ដោយ គង់ សូរិយា
ភ្នំពេញៈ មជ្ឈមណ្ឌលពាណិជ្ជកម្ម TCC Triumph ដែលគ្រោងវិនិយោគទឹកប្រាក់រហូតដល់ប្រមាណ១០០០លានដុល្លារបាន ទំនងជាពន្យាពេលបើកដំណើរការ ខណៈផ្សារនេះបានកែប្រែនូវការៀបចំនូវអាគាររបស់ខ្លួន។
គំរោងនេះត្រូវបានវិនិយោគ ដោយក្រុមហ៊ុនYunNanShengMao Investment (Cambodia) Co., Ltd ។ គម្រោងនេះដើមឡើយ គ្រោងនឹងបញ្ចប់នៅចុងឆ្នាំ ២០២០នេះ។ មជ្ឈមណ្ឌលពាណិជ្ជកម្មនេះ រួមបញ្ចូលនូវអាគារលក់ទំនិញចំនួន៤ ដែលអគារនីមួយៗមានកម្ពស់៤ជាន់ ដែលបានចាប់ផ្តើមសាងសង់កាលពីចុងឆ្នាំមុន និងគ្រោងបញ្ចប់នៅចុងឆ្នាំ២០១៩ នេះ ខណៈដំណាក់កាលទី២នឹងសាងសង់នៅចុងឆ្នាំនេះផងដែរ។
អ្នកគ្រប់គ្រងផ្នែកលក់របស់ TCC Triumph លោកហាក់ យ៉ារិទ្ឋធ្លាប់បានមានប្រសាសន៍ឲ្យដឹងថា គំរោងដំណាក់កាលទី១នេះ យើងកំពុងមានក្តីសង្ឃឹមថា នឹងអាចបើកដំណើរការបាននៅដើមឆ្នាំ២០២០ ហើយនៅពេលសាងសង់រួច នឹងមានផលិតផលជាង១០ម៉ឺន មុខសំរាប់លក់នៅក្នុងមជ្ឈមណ្ឌលនេះ។
មជ្ឈមណ្ឌលពាណិជ្ជកម្មTCC Triumph វិនិយោគលើផ្ទៃដីទំហំជាង៩ហិកតា ស្ថិតក្នុងខណ្ឌឫស្សីកែវ រាជធានីភ្នំពេញ។
អ្នកជំនាញមួយរូប នៃសមាគមអ្នកជំនាញអចលនទ្រព្យកម្ពុជា បានមានប្រសាសន៍ថា ការកើនឡើងនូវមជ្ឈមណ្ឌលពាណិជ្ជកម្ម និងហាងលក់ទំនិញធំៗនៅរាជធានីភ្នំពេញ ឆ្លុះបញ្ចាំងពីការរីកចម្រើនសេដ្ឋកិច្ចកម្ពុជា ពិសេសប្រាក់ចំណូលរបស់ប្រជាពលរដ្ឋកើនឡើង។លោកបន្តថា អ្នកវិនិយោគគំរោងធំៗបែបនេះ ពួកគេសិក្សាពីទីផ្សារច្បាស់លាស់ណាស់ មុនពួកគេសម្រេចចិត្តវិនិយោគលើគំរោងអ្វីមួយ។
លោកបន្តថា “កំនើនប្រាក់ចំណូលរបស់ប្រជាពលរដ្ឋ ជាអំណាចនៃការទិញ ព្រោះពេលប្រជាពលរដ្ឋមានប្រាក់ចំណូលកើនឡើង អំណាចនៃការទិញនឹងកើនឡើងជាស្វ័យប្រវត្តិ”៕
