ដោយ ហ្សូលី
ភ្នំពេញៈ ថ្វីត្បិតតែវិស័យអចលនទ្រព្យ បានបន្តទទួលរងនូវឥទ្ធិពលពីវិបត្តិសកល ប៉ុន្តែតម្លៃអចលនទ្រព្យ មិនទាន់មានការធ្លាក់ចុះ ឬចោទជាបញ្ហាប្រឈមធ្ងន់ធ្ងរ ដូចកាលពីផ្ទុះជំងឺរាតត្បាតដំបូងនៅដើមឆ្នាំ២០២០នោះឡើយ។
អគ្គនាយកក្រុមហ៊ុន UTrust និងជាប្រធានសមាគមអ្នកអភិវឌ្ឍដីឡូតិ៍លោកម៉ន សុខា បានមានប្រសាសន៍ប្រាប់គេហទំព័រ Propertyarea.asia កាលពីថ្ងៃទី១៣ វិច្ឆិកាកន្លងមកថា កម្ពុជាពិតជារងផលប៉ះពាល់ពីឥទ្ធិពលសកលនេះមែន ក៏ប៉ុន្តែបើក្រឡេកទៅមើលការលក់អចលនទ្រព្យ ជាក់ស្តែងទីផ្សារដីឡូតិ៍ផ្ទាល់ នៅតែបន្តមានចរន្តយ៉ាងសកម្ម ដោ យសារតែអតិថិជនសង្កេតឃើញពីឱកាសល្អពីក្នុងវិបត្តិ។
លោកបន្តថា “អតិថិជនដែលមករកទិញអចលនទ្រព្យ ក្នុងអំឡុងពេលនេះ ភាគច្រើនជាអតិថិជនពិតប្រាកដ មិនមែនជាអតិថិជនសួរចោលនោះទេ” ។
ទន្ទឹមនឹងនេះ លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងប្រាប់ថា ការអភិវឌ្ឍន៍ សំណង់លំនៅឋាន បុរី ខុនដូនានា ឃើញថា មានក្រុមហ៊ុនជាច្រើនកំពុងជួបបញ្ហាប្រឈមដូចជា ការបាត់បង់ អតិថិជន ជាពិសេសការបាត់បង់ឱកាសប្រាក់ចំណូលជាដើម ទោះជាយ៉ាងណាអ្នកប្រកបរកស៊ីមុខរបរទាំងនោះ នៅតែបន្តលើអាជីវកម្មរបស់ខ្លួន។
អ្នកជំនាញអចលនទ្រព្យរូបនេះថ្លែងថា តម្លៃទិញ-លក់អចលនទ្រព្យនៅកម្ពុជាមិនទាន់មានធ្លាក់ចុះឡើយ ពោលគឺនៅឈរទ្រឹង ខណៈដែលអ្នករកស៊ីនៅតែបន្តទៅតាមយុទ្ធសាស្ត្ររបស់ខ្លួន ទោះបីស្ថានភាពនៃផលប៉ះពាល់នៅ អូសបន្លាយក៏ដោយ។
ចំពោះក្រុមហ៊ុនអភិវឌ្ឍន៍ផ្ទះល្វែង បុរីតូចតាចនានា បច្ចុប្បន្ននៅតែបន្តទៅតាមយុទ្ធសាស្ត្រគឺនៅពង្រីកតាមតំបន់ អភិវឌ្ឍន៍របស់ខ្លួនតិចតួចប៉ុណ្ណោះ ចំណែកការអភិវឌ្ឍន៍គម្រោងធំៗវិញ មកដល់បច្ចុប្បន្នគម្រោងសាងសង់ដូចជា បុរី ខុនដូ នៅតែបន្តការសាងសង់គម្រោងអភិវឌ្ឍន៍ជាធម្មតា៕
