើរគ្រប់ផ្នែកនៃវិស័យអចលនទ្រព្យ នឹងមានការរីកចម្រើន ដោយសារសកម្មភាពសេដ្ឋកិច្ចកម្ពុជា ចាប់ផ្តើមវិលមករកភាពប្រក្រតីវិញដែលនេះជាការប្រមើលមើលរបស់ធនាគារពិភពលោក”។លោកបន្តថា “ការចាប់ផ្តើមអនុវត្តន៍កិច្ចព្រមព្រៀងពាណិជ្ជកម្មសេរីជាមួយប្រទេសចិន(FTA)កម្ពុជានឹងទទួលបានផលចំណេញច្រើនពីកាលានុវត្តន៍ភាពមាសនេះ ពិសេសកម្ពុជាបាននិងកំពុងធ្វើពិពិធកម្ម ទីផ្សាររបស់ខ្លួនកាន់តែទូលំទូលាយក្នុងក្របខ័ណ្ឌតំបន់ និងពិភពលោក”។
លោកយិន លាងគង់បានបន្តថា ភាពអំណោយផលនៃសេដ្ឋកិច្ច ការកសាងបទ ដ្ឋានគតិយុត្តិរបស់រដ្ឋាភិបាល ដែលទទួលសម្រួលនិងលើកទឹកចិត្តអ្នកវិនិយោគ ពិសេសការពង្រីកការសាងសង់ ហេដ្ឋារចនាសម្ព័ន្ឋនឹងជួយឲ្យវិស័យនេះ មានភាពរីកចម្រើនកាន់តែលឿនថែមទៀតនាពេលអនាគត៕
