ដោយៈ គង់ សូរិយា

    ភ្នំពេញៈ ឯកអគ្គរដ្ឋទូតចិនប្រចាំកម្ពុជា លោកវ៉ាង វិនប៊ីន បានអះអាងថា ចិននិងកម្ពុជាជាមិត្តដែនថែប និងជាសហគមន៍វាសនារួមគ្រប់រដូវកាល។

លោកបានសរសសេរលើបណ្តាញ ទំនាក់ទំនងសង្គមរបស់ខ្លួនកាលពីរាត្រីថ្ងៃទី១៥ សីហាថា ចិននិងកម្ពុជា តែងតែគាំទ្រនិងជួយគ្នាទៅវិញទៅមក។ ភាគីចិនគាំទ្រកម្ពុជា ក្នុងការរក្សាស្ថិរភាពនយោបាយ ជំរុញការអភិវឌ្ឍសេដ្ឋកិច្ច និងលើកកម្ពស់ជីវភាពរស់នៅរបស់ប្រជាជន។

លោកបញ្ជាក់ថា “រីករាយក្នុងការសហការជាមួយកម្ពុជា ដើម្បីបង្កើនតួនាទីរបស់គណៈកម្មាធិការ សម្របសម្រួលអន្តររដ្ឋាភិបាល​ចិន-កម្ពុជា ពង្រឹងក្របខ័ណ្ឌកិច្ចសហប្រតិបត្តិការ”ត្បូងពេជ្រដែលមានវិស័យអាទិភាពទាំង៦”ឱ្យបានសម្បូរបែប និងជំរុញសមិទ្ធផលគួរឱ្យកត់សម្គាល់បន្ថែមទៀតសម្រាប់”ច្រករបៀងអភិវឌ្ឍន៍ឧស្សាហកម្ម” និង”ច្រករបៀងត្រីនិងអង្ករ” ធ្វើឱ្យកិច្ចសហប្រតិបត្តិការចិន-កម្ពុជាក្លាយជាផលប្រយោជន៍ កាន់តែច្រើនជូនដល់ប្រជាជនកម្ពុជា និងរួមចំណែកដល់ការអភិវឌ្ឍន៍និងវិបុលភាពក្នុងតំបន់”៕

(បន្ទាយមានជ័យ)៖ នៅរសៀលថ្ងៃទី១៤ ខែសីហា ឆ្នាំ២០២៥នេះ ក្រុមអ្នកសង្កេតការណ៍អន្តរកាល (IOT) ចំនួន៧ប្រទេស ដឹកនាំដោយអនុព័ន្ធយោធាម៉ាឡេស៊ី ប្រចាំកម្ពុជា និងមានអនុព័ន្ធយោធា ប្រទេសផ្សេងទៀត ដែលមាននិវេសនដ្ឋានក្នុង និងក្រៅប្រទេសកម្ពុជា បានអញ្ជើញចុះសង្កេតការណ៍នៅតំបន់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ទីដែលយោធាថៃបានយកគ្រឿងចក្រមកឈូសឆាយ និងរាយលួសបន្លា ក្រោយបទឈប់បាញ់ និងសេចក្តីថ្លែងការណ៍រួម នៃកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ កម្ពុជា-ថៃ (Extraordinary GBC Meeting) កាលពីថ្ងៃទី៧ ខែសីហា ឆ្នាំ២០២៥ នៅប្រទេសម៉ាឡេស៊ី៕

(ភ្នំពេញ)៖ នៅថ្ងៃទី១៤ ខែសីហា ឆ្នាំ២០២៥ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ បានអញ្ជើញជួបពិភាក្សាក្រៅផ្លូវការជាមួយ លោក វ៉ាង យី រដ្ឋមន្រ្តីការបរទេស នៃសាធារណរដ្ឋប្រជាមានិតចិន និង លោក ម៉ារីត សាងៀមផុង្ស រដ្ឋមន្ត្រីការបរទេស នៃព្រះរាជាណាចក្រថៃ ក្នុងឱកាសកិច្ចប្រជុំរដ្ឋមន្ត្រីការបរទេសនៃកិច្ចសហប្រតិបត្តិការមេគង្គ-ឡានឆាង លើកទី១០ នៅទីក្រុងអាននីង ខេត្តយូណាន ប្រទេសចិន៕

ដោយ: គង់ លាងហួរ
អន្តរជាតិ: យោងតាមកាសែត South China Morning Post បានរាយការណ៍ថា ប្រទេសចិនកំពុងបន្តជំរុញការវិនិយោគលើហេដ្ឋារចនាសម្ព័ន្ធក្នុងគោលបំណងដើម្បីបង្កើនការដោះដូរពាណិជ្ជកម្មរបស់ខ្លួនជាមួយតំបន់អាស៊ាន ស្របពេលមានភាពតានតឹងពាណិជ្ជកម្មរវាងសហរដ្ឋអាមេរិក និងចិន។

ជាក់ស្តែង ក្រុមហ៊ុនរដ្ឋចិនមួយបានបើកការដ្ឋានពង្រីកកំពង់ផែ Muara ដែលជាកំពង់ផែធំជាងគេបំផុតរបស់ប្រទេសប្រ៊ុយណេ។ នៅពេលការពង្រីកបញ្ចប់រួចរាល់ សមត្ថភាពផ្ទុកទំនិញរបស់កំពង់ផែមួយនេះនឹងកើនឡើងដល់ចំនួន៥០០.០០០ TEU។នេះ​បើ​យោងតាម​ក្រុមប្រឹក្សា​អភិវឌ្ឍន៍​សេដ្ឋកិច្ច​នៃប្រទេសប្រ៊ុយណេ។

ទីភ្នាក់ងារសារព័ត៌មានរដ្ឋចិន Xinhua បានរាយការណ៍ថា គម្រោងខាងលើនេះមានដើមទុនវិនិយោគសរុបចំនួន២ពាន់លានយ័ន (ប្រមាណ២៧៨លានដុល្លារអាមេរិក) ដែលគ្រោងនឹងបញ្ចប់រួចរាល់នៅចុងឆ្នាំ២០២៧ខាងមុខ។

បច្ចុប្បន្ន តំបន់អាស៊ានកាន់តែមានសារៈសំខាន់ជាយុទ្ធសាស្រ្តចំពោះប្រទេសចិន ស្របពេលទីក្រុងប៉េកាំងមានសង្រ្គាមពាណិជ្ជកម្មជាមួយសហរដ្ឋអាមេរិក។ ប្រទេសចិនអាចងាកទៅពឹងផ្អែកលើការនាំចេញទំនិញទៅកាន់ទីផ្សារអាស៊ាន ដើម្បីប៉ះប៉ូវផលប៉ះពាល់ពីការដំឡើងពន្ធគយរបស់សហរដ្ឋអាមេរិក។

យោងតាមទិន្នន័យពីអាជ្ញាធរគយនៃប្រទេសចិនបានបង្ហាញថា ការនាំចេញទំនិញរបស់ប្រទេសចិនទៅកាន់បណ្តាប្រទេសក្នុងសមាគមប្រជាជាតិអាស៊ីអាគ្នេយ៍ ឬហៅកាត់ថា“អាស៊ាន”បានហក់ឡើងក្នុងរង្វង់១៦,៦ភាគរយកាលពីខែកក្កដា។

ដោយឡែក ការនាំចេញទំនិញរបស់ប្រទេសចិនទៅកាន់សហរដ្ឋអាមេរិកបានដាំក្បាលចុះជាង២០ភាគរយនៅខែកក្កដា ឆ្នាំ២០២៥ បើប្រៀបធៀបនឹងរយៈពេលដូចគ្នាកាលពីឆ្នាំមុន។

កំណើននៃការនាំចេញទំនិញរបស់ប្រទេសចិនទៅកាន់តំបន់អាស៊ានបានក្លាយជាប្រភពនៃក្តីបារម្ភរបស់សហរដ្ឋអាមេរិក។ ជាមួយគ្នានេះ ទីក្រុងវ៉ាស៊ីនតោនបានដាក់សម្ពាធមកលើរដ្ឋាភិបាលនានានៅតំបន់អាស៊ានឱ្យបង្ក្រាបលើការក្លែងបន្លំដើមកំណើតទំនិញ៕ប្រភព: SCMP៕