ដោយៈ រ៉ាណេត
ភ្នំពេញៈ មិនថាចំពោះតែការវិនិយោគឬការអភិវឌ្ឍន៍នោះទេជាគោលដៅរួមគឺសុទ្ធតែធ្វើឡើងដើម្បីទទួលបានប្រាក់ចំណេញប៉ុន្តែអ្វីដែលជាបញ្ហានិងត្រូវពិចារណានោះឱ្យបានគ្រប់ជ្រុងជ្រោយនោះគឺលំហូរសាច់ប្រាក់ដែលជាទុនដំបូងជៀសវាងសំអាងតែទៅលើទុនកម្ចីពីធនាគារដែលប្រឈមទៅនឹងហានិភ័យខ្ពស់បំផុត។
ប្រធាន KW Cambodia លោកឧកញ៉ាបណ្ឌិត គីម ហ៊ាង បានមានប្រសាសន៍កាលពីថ្ងៃចុងសប្ដាហ៍កន្លងទៅនេះថាគ្រប់ការវិនិយោគនិងអភិវឌ្ឍន៍ទាំងអស់គឺត្រូវតែមានផែនការនិងទីផ្សារគោលដៅច្បាស់លាស់ហើយអ្វីដែលរឹតតែសំខាន់បវំផុតមិនអាចខ្វះបាននោះគឺត្រូវតែមានដើមទុនគ្រប់គ្រាន់យ៉ាងហោចណាស់៧០ភាគរយនៃតម្លៃថ្លៃដើមសរុបជៀសវាងការពឹងអាស្រ័យតែទៅលើកម្ចីពីធនាគារ។
លោកឧកញ៉ាបានបញ្ជាក់ថា “មុនពេលសម្រេចចិត្តវិនិយោគ ឬធ្វើការអភិវឌ្ឍន៍អ្វីមួយ មិនថាចំពោះដីឡូតិ៍ ខុនដូ ឬលំនៅដ្ឋាននោះទេ អ្វីដែលត្រូវគិតគឺដើមទុនដែលអាចធានាបានថាមិនមានហានិភ័យកើតឡើង ដែលវាមិនមែនជាកម្ចីពីធនាគារសុទ្ធនោះទេ”។
លោកឧកញ៉ាគីមហ៊ាងបានបន្តថាសម្រាប់ការវិនិយោគគឺជាការទិញថោកហើយលក់ថ្លៃប៉ុន្តែអ្វីត្រូវចង់ចាំគឺយ៉ាងហោចណាស់មានទុនផ្ទាល់យ៉ាងហោចណាស់៧០ភាគរយមានន័យថាមិនគួរខ្ចីទុនបន្ថែមពីធនាគារលើសពី៣០ភាគរយនៃតម្លៃសរុបនោះទេ។ទិញអចលនវត្ថុតម្លៃ១លានដុល្លារត្រូវមាន៧០ម៉ឺនហើយខ្ចីធនាគារបន្ថែមត្រឹម៣០ម៉ឺនដុល្លារបង្គ្រប់។មិនត្រូវខ្ចីពីធនាគារមកធ្វើជាដើមទុនទិញអចលនវត្ថុច្រើនជាងតម្លៃសរុបពាក់កណ្តាលនោះទេ។
លោកបន្តថា“ការប្រាក់កម្ចីពីធនាគារមិនបានគិតពីថ្ងៃសៅរ៍ ឬអាទិត្យនោះទេ ដូច្នេះដើម្បីឱ្យការវិនិយោគចៀសផុតពីបញ្ហាប្រឈម គឺមិនត្រូវខ្ចីទុនបន្ថែមពីធនាគារលើសពី៣០ភាគរយនៃតម្លៃសរុបនោះទេ”។
អ្នកជំនាញអចលនទ្រព្យរូបនេះបានមានប្រសាសន៍ទៀតថាដោយឡែកសម្រាប់អ្នកអភិវឌ្ឍន៍ក៏មានរូបមន្តនិងវិធីសាស្ត្រដូចគ្នាផងដែរ។អ្នកខ្លះចង់អភិវឌ្ឍន៍ដីឡូតិ៍ខុនដូបុរីដូចគ្នាខ្ញុំឱ្យជាយោបល់ថាក្បួនទី១លុយទិញដីសម្រាប់គម្រោងអភិវឌ្ឍន៍គឺត្រូវតែមានគ្រប់។នៅដែលការអភិវឌ្ឍត្រូវបានធ្វើឡើងដោយពឹងផ្អែកទាំងស្រុងទៅលើកម្ចីពីធនាគារឬការទទួលបានចំណូលពីការលក់ខណៈដែលដែលតម្លៃដីមិនទាន់បង់ប្រាក់ឱ្យម្ចាស់ដើមគ្រប់គ្រាន់ផងនោះការប្រាក់របស់ធនាគារនឹងរឹតចំណងពួកគាត់ដែលជាម្ចាស់គម្រោងជាក់ជាមិនខានហើយដំណើរការនៅការអភិវឌ្ឍគម្រោងក៏នឹងត្រូវជួបបញ្ហាយ៉ាងប្រាកដ។
លោកបន្តថា “ការអភិវឌ្ឍប្រកបដោយនិរន្តរភាព និងជោគជ័យ គឺលុយទិញដីត្រូវតែមានគ្រប់គ្រាន់ លុយសម្រាប់អភិវឌ្ឍន៍ ឬសាងសង់សំណង់យ៉ាងហោចណាស់ក៏ត្រូវបានតិចបំផុត៣០ភាគរយនៃទុនសាងសង់សរុប”។ លោកបន្ថែមថា “រូបមន្តនេះ អាចមានប្រសិទ្ធភាពទាំងគម្រោងអភិវឌ្ឍន៍ដីឡូតិ៍ គម្រោងអភិវឌ្ឍន៍ខុនដូ ក៏ដូចជាគម្រោងអភិវឌ្ឍន៍បុរីលំនៅដ្ឋាន”។
ជាមួយនឹងការបង្ហើបប្រាប់ពីយុទ្ធសាស្ត្រ ក៏ដូចជា គន្លឹះសម្រាប់ការវិនិយោគក្នុងវិស័យដីធ្លី ក៏ដូចជាការអភិវឌ្ឍគម្រោងនានា លោកឧកញ៉ាបានបញ្ជាកថា គម្រោងអភិវឌ្ឍន៍មួយចំនួន ដែលមានភាពជាប់គាំងកាលពីពេលកន្លងទៅ អាចកើតមានដោយសារការអនុវត្តគម្រោងត្រូវបានធ្វើឡើងតាមគ្នា ទាំងដែលខ្លួនជាម្ចាស់គម្រោងមិនមានជំនាញច្បាស់ហើយធ្វើតាមគេ។
ដោយឡែកភាពបរាជ័យ ទៅលើគម្រោងវិនិយោគមួយចំនួន អាចធ្វើឡើងដោយភាពប្រថុយប្រថាន ឬពឹងអាស្រ័យទុន ស្ទើរតែទាំងស្រុងទៅលើកម្ចីធនាគារ។ ដូច្នេះការចែករំលែកខាងលើនេះ អាចជាជំនួយស្មារតីខ្លះៗសម្រាប់អ្នកដែលមានបំណង់ចង់ប្រឡូកនៅក្នុងវិស័យមួយនេះ៕
