ដោយ ដែន ចែងចាំង
ភ្នំពេញ៖ តំបន់ស្ថិតនៅតាមបណ្តោយផ្លូវវេងស្រេង មិនស្ថិតនៅជាតំបន់ឧស្សាហកម្មតែមួយនោះទៀតទេ ប៉ុន្តែតំបន់នេះបាននិងកំពុងក្លាយជាតំបន់លំនៅដ្ឋាន និងមជ្ឈមណ្ឌលពាណិជ្ជកម្មដ៏រសរវើកមួយនាពេលអនាគត។
ក្រុមហ៊ុនអចលនទ្រព្យដ៏ធំមួយទៀត Yuetai Group បាននិងកំពុងចាប់ផ្តើមគំរោងយក្សមួយទៀត តាមរយៈការសាងសង់អាគារកប់ពពកចំនួន៨ ដែលបោះទុនវិនិយោគរាប់រយលានដុល្លារអាមេរិក។
យោងតាមប្រភពព៌តមានពីក្រុមហ៊ុននេះបានឲ្យដឹងថា ក្រុមហ៊ុន Yuetai Group កំពុងអភិវឌ្ឈន៍គំរោងមួយទៀតឈ្មោះ Yuetai The Garden ដែលផ្តល់ជូនលំនៅដ្ឋាន និងអាជីវកម្មប្រកបដោយភាពឆ្លាតវៃ (Smart Home) ដំបូងគេនៅក្នុងរាជធានីភ្នំពេញ ជាមួយនឹងយូនីតខុនដូប្រណិត ដែលមានទំហំចាប់ពី៣៥ម៉ែត្រការ៉េទៅ៦៤ម៉ែត្រការ៉េ បន្ទាប់ពីក្រុមហ៊ុននេះ បានអភិវឌ្ឍន៍គម្រោងចំនួនពីរគឺគម្រោង EAST ONE និងគំរោង EAST VIEW SOHO ដែលជាគម្រោងខុនដូ ការិយាល័យពាណិជ្ជកម្ម និងលំនៅដ្ឋាននៅក្នុងទីក្រុង ហើយគម្រោងទាំងនេះ បានទាក់ទាញកំណើនវិនិយោគទុនពីតៃវ៉ាន់ សិង្ហបុរី ហុងកុងព្រមទាំងចិនដីគោកជាច្រើន។
គម្រោង Yuetai The Garden មានទីតាំងនៅតាមបណ្តោយផ្លូវវេងស្រេង (តំបន់មួយដែលគេស្គាល់ថាផ្លូវលូប្រាំ) ជិតវិមានសុភមង្គល និងមានទីតាំងនៅជិតព្រលានយន្តហោះភ្នំពេញ។
ប្រភពព៌តមានដដែលបានឲ្យដឹងថា លំនៅដ្ឋាន Yuetai The Garden របស់ហ៊ុន Yuetai Group រចនាឡើងជាមួយរចនាបទបែបទំនើបរួមជាមួយសេវាកម្ម និងបរិក្ខារប្រណីតៗដូចជា កន្លែងពាណិជ្ជកម្ម អាងហែលទឹក ចំណតរថយន្ត កន្លែងកម្សាន្តតំបន់បៃតងដែលនៅតាមផ្លូវមានអមដោយដើមឈើ រួមជាមួយសំណង់នានាដើម្បីបង្កើតទៅជាលំនៅដ្ឋានដ៏ឆ្លាតវៃ។
លើសពីនេះទៀតក្រុមហ៊ុន បានធ្វើការយ៉ាងសកម្មក្នុងសកម្មភាពអប់រំ និងការប ណ្តុះបណ្តាល និងសេវាកម្មឧស្សាហកម្មទេសចរណ៍ វប្បធម៌ ដើម្បីជួយបង្កើនកម្រិតជីវភាពរស់នៅរបស់ប្រជាជនសកម្ពុជា។
ក្រុមហ៊ុននេះបានចូលមកកាន់រាជធានីភ្នំពេញ នៅក្នុងឆ្នាំ២០១១ក្រុមហ៊ុន Yuetai Group កំណត់យកយកទីក្រុងនេះ ជាតំបន់គោលដៅវិនិយោគក្រៅប្រទេសរបស់ខ្លួនដោយបានបង្កើតជាក្រុមហ៊ុនបុត្រសម្ព័ន្ធ១នៅកម្ពុជាឈ្មោះ Eastland Development, Co,Ltd និងបានសហការគ្នាររវាងក្រុមហ៊ុន Guangdong-Thai Property Management Co., Ltd និងក្រុមហ៊ុនរបស់កម្ពុជា។
អគ្គនាយកក្រុមហ៊ុន Century21 Mekongលោកច្រឹក សុខនីមបានថ្លែងថា ទោះ ជាគំរោងនេះស្ថិតនៅតំបន់ជាយក្រុងបន្តិចមែន ប៉ុន្តែវាជាតំបន់មានសក្តានុពលខ្លាំងនាពេលអនាគត ព្រោះបច្ចុប្បន្នមានបុរីជាច្រើនបានកើតមាននៅតំបន់នេះរួចហើយ ហេតុនេះទីផ្សារតំបន់នេះគួរផ្តោតលើអ្នកមានជីវភាពមធ្យម ខណៈរោងចក្រ សហគ្រាសនៅតំបន់នេះនឹងជាមូលដ្ឋានរយៈពេលខ្លីប៉ុណ្ណោះ។លោកបន្តថា តំបន់ពាណិជ្ជកម្ម លំនៅដ្ឋាន និងឧស្សាហកម្មបានធ្វើឲ្យតំបន់នេះទាក់ទាញការងារកាន់តែច្រើន។
លោកបន្តថា “ធម្មតាគំរោងធំបែបនេះ ខ្ញុំគិតថាអ្នកវិនិយោគពួកគេមានអតិថិជនក្នុងដៃស្រាប់ទៅហើយ ពួកគេនាំអ្នកវិនិយោគថ្មីៗច្រើន មុនពេលនិន្នាការប្រជាជនក្នុងស្រុកចាប់ផ្តើមទទួលយកសេវាកម្មស្នាក់នៅតាមខុនដូកាន់តែច្រើន”៕
