ដោយ: គង់ លាងហួរ
អន្តរជាតិ: ការធ្វើអត្ថាធិប្បាយនាពេលថ្មីៗនេះរបស់នាយករដ្ឋមន្ត្រីចិនលោក Li Qiang ស្តីពីការស្តារវិស័យអចលនទ្រព្យ និងការបង្កើនវិធានការគាំទ្រ ត្រូវបានគេវាយតម្លៃថា ជាការបង្ហាញនូវក្តីកង្វល់របស់ទីក្រុងប៉េកាំងចំពោះវិស័យអចលនទ្រព្យ ដែលធ្លាប់ជាសសរស្តម្ភសេដ្ឋកិច្ចសម្រាប់ប្រទេសចិន។

ក្រុមអ្នកវិភាគលើកឡើងថា ដោយសារមិនមានដំណោះស្រាយអាចបញ្ចប់វិបត្តិនេះបានភ្លាមៗ ទីក្រុងប៉េកាំងបានបង្កើនការប្រុងប្រយ័ត្នបន្ថែមទៀតចំពោះផលប៉ះពាល់លើទំនុកចិត្តអ្នកទិញ និងតម្រូវការក្នុងស្រុក ខណសេដ្ឋកិច្ចចិនកំពុងប្រឈមមុខនឹងភាពមិនច្បាស់លាស់ពីកត្តាខាងក្រៅ។

កិច្ចប្រជុំក្រុមប្រឹក្សារដ្ឋ ដែលបានកោះប្រជុំដោយលោក Li Qiang កាលពីថ្ងៃសុក្រសប្តាហ៍មុនបានបញ្ជាក់ពីការប្តេជ្ញាចិត្តបន្ថែមទៀតលើការគាំទ្រទីផ្សារអចលនទ្រព្យរបស់ប្រទេសចិន។

ទីភ្នាក់ងារសារព័ត៌មានរដ្ឋចិន Xinhua បានរាយការណ៍ថា កិច្ចប្រជុំបានគូសបញ្ជាក់ពីតម្រូវការក្នុងការបង្កើនប្រសិទ្ធភាពបន្ថែមទៀតនូវគោលនយោបាយដែលមានស្រាប់ និងបង្កើនការរួមផ្សំគ្នាជាប្រព័ន្ធនៃការអនុវត្តដើម្បីជំរុញតម្រូវការ និងកាត់បន្ថយហានិភ័យ។

ជាពិសេស រដ្ឋាភិបាលនឹងត្រួតពិនិត្យឱ្យបានហ្មត់ចត់ចំពោះគម្រោងដែលកំពុងដំណើរការ និងការផ្គត់ផ្គង់ដី ហើយគម្រោងកែលម្អទីក្រុងនឹងទទួលបាននូវជំនួយហិរញ្ញប្បទានបន្ថែមទៀត។

កិច្ចប្រជុំនេះសង្កត់ធ្ងន់លើគោលដៅបញ្ឈប់ការធ្លាក់ចុះ និងស្តារស្ថិរភាពនៃវិស័យអចលនទ្រព្យចិនឡើងវិញ។

យោងតាមទិន្នន័យដែលចេញផ្សាយដោយការិយាល័យស្ថិតិរបស់រដ្ឋាភិបាលចិនបានបង្ហាញថា តម្លៃផ្ទះនៅក្នុងទីក្រុងធំៗចំនួន៧០ របស់ប្រទេសចិន បានធ្លាក់ចុះ០,២ភាគរយកាលពីខែឧសភា បើធៀបនឹងការធ្លាក់ចុះ០,១ភាគរយនៅក្នុងខែមេសា។

លោក Yan Yuejin អនុប្រធានវិទ្យាស្ថានស្រាវជ្រាវអចលនទ្រព្យ E-House China ក្នុងទីក្រុងសៀងហៃបានអះអាងថា“ការធ្លាក់ចុះនេះជាសញ្ញាដាស់តឿនឱ្យមានការប្រុងប្រយ័ត្ន”។

លោក Yan Yuejin បានបញ្ជាក់បន្ថែមថា “ទិន្នន័យខាងលើនេះអាចជាសូចនាករដំបូងបង្ហាញថា ប្រសិទ្ធភាពនៃវិធានការគាំទ្រគោលនយោបាយរបស់រដ្ឋាភិបាលចិនថយចុះ”។

វិធានការគាំទ្រទាំងនោះរួមមាន ការចាក់បញ្ចូលសាច់ប្រាក់ងាយស្រួល ដើម្បីបង្កើនសមត្ថភាពផ្តល់ប្រាក់កម្ចី ការផ្តល់មូលនិធិដល់អ្នកអភិវឌ្ឍន៍លំនៅដ្ឋាន ការកាត់បន្ថយអត្រាការប្រាក់ ការបង្កើនការផ្តល់ប្រាក់កម្ចីទិញផ្ទះ និងការបន្ធូរបន្ថយការរឹតបន្តឹងលើការទិញផ្ទះច្រើនយូនីត៕

ដោយៈ គង់ សូរិយា

    ភ្នំពេញៈ ប្រមុខកាទូតកម្ពុជា លោកឧបនាយករដ្ឋមន្ត្រី ប្រាក់ សុខុន ប្រមុខការទូតកម្ពុជា អញ្ជើញបណ្តាឯកអគ្គរាជទូត ឯកអគ្គ​រដ្ឋទូតប្រទេសជាមិត្តប្រចាំកម្ពុជា មកពន្យល់បកស្រាយរឿងពិតជុំវិញបញ្ហាព្រំដែនកម្ពុជា-ថៃ។

នៅព្រឹកថ្ងៃទី១៧ ខែមិថុនា ឆ្នាំ២០២៥ ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ មានជំនួបជាមួយអង្គទូតបរទេសប្រចាំកម្ពុជា ដើម្បីធ្វើការពន្យល់អំពីការវិវត្តនៃស្ថានការណ៍បញ្ហាព្រំដែនកម្ពុជា-ថៃ ។

ជំនួបនេះ បានធ្វើឡើងនៅទីស្តីការក្រសួងការបរទេស និងសហប្រតិបត្តិការអន្តរជាតិ៕

ដោយៈ គង់ សូរិយា

    ក្រចេះ រដ្ឋមន្រ្តីក្រសួងសាធារណៈការ និងដឹកជញ្ជូនលោកប៉េង ពោធិ៍នាកាលពីថ្ងៃទី១៥ មិថុនា បានចុះពិនិត្យ

គម្រោងហេដ្ឋារចនាសម្ព័ន្ធស្ពានឆ្លងកាត់ទន្លេមេគង្គខេត្តក្រចេះ និងផ្លូវតភ្ជាប់ដែលគិតរហូតមកទល់ពេលនេះសម្រេចបាន៧០,១០%ហើយ។

ការចុះពិនិត្យនេះ មានការចូលរួមពីលោក វ៉ា ថន អភិបាលខេត្តក្រចេះ លោកជំទាវថ្នាក់ដឹកនាំក្រសួងពាក់ព័ន្ធ មន្រ្តីជំនាញ និងក្រុមហ៊ុនសាងសង់។

គម្រោងសាងសង់ស្ពានឆ្លងកាត់ទន្លេមេគង្គ ខេត្តក្រចេះ តភ្ជាប់រវាងស្រុកចិត្របុរី និងស្រុកព្រែកប្រសព្វ មានប្រវែង១៧៦១ម៉ែត្រ, ផ្លូវតភ្ជាប់ និងផ្លូវខ្នែងទៅកាន់ក្រុងក្រចេះ ខេត្តក្រចេះ មានប្រវែងសរុប ៣៣,៤៦ គីឡូម៉ែត្រ សម្រេចបាន៧០,១០%ហើយ ដែលក្នុងនោះ ស្ពានឆ្លងកាត់ទន្លេមេគង្គ-ក្រចេះ សម្រេចបាន៩៦,៣២% ដោយគិតត្រឹមពាក់កណ្តាលខែមិថុនា ឆ្នាំ២០២៥នេះ។

គម្រោងនេះ មានចំណុចចាប់ផ្ដើមពីផ្លូវជាតិលេខ៧ (រង្វង់មូលខ្លាស្ទុះ) ទៅផ្លូវជាតិលេខ៦០B ដែលគម្រោងនេះជាផ្នែកនៃផ្លូវជាតិដ៏សំខាន់មួយភ្ជាប់ខេត្តក្រចេះ និងខេត្តកំពង់ធំ ព្រមទាំងដើរតួជាប្រព័ន្ធដឹកជញ្ជូនដ៏សំខាន់រវាងផ្លូវជាតិលេខ៦ ផ្លូវជាតិលេខ៦២ ផ្លូវជាតិលេខ៧ ផ្លូវជាតិលេខ៩ ផ្លូវជាតិលេខ៧១ ផ្លូវជាតិលេខ៧១C ផ្លូវខេត្តលេខ៣៧១ ផ្លូវខេត្តលេខ៧៣ ផ្លូវខេត្តលេខ៧៦ និងផ្លូវជាតិលេខ៧៨។

ស្ពានឆ្លងកាត់ទន្លេមេគង្គក្នុងខេត្តក្រចេះ បានប្រើប្រាស់ឥណទានសម្បទានពីរដ្ឋាភិបាល នៃសាធារណរដ្ឋប្រជាមានិតចិន ដោយបានសម្ពោធបើកការដ្ឋានសាងសង់កាលពីថ្ងៃទី២ ខែមករា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែនអតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា និងលោកឯកអគ្គរដ្ឋទូតចិន វ៉ាង វិនធៀន អតីតឯកអគ្គរដ្ឋទូតចិនប្រចាំកម្ពុជា ហើយគម្រោងទាំងមូលគ្រោងបញ្ចប់ការសាងសង់ឱ្យបានមុនខែកញ្ញា ឆ្នាំ២០២៦ ខាងមុខនេះ។

ជាមួយគ្នានេះដែរ ប្រសិនគ្មានការប្រែប្រួលនោះទេ ស្ពានឆ្លងកាត់ទន្លេមេគង្គខេត្តក្រចេះ អាចនឹងបើកឱ្យប្រជាពលរដ្ឋធ្វើដំណើរឆ្លងកាត់បណ្តោះអាសន្ន នៅកំឡុងពេលពិធីបុណ្យភ្ជុំបិណ្ឌ នាខែកញ្ញា ឆ្នាំ២០២៥ខាងមុខនេះ។

ផ្លូវ ស្ពាន គឺជាសរសៃឈាមនៃសេដ្ឋកិច្ចជាតិ និងជាអាទិភាពគន្លឹះទី២ ក្នុងចំណោមអាទិភាពគន្លឹះទាំង៥ “មនុស្ស ផ្លូវ ទឹក ភ្លើង និងបច្ចេកវិទ្យា” នៃយុទ្ធសាស្ត្របញ្ចកោណដំណាក់កាលទី១ ដោយក្នុងកិច្ចការអាទិភាពទី២ នៃបញ្ចកោណទី២ គឺការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូន។

គម្រោងនេះ ក៏ជាគម្រោងយុទ្ធសាស្រ្តមួយដ៏សំខាន់ សម្រាប់ការតភ្ជាប់ទំនាក់ទំនង និងជាក្តីសង្ឃឹមរវាងប្រជាពលរដ្ឋ ដែលរស់នៅត្រើយខាងកើត និងប្រជាពលរដ្ឋដែលរស់នៅត្រើយខាងលិច ទាំងការតភ្ជាប់តំបន់ដាច់ស្រយាលនៅភូមិភាគឦសាន មកកាន់ទីប្រជុំជនតភ្ជាប់ពីខេត្តក្រចេះ ទៅខេត្តកំពង់ធំ ដែលមានភាពប្រទាក់ក្រឡាគ្នាជាមួយផ្លូវជាតិសំខាន់ៗ នៃបណ្តាខេត្តដ៏ទៃទៀត៕

ដោយ: គង់ លាងហួរ
អន្តរជាតិ: ការ​លក់​នៅ​ក្នុង​ទីផ្សារ​អចលនទ្រព្យរបស់​ទីក្រុងហុងកុងនៃប្រទេសចិននៅតែបន្តជួបការលំបាក។ថ្មីៗនេះ វិមានដ៏ធំមួយក្នុងគម្រោង The Peak ត្រូវបានចុះបញ្ជីសម្រាប់ប្រកាសដាក់លក់បញ្ចុះតម្លៃចំនួន២ភាគ៣នៃតម្លៃសរុបកាលពីទិញដំបូង។

ផ្ទះកម្ពស់៣ជាន់ដែលស្ថិតលើផ្លូវ 12 Mount Kellett នៅគម្រោង Twelve Peaks នេះត្រូវបានដាក់លក់ក្នុងតម្លៃ៣៣០លានដុល្លារហុងកុង (ប្រមាណ៤២លានដុល្លារអាមេរិក) ដោយម្ចាស់បំណុល។នេះបើយោងតាមក្រុមហ៊ុន ​​Colliers ដែលជាភ្នាក់ងារលក់អចលនទ្រព្យ។

លោក Yip Yuen Sai បានទិញផ្ទះនេះពីក្រុមហ៊ុនអភិវឌ្ឍន៍អចលនទ្រព្យ Sun Hung Kai Properties ក្នុងឆ្នាំ២០១៩ ក្នុងតម្លៃ៤៥០លានដុល្លារហុងកុង។ លោក Yip ជាស្ថាបនិកក្រុមហ៊ុន Grandland Group ចុះបញ្ជីនៅទីក្រុងសុិនជិន (Shenzhen)។

បើទោះបីជាយ៉ាងនេះក្តី ក្រុមហ៊ុន Grandland Group មិន​បាន​ឆ្លើយ​តប​នឹង​សំណើ​សុំ​ការ​អត្ថាធិប្បាយ​ដោយកាសែតហុងកុង South China Morning Post នោះទេ។

នៅទូទាំងទីក្រុងហុងកុង រាប់ចាប់ពីតំបន់គម្រោងលំនៅដ្ឋាន The Peak ដល់តំបន់ភាគខាងត្បូងក្រុងហុងកុង ក្រុមអ្នកមានបានជួបប្រទះបញ្ហាសាច់ប្រាក់ ដោយត្រូវបង្ខំចិត្តលក់ផ្ទះរបស់ពួកគេដើម្បីទូទាត់បំណុល។

ម្ចាស់អចលនទ្រព្យ ដែលជួបប្រទះវិបត្តិសាច់ប្រាក់ទាំងនោះកំពុងប្រកាសដាក់លក់ផ្ទះរបស់ពួកគេក្នុងអត្រាបញ្ចុះតម្លៃយ៉ាងច្រើន ដោយសារបន្ទុកខ្ពស់ក្នុងការទូទាត់អត្រាការប្រាក់ទៅលើប្រាក់កម្ចី។ ទន្ទឹមនឹងនេះ ក្រុមអ្នកជំនាញបានរំពឹងថា ការលក់ និងតម្លៃអចលនទ្រព្យនឹងបន្តធ្លាក់ចុះ៕