តើ​រាជធានី​ភ្នំពេញ​នឹង​បន្ត​ពង្រីក​បន្ថែមទៀត​នាពេល​អនាគត ដោយសារ​អ្វី?

1

ដោយ​គង់ សូរិយា

ភ្នំពេញៈ រាជធានី​ភ្នំពេញ​បេះដូង​នៃ​ប្រទេស​កម្ពុជា បាន​រីក​ធំ​ជា​បន្តបន្ទាប់​ដោយសារ​ការរីកចម្រើន​របស់​ប្រទេស ការរីកចម្រើន​សេដ្ឋកិច្ច កំនើន​ប្រជាពលរដ្ឋ និង​ការកកស្ទះ​ចរាចរណ៍​កើនឡើង។

តើ​ទីក្រុង​នេះ​បន្ត​រីកចម្រើន​តទៅទៀត​ឬ​យ៉ាងណា? នាពេល​អនាគត និង​ដោយសារ​ហេតុផល​អ្វី?។

យោងតាម​របាយការណ៍​របស់​រដ្ឋបាល រាជធានី​ភ្នំពេញ​បាន​បង្ហាញថា នៅ​ឆ្នាំ២០២០រាជធានី​ភ្នំពេញ មាន​ផ្ទៃដី​សរុប៦៩២,៤៦ គីឡូម៉ែត្រ​ការ៉េ ចំនួន​ខណ្ឌ១៤ ចំនួន​សង្កាត់១០។ ចំនួន​គ្រួសារ៣៩៩.២០៣ ចំនួន​ប្រជាពលរដ្ឋ​សរុប២.២៨១.៩៥១នាក់ និង​នៅ​ឆ្នាំ២០២១នេះ រាជធានី​ភ្នំពេញ អាចមាន​កំណើន​ផ្ទៃដី​ដល់​ទៅ ៦៩៥,៤៦ គីឡូម៉ែត្រ​ការ៉េ ប្រជាពលរដ្ឋ​ក៏មាន​ការកើនឡើង​ទៅតាម​នោះដែរ។

បើ​យោងតាម​ព្រះរាជក្រឹត្យ​របស់​ចុះ​ថ្ងៃទី២២ ខែតុលា ឆ្នាំ២០២០របស់​ព្រះមហាក្សត្រ​បាន​ត្រាស់បង្គាប់​ក្នុង​មាត្រា១ ត្រូវបាន​កែសម្រួល​ព្រំប្រទល់​រដ្ឋបាល រវាង​រាជធានី​ភ្នំពេញ និង​ខេត្តកណ្តាល ដោយ​កាត់​យក​ភូមិ​ចំនួន៥គឺ ភូមិ​ស្ទឹង​ជ្រៅ និង​ភូមិ​ព្រែក​តា​ពៅ នៃ​សង្កាត់​ដើម​មៀន ភូមិ​ព្រែក​អញ្ចាញ នៃ​សង្កាត់​ព្រែក​ឫស្សី ភូមិ​ព្រែ​កឡុង នៃ​សង្កាត់​តា ក្តុល និង​ភូមិប​ត្តា​ជី នៃ​សង្កាត់​ព្រែក​ហូរ ដែលមាន​ផ្ទៃដី​ទំហំ ៣០២ហិកតា ៩៣៩១ម៉ែត្រការ៉េ ពី​ក្រុង​តាខ្មៅ​ខេត្តកណ្តាល មកឱ្យ​ស្ថិតក្រោម​ការគ្រប់គ្រងរ​បស់​សង្កាត់​ជើងឯក ខណ្ឌដង្កោ រាជធានី​ភ្នំពេញ និង​កាត់​យក​ផ្ទៃដី​ទំហំ ២ហិកតា៥១៥៥ម៉ែត្រការ៉េ(ចំណែក​ដី​នៃ​វត្ត​បុ​ទុម​សាគរ ហៅ​វត្ត​ទួល​តា​ក្របៅ) ពី​សង្កាត់​ចាក់អង្រែ​ក្រោម ខណ្ឌមានជ័យ រាជធានី​ភ្នំពេញ ឱ្យមក​ស្ថិតក្រោម​ការគ្រប់គ្រងរ​បស់​សង្កាត់​ដើម​មៀន ក្រុង​តាខ្មៅ ខេត្តកណ្តាល។

បើ​យោងតាម​ព្រះរាជក្រឹត្យ របស់​ព្រះមហាក្សត្រ​ខាងលើនេះ រាជធានី​ភ្នំពេញ អាចមាន​កំណើន​ផ្ទៃដី​កើនឡើង​បន្ថែមទៀត ព្រោះ​បាន​កាត់​ផ្ទៃដី​ពី​ខេត្តកណ្តាល និង​កាត់​ខ្លះ​ពី​រាជធានី​ភ្នំពេញ​ទៅឱ្យ​ខេត្តកណ្តាល​វិញ ដូចនេះ​អាច​កើន​ដល់៦៩៥,៤៦៤ គីឡូម៉ែត្រ​ការ៉េ ។

យោងតាម​ប្រភពពី​មន្ត្រី​ក្រសួង​សាធារណៈការ និង​ដឹកជញ្ជូន​បាន​បង្ហើប​ឲ្យ​ដឹង​កាលពីពេលថ្មីៗនេះ​ថា រដ្ឋាភិបាល​នឹង​កាត់​តំបន់​មួយចំនួន ស្ថិតនៅក្នុង​តំបន់​គំរោង​ផ្លូវ​ក្រវ៉ាត់​ក្រុង​ទី៤ នឹងត្រូវ​កាត់​បញ្ចូល​ក្នុង​ដែន​រដ្ឋបាល​រាជធានី​ភ្នំពេញ ខណៈ​មានការ​បញ្ជាក់​ពី​មន្ត្រីរដ្ឋបាល​រាជធានី​ភ្នំពេញ ដែល​បាន​និយាយ​ក្នុង​លក្ខ​ខ័​ណ្ឌ​មិន​បញ្ចេញ​ឈ្មោះ​បាន​ឲ្យ​ដឹងថា រដ្ឋាភិបាល​នឹង​ពង្រីក​ទីក្រុង​នេះ​ថែមទៀត​នៅ​ឆ្នាំ២០២៥ខាងមុខ ខណៈដែល​ទីក្រុង​នេះ​កំពុងមាន​ភាព​រីកចម្រើន។

ទីប្រឹក្សា​សមាគម​អចលនទ្រព្យ​សកល ជា​ស្ថាបនិក និង​អគ្គនាយក​គេហទំព័រ​ Propertyarea.asia ដែល​បាន​តាមដាន​ដំណើរ​វិវត្តន៍៍​សេដ្ឋកិច្ច សង្គម​ជាប្រចាំ​បាន​មានប្រសាសន៍ថា ការពង្រីក​ទីក្រុង​ភ្នំពេញ មិនមែន​ដោយសារ​កត្តា​ខាងលើ​ទាំងអស់​នោះទេ ប៉ុន្តែ​ការពង្រីក​ទីក្រុង វា​នឹងធ្វើ​ឲ្យ​សេដ្ឋកិច្ច​ប្រជាពលរដ្ឋ​នៅ​មូលដ្ឋាន មានការ​រីកចម្រើន​លឿន​ជាង​រដ្ឋបាល​ដែល​ស្ថិតនៅក្នុង​ដែនដី​របស់​ខេត្ត​ណាមួយ។

លោក​បន្តថា “នៅពេល​ទីក្រុង​រីក​ទៅដល់​ណា ការវិនិយោគ​នឹង​ទៅដល់​ទីនោះ មានន័យថា​លំហូរ​សាច់ប្រាក់ នឹង​បាន​ដល់ដៃ​ប្រជាពលរដ្ឋ​ផ្ទាល់ ពិសេស​ប្រជាពលរដ្ឋ​នឹង​ឆាប់​ទទួលបាន​ផលប្រយោជន៍ ពី​ការអភិវឌ្ឍ​របស់​វិស័យ​ឯកជន និង​រដ្ឋាភិបាល” ៕

1 COMMENT

  1. តើ​រាជធានី​ភ្នំពេញ​នឹង​បន្ត​ពង្រីក​បន្ថែមទៀត​នាពេល​អនាគត ដោយសារ​អ្វី?
    អត្ថបទខាងលើ ត្រង់ស្ថិតិចំនួនសង្កាត់នៅភ្នំពេញ ដែលដាក់សង្កាត់១០ ប្រហែលវាយបាត់លេខ៥។ ខ្ញុំគិតថា សង្កាត់ ១០៥ បើតាម website របស់សាលារាជធានីភ្នំពេញ។

    សូមអរគុណ។

LEAVE A REPLY

Please enter your comment!
Please enter your name here