ដោយៈសុខុម
ក្រុងអាប៊ូដាប៊ី: អគារដែលមានរចនាប័ទ្មចម្លែកខុសគេ ជាប៉មសូឡារាងដូចស្លាបបក្សីចំនួន៥នេះ គឺជាសារមន្ទីរជាតិ Zayed National Museum នៅក្នុងទីក្រុងអាប៊ូដាប៊ី ប្រទេសអារ៉ាប់ប៊ីរួមអេមីរ៉ាត ហើយអាចចាត់ទុកជាសំណង់ស្ថាបត្យកម្មដ៏អស្ចារ្យមួយ។
រចនាប័ទ្មនៃអគារសារមន្ទីរនេះ គឺពិតជាវិសេសវិសាលខ្លាំងណាស់ ព្រោះវាត្រូវបានឌីហ្សាញឡើងយ៉ាងសម្រិតសម្រាំង ដើម្បីឱ្យខ្យល់ត្រជាក់អាចចេញ ចូលពេញសារមន្ទីរគ្រប់រដូវកាល។
សារមន្ទីរដែលត្រូវបានគូរប្លង់ ដោយស្ថាបត្យករឈ្នះពានរង្វាន់ Pritzker Prize ឈ្មោះ Lord Norma មកពីក្រុមហ៊ុនស្ថាបត្យកម្មអង់គ្លេស Foster + Partners នេះត្រូវបានសាងសង់ឡើង ដើម្បីឧទ្ទិសជូនដល់សពមេដឹកនាំ Zayed bin Sultan Al Nahyan ដែលជាបិតាស្ថាបនិក និងជាប្រធានាធិបតីដំបូងបង្អស់នៃប្រទេសអារ៉ាប់រួមអេមីរ៉ាត។
សារមន្ទីរនេះ ជាចំណុចទាក់ទាញបំផុត ក្នុងសង្កាត់វប្បធម៌នៅលើកោះ Saadiyat Island ដែលស្ថិតនៅចម្ងាយប្រមាណ៥០០ម៉ែត្រ ពីឆ្នេរក្រុងអាប៊ូដាប៊ី ដោយប្រវត្តិសាស្ត្រ វប្បធម៌ និងការប្រែក្លាយសេដ្ឋកិច្ចរបស់ប្រទេសអារ៉ាប់រួមអេមីរ៉ាត ត្រូវបានដាក់តាំងបង្ហាញក្នុងសារមន្ទីរនេះ។
បច្ចុប្បន្នសារមន្ទីរនេះ កំពុងស្ថិតក្រោមដំណើរការសាងសង់នៅឡើយ ហើយទោះបីជាកាលបរិច្ឆេទផ្លូវការអំពីការ សម្ពោធដាក់ឱ្យប្រើប្រាស់មិនទាន់ប្រកាសក្ដី ក៏គេរំពឹងថាវានឹងត្រូវបើកសម្ពោធនៅក្នុងឆ្នាំ២០២១ នេះ។
ទោះជាយ៉ាងណា គ្មានព័ត៌មានលម្អិតផ្សេងទៀតអំពីអគារសារៈមន្ទីរនេះឡើយ៕
