ដោយៈ គង់ សូរិយា

    ត្បូងឃ្មុំៈ នាយឧត្តមសេនីយ៍ ទៀ សីហា ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ បានអះអាងថា ភាគីថៃបានបំពានកម្ពុជា និងបំពានលើអនុស្សារណៈ នៃការយោគយល់គ្នា ឆ្នាំ២០០០ (MoU 2000) ចំនួន៦៩៥ករណីមកហើយ ក្នុងនោះរាប់ទាំងការធ្វើផ្លូវ និងល្បាតតាមព្រំដែន។

ក្នុងឱកាសអញ្ជើញជាអធិបតី ក្នុងពិធីអបអរសាទរខួបអនុស្សាវរីយ៍លើកទី៤៨ ទិវានៃការចងចាំដំណើរឆ្ពោះ ទៅផ្តួលរំលំរបបប្រល័យពូជសាសន៍ ប៉ុល ពត និងខួបលើកទី៤៧ ថ្ងៃបង្កើតកងកម្លាំងប្រដាប់អាវុធសាមគ្គីសង្រ្គោះជាតិកម្ពុជា នាព្រឹកថ្ងៃទី២០ សីហានេះ នាយឧត្តមសេនីយ៍ ទៀ សីហា បានសង្កត់ធ្ងន់ថា ការបំពាន MoU ឆ្នាំ២០០០ គឺថៃជាអ្នកបំពានលើសពីកម្ពុជាដាច់តែម្តង។

នាយឧត្តមសនីយ៍បានបញ្ជាក់ថា “យើងបានចងក្រង យើងមានឯកសារ ភស្ដុតាងទាំងអស់ ថៃបានឈ្លានពាន ឬមិនគោរពនូវMoU ឆ្នាំ២០០០”។ លោកបន្ថែមថា “យើងសរុបមកជាបណ្ដោះអាសន្ន មានចំនួន៦៩៥ករណី ដែលបំពានទៅលើMoU ឆ្នាំ២០០០ ហើយនៅមានការធ្វើផ្លូវ និងល្បាតដោយមិនជូនដំណឹងមកភាគីកម្ពុជា”។

ឧបនាយករដ្ឋមន្ដ្រី ទៀ សីហាបានបន្តថា វាជារឿងគួរឲ្យអស់សំណើចដែលក្នុងកិច្ចប្រជុំJBC កន្លងទៅភាគីថៃ បានចោទប្រកាន់កម្ពុជាថា បំពានMoU ឆ្នាំ២០០០។ អ្វីដែលថៃចោទកម្ពុជាបំពាននោះ ដូចជាការធ្វើស្រែលើសព្រំដែន និងឡើងច្រៀងលើប្រាសាទតាមាន់ជាដើម ខណៈថៃខ្លួនឯងបំពានកម្ពុជាដាច់តែម្ដង។

ឧបនាយករដ្ឋមន្ដ្រី ទៀ សីហា បានបន្ថែមទៀតថា “ភាគីថៃតែងទាមទារចង់បានសន្ដិភាព និងមិនចង់មានបញ្ហាជាមួយកម្ពុជា ព្រមទាំងបានចាត់ទុកថា ការដាក់ទ័ពរបស់គេមកព្រំដែនដើម្បីការពារ”។ លោកបន្តថា “ដូច្នេះកម្ពុជាពង្រាយកម្លាំងទ័ព ក៏ដើម្បីការពារបូរណភាពទឹកដី និងអធិបតេយ្យភាពដូចគ្នា”៕

ដោយៈ គង់ សូរិយា

    ភ្នំពេញៈ សម្តេចតេជោហ៊ុន សែនប្រធានព្រឹទ្ឋសភាកម្ពុជា បានចូលរួមអបអរសាទរ ជាមួយព្រះតេជគុណឪស៊ុច ដែលត្រូវបាននាយករដ្ឋមន្ត្រី ហ៊ុន ម៉ាណែត ស្វាគមន៍ទទួលយកមកគង់នៅកម្ពុជា។

សម្តេចតេជោបានសរសេរលើ បណ្តាញទំនាក់ទំនងសង្គមនាព្រឹកថ្ងៃទី២០ មិថុនានេះថា ខ្ញុំសូមអរគុណនាយករដ្ឋមន្ត្រី ហ៊ុន ម៉ាណែត និងរាជរដ្ឋាភិបាលកម្ពុជា ដែលមានចិត្តសប្បុរស សម្រាប់លោកឪស៊ុច និងសង្ឃឹមថា នាយករដ្ឋមន្ត្រី និងទូលស្នើសុំព្រះមហាក្សត្រ ប្រគេនសញ្ជាតិខ្មែរដល់លោកឪស៊ុចផងដែរ ដើម្បីព្រះអង្គបំពេញកាងារក្នុងជាជនជាតិខ្មែរ។

សម្តេចបានបញ្ជាក់ថា “ខ្ញុំសង្ឃឹមថា រឿងលោកឪស៊ុច មិនបង្កការរំខានដល់ទំនាក់ទំនងកម្ពុជា-ថៃ ឬថាជាការលូកដៃចូលកិច្ចផ្ទៃក្នុងរបស់ថៃនោះទេ ព្រោះកម្ពុជាក៏មិនអនុញ្ញាតឲ្យលោកឪស៊ុច កសាងកម្លាំងប្រឆាំងជាមួយថៃនោះដែរ”។

ម្យ៉ាងទៀតរឿងលោកឪស៊ុច ក៏មិនជារឿងថ្មីនោះដែរ ព្រោះខ្លួនខ្ញុំក៏ដូចជា រាជរដ្ឋាភិបាលកម្ពុជា ក៏ធ្លាប់ជួយដល់អតីតនាយករដ្ឋមន្ត្រី ថាក់ស៊ីន និងអតីតនាយករដ្ឋមន្ត្រី យ៉ីងឡាក់ ដែលជាឪពុកបង្កើត ម្តាយមីងបង្កើត របស់នាយករដ្ឋមន្ត្រីថៃបច្ចុប្បន្នផងដែរ។

នៅពេលទស្សនកិច្ចផ្លូវការ របស់នាយករដ្ឋមន្ត្រីថៃនៅកម្ពុជាកាលពីខែមេសា ឆ្នាំ២០២៥ កន្លងទៅ ក្រៅពីកម្មវិធីផ្លូវការយើងមានកម្មវិធីគ្រួសារដោយនាយករដ្ឋមន្ត្រីថៃ អ៊ុងអ៊ីន និងស្វាមី បានមកទទួលទានអាហារនៅផ្ទះខ្ញុំ។

មុនពេលចាកចេញនាយករដ្ឋមន្ត្រីថៃ បានសុំមើលបន្ទប់ដែលឪពុករបស់គាត់ និងម្តាយមីងរបស់គាត់សម្រាក ព្រោះផ្ទះរបស់ខ្ញុំបានរក្សាបន្ទប់ពីរជូនបងប្អូនទាំងពីរនាក់។ បន្ទប់មួយខ្ញុំដាក់ឈ្មោះថា បន្ទប់ ថាក់ស៊ីន និងបន្ទប់មួយទៀតមានឈ្មោះថា បន្ទប់ យ៉ីងឡាក់។ ស្វាមីនាយករដ្ឋមន្ត្រីថៃ បានថត និងថតជាវីដេអូនៅបន្ទប់ទាំងពីរនេះ។

មនោសញ្ចេតនារយៈពេលជាង៣០ឆ្នាំ រវាងគ្រួសារទាំងពីរ ត្រូវបានបំផ្លាញ ដោយការបែកធ្លាយនូវការសន្ទនា តាមទូរស័ព្ទដោយមន្ត្រីកម្ពុជាណាមួយ ដែលមានកំហឹងចំពោះការប្រមាថមកលើរូបខ្ញុំ និងនាយករដ្ឋមន្ត្រីកម្ពុជាថាគ្មានវិជ្ជាជីវៈ៕

ដោយៈ និស្ស័យ

ភ្នំពេញៈ ក្រុមមន្រ្តី និងតំណាងផ្នែកឯកជន បានបើកកិច្ចប្រជុំក្រុមការងារផ្នែកឯកជន ក្រុម “ក” “ផ្នែកកសិកម្ម និងកសិឧស្សាហកម្ម” នៃវេទិការាជរដ្ឋាភិបាល-ផ្នែកឯកជន។

កិច្ចប្រជុំកាលពីថ្ងៃទី១៩ មិថុនាកន្លងមកនេះ បានធ្វើឡើងអគ្គនាយកដ្ឋានសភាពាណិជ្ជកម្មកម្ពុជា ដឹកនាំដោយ ឧកញ៉ា ម៉ុង រិទ្ធិថា សហប្រធានក្រុមការងារ “ក” តំណាងផ្នែកឯកជន។

កិច្ចប្រជុំនេះក៏មានការចូលរួមផងដែរ ពីសំណាក់អនុសហប្រធានក្រុមការងារ “ក” ផ្នែកឯកជន តំណាងសមាគមអ្នកចិញ្ចឹមសត្វកម្ពុជា តំណាងសមាគមវិនិយោគិនកម្ពុជា តំណាងសហព័ន្ធស្វាយចន្ទីកម្ពុជា តំណាងសមាគមវារីវប្បកម្មនៅកម្ពុជា និងសមាជិក សមាជិកានៃក្រុមការងារ “ក” ផ្នែកឯកជនមួយចំនួនទៀតផងដែរ។

កិច្ចប្រជុំនេះមានគោលបំណង ដើម្បីបន្តធ្វើការពិនិត្យ ពិភាក្សាលើបញ្ហាប្រឈមចាស់  ក៏ដូចជាបន្តលើកឡើងនូវបញ្ហាប្រឈមរបស់ផ្នែកឯកជន ពាក់ព័ន្ធថ្មីៗបន្ថែមទៀត ទាក់ទងនឹងវិស័យកសិកម្ម និងកសិឧស្សាហកម្ម ដើម្បីដាក់សំណើ និងបញ្ហាប្រឈមទាំងនោះស្នើសុំការឆ្លើយតប និងដោះស្រាយពីសំណាក់ដៃគូគឺ ក្រសួងកសិកម្ម រុក្ខាប្រមាញ់ និងនេសាទ នាពេលឆាប់ៗខាងមុខនេះ។

កិច្ចប្រជុំបានដំណើរការពិនិត្យ ពិភាក្សាលើបញ្ហាប្រឈមរបស់ផ្នែកឯកជនចំនួនរួមមាន ទី១ សំណើសុំឱ្យធនាគារជាតិនៃកម្ពុជាបន្ធូរបន្ថយនីតិវិធី ដល់ការកែច្នៃកសិផលក្នុងស្រុក ទី២ សំណើសុំឱ្យក្រសួងពាក់ព័ន្ធ ជួយរកទីផ្សារដល់ការកែច្នៃកសិផលក្នុងស្រុក ទី៣ ការផ្គូរផ្គង រវាងអ្នកទទួលទិញផលិតផលកសិកម្ម និងអ្នកផ្គត់ផ្គង់ដោយផ្ទាល់ ទី៤ ផលពិបាកក្នុងការទទួលបានកម្ចី ពីធនាគារសហគ្រាសធុនតញច និងមធ្យមសម្រាប់វិស័យកសិកម្ម ។

ទី៥ ការដាក់លក់ផលិតផលក្នុងស្រុក ក្នុងផ្សារទំនើបមាននីតិវិធីច្រើន និងស្មុគស្មាញ  និងទី៦ សំណើសុំបន្តសុពលភាពការលើកទឹកចិត្តផ្នែកពន្ធដារចំពោះវិស័យកសិកម្ម រួមនឹងបញ្ហាប្រឈមមួយចំនួនផ្សេងទៀតផងដែរ៕

ដោយៈ និស្ស័យ

    បាត់ដំបងៈ រដ្ឋបាលខេត្តបាត់ដំបង ដឹកនាំដោយលោកសុខ លូអភិបាលនៃគណៈអភិបាលខេត្តបាន ដឹកនាំកិច្ចប្រជុំពិភាក្សាការងារត្រៀមរៀបចំព្រឹត្តិការណ៍ផ្លែឈើបាត់ដំបង២០២៥។

កិច្ចប្រជុំនេះ ក៏បានត្រួតពិនិត្យទីតាំង ដើម្បីត្រៀមរៀបចំព្រឹត្តិការណ៍ នាពេលឆាប់ៗខាងមុខនេះ។

ព្រឹត្តិការណ៍ផ្លែឈើបាត់ដំបង២០២៥ នេះគ្រោងរៀបចំឡើងរយៈពេលមួយសប្តាហ៍ពេញ ដោយចាប់ផ្តើមពីថ្ងៃទី២៧ ខែមិថុនា ដល់ថ្ងៃទី០៣ ខែកក្កដា ឆ្នាំ២០២៥ ខាងមុខនេះ និងមានប៊ូហ្វេទុរេនបាត់ដំបង រយៈពេលបីថ្ងៃចាប់ពីថ្ងៃទី២៧ ដល់ថ្ងៃទី២៩ ខែមិថុនា ឆ្នាំ២០២៥ នេះផងដែរ។

រដ្ឋបាលខេត្តអំពាវនាវសូមបងប្អូនភ្ញៀវជាតិ និងអន្តរជាតិអញ្ជើញចូលរួមព្រឹត្តិការណ៍នេះ អោយបានច្រើនកុះករ៕