ដោយៈ គង់ សូរិយា

    ភ្នំពេញៈ ទន្ទឹមនឹងភាពប្រសើរឡើងនៃទំនាក់ទំនងរវាងប្រទេសទាំងពីរ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធ​សភាកម្ពុជា បានស្នើឲ្យភាគីម៉ាឡេស៊ី តភ្ជាប់ជើងហោះហើរមកកាន់ក្រុងសៀមរាប និងក្រុងព្រះសីហនុ។

សម្តេចតេជោបានថ្លែងបែបនេះ ក្នុងពេលអនុញ្ញាតឲ្យលោក Dato SRI Tiong King Sing រដ្ឋមន្ត្រីក្រសួងទេសចរណ៍ សិល្បៈ និងវប្បធម៍ នៃប្រទេ​សម៉ាឡេស៊ី ចូលជួបសម្តែងការគួរសម និងពិភាក្សាការងារនៅរសៀលថ្ងៃទី១៩ មិថុនានេះ។

យោងតាមលោក ជា ធីរិទ្ធ អ្នកនាំពាក្យព្រឹទ្ធសភាបានឲ្យដឹងនៅក្រោយជំនួបថា នៅក្នុងជំនួបនោះ សម្ដេចតេជោបានសម្ដែងនូវការស្វាគមន៍ ចំពោះឯកឧត្តម និងប្រតិភូដែលបានអញ្ជើញមក ទស្សនកិច្ចនៅកម្ពុជា ហើយចាត់ទុកដំណើរទស្សនកិច្ច របស់លោកជាផ្នែកមួយនៃការជំរុញទំនាក់ទំនង រវាងប្រទេសទាំងពីរកាន់តែល្អប្រសើរ ហើយនិយាយដោយឡែកទាក់ទង ទៅនឹងវិស័យទេសចរណ៍ វប្បធម៌ នៃប្រទេសទាំងពីរឱ្យមានភាពរីកចម្រើនបន្ថែមទៀត។

លោករដ្ឋមន្ត្រីទេសចរណ៍របស់ម៉ាឡេស៊ី បានសម្ដែងនៅការអរគុណចំពោះសម្ដេចតេជោ ដែលបានចំណាយពេលវេលា ផ្ដល់ឱកាសឲ្យឯកឧត្តម និងសហការីបានជួបសំដែងការគួរសមនៅពេលនេះ។

លោកបានលើកឡើងអំពីសក្តានុពល នៃវិស័យទេសចរណ៍រវាងកម្ពុជា និងម៉ាឡេស៊ី ជាពិសេសចំនួន នៃការកើនឡើងភ្ញៀវទេសចរណ៍កម្ពុជាទៅកាន់ប្រទេសម៉ាឡេស៊ី និងការកើនឡើងអ្នកទេសចរណ៍ម៉ាឡេស៊ីមកកាន់ប្រទេសកម្ពុជាផងដែរ។

សម្ដេចតេជោ ហ៊ុន សែន បានផ្ដល់យោបល់ឱ្យភាគីទាំងពីរពង្រីកទំនាក់ទំនងទេសចរណ៍ ជាមួយគ្នាឲ្យកាន់តែរីកចម្រើន តាមរយៈការបង្កលក្ខណៈងាយស្រួល ដល់អ្នកទេសចរណ៍នៃប្រទេសទាំងពីរ ដែលជាផ្នែកមួយដ៏សំខាន់ នៃការជំរុញទំនាក់ទំនងរវាងប្រទេសទាំងពីរ ប្រជាជននិងប្រជាជន។

សម្ដេចតេជោក៏បានលើកឡើង ចង់ឲ្យមានការពង្រីកជើងហោះហើរត្រង់ ពីម៉ាឡេស៊ីមកកាន់ប្រទេសកម្ពុជា ក្រៅពីការហោះហើរពីម៉ាឡេស៊ី មកកាន់ទីក្រុងភ្នំពេញ សម្ដេចបានស្នើឲ្យមានការបង្កើនជើងហោះហើរទៅកាន់ខេត្តសៀមរាប និងក្រុងព្រះសីហនុបន្ថែមទៀត ដើម្បីពង្រីកនៃវិស័យទេសចរណ៍បន្ថែមទៀត។

នៅក្នុងឱកាសនេះផងដែរ សម្ដេចតេជោក៏បានជម្រាបប្រាប់ដល់ រដ្ឋមន្ត្រីទេសចរណ៍ម៉ាឡេស៊ី និងឯកអគ្គរដ្ឋទូតម៉ាឡេស៊ី ដែលបានអញ្ជើញមកដែរនោះ ដោយសម្ដេចបានស្នើឱ្យលោក នាំសាររបស់សម្ដេច ទាក់ទងទៅនឹងបញ្ហា ព្រំដែនរវាងកម្ពុជា និងថៃ ដើម្បីប្រាប់ទៅដល់ឯកឧត្តមនាយករដ្ឋមន្ត្រីម៉ាឡេស៊ី ដែលជាប្រធានអាស៊ាននៅឆ្នាំនេះ ដោយសម្ដេចបានពន្យល់អំពីស្ថានភាព ពិតប្រាកដនៃការកើតឡើង នៃជម្លោះព្រំដែនកម្ពុជា និងថៃ ជាពិសេសការចាប់ផ្ដើមចេញពីការបាញ់សម្លាប់ទាហានខ្មែរ កាលពីថ្ងៃទី២៨ ឧសភាកន្លងទៅនេះ ដែលជាការប្រមាថមកលើកម្ពុជា ក៏ដូចជាការឈ្លានពានមកដល់ទឹកដីកម្ពុជា។

សម្ដេចក៏បានបញ្ជាក់ពីបញ្ហា នៃការបិទច្រកព្រំដែនដោយឯកតោភាគី និងការប្រមាថ គំរាមដូចជាការគំរាមបិទអគ្គិសនី បិទអ៊ីនធឺណិតជាដើម។ សម្ដេចតេជោក៏បានលើកឡើង ពីយន្តការរបស់កម្ពុជាដែលបានធ្វើ គឺការដោះស្រាយដោយសន្តិវិធី ជាពិសេសការជំរុញបញ្ជូនសំណុំរឿងទៅតុលាការយុត្តិធម៌អន្តរជាតិICJ ។

ជាការឆ្លើយតប រដ្ឋមន្ត្រីទេសចរណ៍ម៉ាឡេស៊ី បានសន្យាថា នឹងនាំយកនូវសាររបស់សម្ដេចតេជោ ទៅកាន់នាយករដ្ឋមន្ត្រីម៉ាឡេស៊ីដែលជាប្រធានអាស៊ានឆ្នាំនេះ ហើយឯកឧត្តមក៏គាំទ្រ ចំពោះយន្តការនៃការដោះស្រាយបញ្ហា ដោយសន្តិវិធីរបស់កម្ពុជា ជាពិសេសយន្តការដោះស្រាយទៅតុលាការយុត្តិធម៌អន្តរជាតិ ICJ៕

ដោយ: គង់ លាងហួរ
អន្តរជាតិ: ធនាគារវិនិយោគខ្នាតយក្ស Goldman Sachs រំពឹងថា តម្រូវការលំនៅដ្ឋានថ្មីនៅតាមទីក្រុងនានារបស់ប្រទេសចិននឹងនៅតែមានកម្រិតទាបជាងប្រមាណ៧៥ភាគរយ ធៀបនឹងកម្រិតកំពូលកាលពីឆ្នាំ២០១៧ នៅក្នុងរយៈពេលប៉ុន្មានឆ្នាំខាងមុខនេះ។

ក្រុមអ្នកវិភាគនៅធនាគារ Goldman Sachs របស់សហរដ្ឋអាមេរិក បានសរសេរនៅក្នុងរបាយការណ៍មួយថា “ការថយចុះចំនួនប្រជាជន និងភាពយឺតយ៉ាវនៃនគរូបនីយកម្ម នឹងធ្វើឱ្យតម្រូវការលំនៅដ្ឋាននៅប្រទេសចិនថយចុះ”។

របាយការណ៍ខាងលើនេះក៏ព្រមានផងដែរថា តម្រូវការវិនិយោគអាចប្រែជាអវិជ្ជមាន ដោយសារតែម្ចាស់អចលនទ្រព្យមួយចំនួនអាចចាប់ផ្តើមលក់ឡាយឡុងអាផាតមុិនដែលនៅទំនេរ។ការ​រំពឹង​ទុក​នៃ​ការ​ធ្លាក់​ចុះ​តម្លៃ​បាននិង​កំពុង​ជះផលប៉ះ​ពាល់​ដល់​ទំនុកចិត្តលើការ​វិនិយោគ។

ជាលទ្ធផល តម្រូវការលំនៅដ្ឋានថ្មីប្រចាំឆ្នាំនៅតាមទីក្រុងនានាអាចមានកម្រិតទាបជាង៥លានយូនីតក្នុងមួយឆ្នាំៗក្នុងរយៈពេលប៉ុន្មានឆ្នាំខាងមុខនេះ។ តួលេខនេះដាំក្បាលចុះយ៉ាងខ្លាំងបើធៀបនឹងតម្រូវការលំនៅដ្ឋានថ្មីប្រចាំឆ្នាំចំនួន២០លានយូនីតក្នុងឆ្នាំ២០១៧។

ការព្យាករណ៍របស់ធនាគារវិនិយោគអាមេរិកកំពុងបន្ថែមក្តីបារម្ភអំពីអនាគតនៃឧស្សាហកម្មអចលនទ្រព្យនៅទ្រឹងរបស់ប្រទេសចិន ដែលបាននិងកំពុងជួបប្រទះវិបត្តិបំណុល និងការផ្គត់ផ្គង់លើសតម្រូវការ។

ទិន្នន័យផ្លូវការបានបង្ហាញកាលពីថ្ងៃចន្ទដើមសប្តាហ៍នេះថា តម្លៃផ្ទះថ្មីរបស់ប្រទេសចិនបានធ្លាក់ចុះលឿនបំផុតក្នុងរយៈពេល៧ខែក្នុងខែឧសភា ខណៈឥទ្ធិពលនៃវិធានការជំរុញសេដ្ឋកិច្ចកាលពីខែកញ្ញាឆ្នាំមុនបានរលត់ទៅវិញ៕

ដោយ: គង់ លាងហួរ
អន្តរជាតិ: ម្ចាស់អគារលំនៅដ្ឋាននៅទីក្រុងឡុងដិ៍របស់ចក្រភពអង់គ្លេសបានបញ្ចុះតម្លៃផ្ទះក្នុងរង្វង់ជាមធ្យម៧.០០០ផោន(ប្រហែល៩.៤០៧ដុល្លារ) ក្នុងខែមិថុនា ឆ្នាំ២០២៥នេះ ដើម្បីទាក់ទាញអ្នកទិញដែលប្រឈមនឹងការបង់ពន្ធខ្ពស់ជាងមុន និងមានជម្រើសច្រើន។

តម្លៃផ្ទះដាក់លក់ជាមធ្យម(Asking Price)បានធ្លាក់ចុះ០,៩ភាគរយ ធៀបនឹងខែឧសភាមកនៅត្រឹម៦៩៥.៤១៤ផោន(ប្រហែល៩៣៤.៦២២ដុល្លារ)ក្នុងមួយយូនីតនៅក្នុងខែមិថុនា។ នេះ​បើ​តាម​របាយការណ៍​របស់​គេហទំព័រ​អចលនទ្រព្យ Rightmove។

ម្ចាស់អគារលំនៅដ្ឋាននៅរាជធានីរបស់ចក្រភពអង់គ្លេស និងនៅក្នុងតំបន់ដែលមានតម្លៃផ្ទះថ្លៃផ្សេងទៀតកំពុងផ្តល់ការបញ្ចុះតម្លៃ ក្នុងគោលបំណងដើម្បីកាត់បន្ថយផលប៉ះពាល់នៃការដំឡើងពន្ធចំពោះការទិញផ្ទះចាប់តាំងពីខែមេសា។

តម្លៃផ្ទះកំពុងទទួលរងផលប៉ះពាល់ ដោយសារជនជាតិអង់គ្លេសកាន់តែច្រើនបានសម្រេចលក់ផ្ទះទី២របស់ពួកគេនៅតាមតំបន់ឆ្នេរដូចជាតំបន់ Devon និងតំបន់ Cornwall ដើម្បីឆ្លើយតបទៅនឹងការដំឡើងពន្ធរបស់រដ្ឋាភិបាលលើកម្មសិទ្ធិអចលនទ្រព្យ។

របាយ​ការណ៍​បាន​បង្ហាញ​ថា ​តម្លៃ​ផ្ទះ​ជា​មធ្យម​នៅទូទាំងប្រទេសនេះបានធ្លាក់ចុះ០,៣ភាគរយ​ធៀប​នឹង​ខែ​ឧសភាដល់៣៧៨.២៤០ផោននៅខែមិថុនា។បច្ចុប្បន្ន ទីផ្សារកំពុងស្ថិតក្រោមសម្ពាធពីការដំឡើងអត្រាពន្ធលើការទិញផ្ទះ និងការកើនឡើងក្នុងអត្រាប្រចាំឆ្នាំ១១ភាគរយនៃចំនួនផ្ទះសម្រាប់ដាក់លក់។

លោក Colleen Babcock អ្នកជំនាញអចលនទ្រព្យនៅភ្នាក់ងារ Rightmove បានអះអាងថា “ឥឡូវនេះ យើងកំពុងសង្កេតឃើញកំណើននៃការដាក់លក់ផ្ទះ ហើយការដំឡើងពន្ធប្រថាប់ត្រានាពេលថ្មីៗនេះនៅក្នុងប្រទេសអង់គ្លេសបានជះឥទ្ធិពលដល់ការកំណត់តម្លៃរបស់អ្នកលក់”៕

ដោយ: គង់ លាងហួរ
អន្តរជាតិ: យោងតាមកាសែត Vnexpress បានរាយការណ៍ឱ្យដឹងថា រដ្ឋាភិបាលរបស់ប្រទេសសិង្ហបុរីគ្រោងយកដីមួយកន្លែងស្ថិតនៅក្នុងតំបន់លំនៅដ្ឋានថ្លៃបំផុតរបស់ខ្លួនទៅប្ដូរជាមួយនឹងដីទំនេរដ៏ធំមួយ ដែលជាកម្មសិទ្ធិរបស់បុត្រច្បងនៃស្តេចម៉ាឡេស៊ីបច្ចុប្បន្ន។

ព្រះអង្គម្ចាស់ Tunku Ismail ដែលជារាជទាយាទនៃរដ្ឋ Johor បានកាន់កាប់ដីទំហំ២១,១ហិកតាតាមបណ្តោយផ្លូវ Holland ដែលមានតម្លៃរាប់ពាន់លានដុល្លារ នៅជិតសួនរុក្ខសាស្ត្រ Botanic Gardens របស់ប្រទេសសិង្ហបុរី ដែលជាតំបន់បេតិកភណ្ឌពិភពលោករបស់អង្គការយូណេស្កូ។

ទ្រព្យសម្បត្តិរបស់គ្រួសាររាជវង្សម៉ាឡេសុីត្រូវបានគេប៉ាន់ប្រមាណថា មានចំនួន៥,៧ពាន់លានដុល្លារកាលពីឆ្នាំមុន។

អាជ្ញាធរអភិវឌ្ឍន៍ទីក្រុងនៃប្រទេសសិង្ហបុរី(URA)បានអះអាងនៅក្នុងសេចក្តីប្រកាសព័ត៌មានមួយថា រដ្ឋាភិបាលសិង្ហបុរីបានឈានដល់កិច្ចព្រមព្រៀងមួយដើម្បីប្តូរក្បាលដី ដែលនៅជាប់គ្នាជាមួយម៉ាឡេសុី។

យោងតាមអាជ្ញាធរបានឱ្យដឹងថា តាមរយៈកិច្ចព្រមព្រៀងនេះ ព្រះអង្គម្ចាស់ Tunku Ismail នឹងផ្ទេរដីចំនួន១៣ហិកតាស្ថិតនៅជិតសួន Botanic Gardens ទៅកាន់រដ្ឋាភិបាលសិង្ហបុរី ហើយសិង្ហបុរីនឹងផ្តល់ឱ្យមកវិញនូវដីទំហំ៨,៥ហិកតានៅក្បែរនោះ។

តំបន់នេះស្ថិតនៅជិតស្ថានទូតជាច្រើន និងជាសង្កាត់ផ្សារទំនើប Orchard Road ដ៏លេចធ្លោរបស់សិង្ហបុរី ដែលមានអចលនទ្រព្យថ្លៃបំផុត ជាពិសេសលំនៅដ្ឋានប្រណីតធំៗ ដែលត្រូវបានលក់ចេញក្នុងតម្លៃរាប់សិបលានដុល្លារ។

ការពិភាក្សាអំពីការប្រែក្លាយដីនេះទៅជាគម្រោងលំនៅដ្ឋានប្រណីតតម្លៃរាប់ពាន់លានដុល្លារបានបន្តអូសបន្លាយអស់រយៈពេលជាច្រើនឆ្នាំមកហើយ។

លោក Alan Cheong អ្នកជំនាញនៅក្រុមហ៊ុន Savills Singapore បានលើកឡើងថា ដោយសារមានការរឹតបន្តឹងឱ្យសាងសង់អគារត្រឹមតែកម្ពស់៤ជាន់នៅក្នុងតំបន់នោះ ការអភិវឌ្ឍន៍លំនៅដ្ឋាននៅទីនោះអាចមានអគារអាផាតមុិនទាបៗ ឬលំនៅដ្ឋានប្រភេទ Good Class Bungalows៕

ដោយៈ ម៉ាណា

    ភ្នំពេញៈ ក្នុងការ​បោះ​​ជំហាន​ឆ្ពោះទៅរក ​ការ​​គ្រប់គ្រាន់ដោយ​​ខ្លួនឯង ក្រុមហ៊ុនចម្ការកៅស៊ូ​បឹងកេត នៅ​ស្ទឹងត្រង់ ខេត្តកំពង់ចាម បានប្រកាស​ផែនការ​ពង្រីក​ប្រតិបត្តិការ​របស់ខ្លួន ដោយ​ផលិត​ស្រោមដៃ​ជ័រ​សម្រាប់​នាំចេញ​ ជាជាងការ​នាំចេញ​តែ​ជ័រ​កៅស៊ូ​។​

ការផ្លាស់ប្តូរ​នេះ​ ជា​ផ្នែក​មួយ​នៃ​គំនិត​ផ្តួចផ្តើម​ដ៏​ទូលំទូលាយ​របស់​ក្រុមហ៊ុន​ក្នុងការ​កែច្នៃ​កៅស៊ូ​ក្នុងស្រុក រក្សា​ប្រាក់ចំណេញ​កាន់តែច្រើន​ក្នុងប្រទេស និង​កាត់បន្ថយ​ការពឹង​ផ្អែកលើ​អ្នក​ផលិត​បរទេស​។​

លោក ហេង ឡុង អគ្គនាយក​​ក្រុមហ៊ុន​បានប្រាប់​​អ្នកសារព័ត៌មាន​​ដែល​ដឹកនាំ​ដោយ​ប្រធាន​ក្លឹប​អ្នកកាសែត​កម្ពុជា (CCJ) លោក ពុ​យ គាថា ​ក្រុមហ៊ុន​បាន​បង្កើន​ការផលិត​ជ័រកៅស៊ូ ​ឡាតិច​របស់ខ្លួន​រួចហើយ ដែល​បច្ចុប្បន្ន​អាច​ផលិត​បាន​ប្រហែល៣០០តោន ​ក្នុង​មួយថ្ងៃ ជាមួយនឹង​គោលដៅ​សម្រេចឱ្យ​បាន៦០០ តោន​ក្នុង​មួយថ្ងៃ​នាពេលខាងមុខ​។​

លោក ឡុង បាន​និយាយថា “​កន្លះ​ឆ្នាំ ឬមួយ​ឆ្នាំ​ទៀត យើង​នឹង​ផលិត​ស្រោមដៃជ័រ​​ ក្នុងប្រទេស​របស់​យើង ដោយ​មិន​ចង់ឱ្យ​ក្រុមហ៊ុន​បរទេស​ចំណេញ​ច្រើន​ពី​យើង”​។​

ការផ្លាស់ប្តូរ​ដ៏​សំខាន់​នេះ គឺជា​ចំណុច​របត់​មួយ​សម្រាប់​ឧស្សាហកម្ម​កៅស៊ូ​របស់​កម្ពុជា ដោយសារ​ប្រទេស​នេះ ​ឈាន​ឆ្ពោះទៅរក​ការ​ក្លាយជា​តួអង្គ​សំខាន់ ​នៅក្នុង​ទីផ្សារ​ស្រោមដៃ​ជ័រ​ពិភពលោក​។​

ការពង្រីក​ម​ហិ​ច្ឆិ​តា​របស់​ក្រុមហ៊ុន​នេះ ​ក៏ត្រូវ​បាន​​​រំពឹងថា​នឹង​បង្កើត​ការងារ​ថ្មីៗ​រាប់រយ​សម្រាប់​ពលក​រ​ ដែល​ភាគច្រើន​កំពុង​ត្រឡប់​មកពី​ប្រទេស​ថៃ​ ដើម្បី​ស្វែងរក​ឱកាស​ការងារ​ត្រឡប់ទៅផ្ទះ​វិញ​។

អភិបាលស្រុកស្ទឹងត្រង់ លោក ​បាន ​ស្រេង ​បាន​សម្តែង​ការគាំទ្រ ​ចំពោះ​គំនិត​ផ្តួចផ្តើម​នេះ​ដោយ​កត់សម្គាល់ថា រាជ​​រដ្ឋាភិបាល​កម្ពុជា​បាននិងកំពុង​ជំរុញ​យ៉ាងសកម្ម ​ដល់​ពលករ​ចំណាកស្រុក​ឱ្យ​វិលត្រឡប់​មកវិញ​។​

លោក​បាន​ឱ្យ​ដឹងថា ស្រុក​ស្ទឹង​ត្រង់​ មាន​ពលករ​ចំណាក​ស្រុក​ប្រមាណ៧ពាន់​នាក់​ ដែល​លោក​រំពឹងថា ក្រុមហ៊ុន​របស់លោក ហេង ឡុង អាច​ស្រូបទាញ​កម្លាំង​ពលកម្ម​បាន​យ៉ាង​ច្រើន​។

ដោយ​មាន​បំណង​​​ចូលរួម​ ជាមួយ​រាជរដ្ឋាភិបាល​ក្នុងលទ្ធភាព​​ទទួល​យក​ពលករ​ខ្មែរ​ពី​ប្រទេស​ថៃ ក្រុមហ៊ុន​កៅស៊ូបឹង​កេត អាច​ត្រូវការ​បុគ្គលិក​បន្ថែម​​១៣០០​នាក់​។

លោកបាន​ឱ្យ​ដឹងថា បច្ចុប្បន្ន​នេះ កម្មករ​បម្រើ​ការ​គិតថ្ងៃ​​ដោយ​មួយ​ថ្ងៃ​ទទួល​បាន​ចន្លោះពី១៣ ទៅ១៥​ដុល្លារ ឬ​ឈាន​ដល់២០​ដុល្លារ​ទៅតាម​កម្រិត​ជំនាញ រួមទាំងការ​ស្នាក់ និង​ម្ហូបអាហារ​ថែម​ទៀត​​។ នៅពេល​ខាង​មុខ លោក​នឹង​ប្ដូរ​ពីការ​ទូទាត់​ប្រចាំថ្ងៃ​ទៅជា​ប្រាក់​ខែ​។

លោកឡុង បាន​ឱ្យ​ដឹងថា ​បុគ្គលិកបម្រើ​ការ​ក្នុង​សម្ព័ន្ធក្រុមហ៊ុន ដែល​រាប់​ចាប់ពី​ចម្ការ​កៅស៊ូ រោងចក្រ​ជី ចម្ការ​ចេក រោងចក្រ​ក្រដាស មាន​ចំនួន ​ប្រមាណ៦​ពាន់​នាក់។

ក្រៅពី​កៅស៊ូ ក្រុមហ៊ុន​ក៏បាន​ចូលរួម​ក្នុង​ការដាំដុះ និង​ការនាំចេញ​កសិផល​ផ្សេងៗ​ទៀត​ដូចជា ចេក​អំបូង​លឿង ទុរេន មៀន​ប៉ៃលិ​ន ក្រូចថ្លុង និង​ខ្នុរ​។​

ក្រុមហ៊ុន​បាន​វិនិយោគ​យ៉ាងច្រើន​ លើ​ហេដ្ឋារចនាសម្ព័ន្ធ​ទំនើប រួមទាំង​ប្រព័ន្ធធារាសាស្ត្រ បច្ចេកវិទ្យា​ប្រមូល​ផល និង​បរិក្ខារ​វេច​ខ្ចប់ ដើម្បី​ធានាថា​ វា​បំពេញ​តាម​ស្តង់ដារ​អន្តរជាតិ​សម្រាប់​ការនាំចេញ​។​

ខេត្តកំពង់ចាម មាន​ផ្ទៃដី​កសិកម្ម​ជាង២៦​ម៉ឺន​​ហិកតា ដែលប្រជាជន​ចំនួន៦០​ភាគរយ​ធ្វើការ​ក្នុង​វិស័យ​កសិកម្ម​។​

ជាមួយនឹង​ការវិនិយោគ​​លើ​ដំណាំ​កៅស៊ូ និង​ដំណាំ​ផ្សេងៗ​ទៀត ក្រុមហ៊ុន​នឹង​ត្រៀមខ្លួន ​ដើម្បី​ដើរតួនាទី​យ៉ាងសំខាន់ ​ក្នុងការ​អភិវឌ្ឍន៍​សេដ្ឋកិច្ច​ក្នុង​តំបន់​។​

សេចក្តីប្រកាស​នេះ​ បានធ្វើ​ឱ្យមាន​សុទិដ្ឋិនិយម ​ក្នុងចំណោម​កម្មករ​ក្នុងស្រុក និង​មន្ត្រី​រដ្ឋាភិបាល​ដូចគ្នា ដោយសារ​វា​​​មិន​ត្រឹមតែ​ពង្រឹង​វិស័យ​កសិកម្ម​របស់​កម្ពុជា​ប៉ុណ្ណោះ​ទេ ប៉ុន្តែ​ថែមទាំង​ជំរុញ​ការងារ និង​លទ្ធភាព​គ្រប់គ្រាន់​ដោយ​ខ្លួនឯង ​នៅក្នុង​ឧស្សាហកម្ម​កៅស៊ូ និង​ផលិតកម្ម​ផងដែរ​៕