ដោយ ៖ រ៉ាណេត
ភ្នំពេញ ៖ បច្ចុប្បន្ននេះមានមនុស្សជាច្រើន បាន និងកំពុងតែចាប់អារម្មណ៍ចង់ចូលប្រឡូកនៅក្នុងវិស័យអចលនទ្រព្យក្នុងរូបភាពជាភ្នាក់ងារ និងជាអ្នកវិនិយោគ ដោយសារតែសម្លឹងឃើញពីផលប្រយោជន៍ដ៏ធំដែលទទួលបានពីវិស័យមួយនេះ។
វាមិនមែនជារឿងសាមញ្ញ និងអាចទទួលបានប្រយោជន៍យ៉ាងងាយស្រួលនោះទេប្រសិនបើអ្នកមិនមានជំនាញ និងមិនបានសិក្សាពីវិស័យអចលនទ្រព្យឱ្យស៊ីជម្រៅមុនពេលចូលប្រឡូកនៅលើទីផ្សារ។ អ្នកជំនាញ ដែលធ្លាប់មានបទពិសោធន៍នៅក្នុងវិស័យដែលកំពុងតែមានភាពផុសផុលមួយនេះបានចែករំលែកថា មិនថាទោះជាអ្នកចង់អភិវឌ្ឍន៍នៅក្នុងវិស័យមួយនេះក្នុងនាមជាអ្នកវិនិយោគ ឬជាភ្នាក់ងារនោះ ប៉ុន្តែអ្នកគួរតែសិក្សា និងស្វែងយល់ឱ្យបានលម្អិតជាមុនសិនទើបអាចទទួលបានផ្លែផ្កា និងគេចផុតពីហានិភ័យ។
ស្ថាបនិក និងជាអគ្គនាយកគេហទំព័រអចលនទ្រព្យ www.propertyarea.asia និងជាអ្នកវិភាគសេដ្ឋកិច្ច អចលនទ្រព្យ កម្ពុជា ដែលកំពុងតែទទួលបានផ្លែផ្កាពីការចូលប្រឡូកនៅក្នុងវិស័យអចលនទ្រព្យ លោក យិន លាងគង់ បានមានប្រសាសន៍ថា “មុនពេលចូលចាប់អាជីពនៅក្នុងវិស័យនេះ ដំបូងឡើយត្រូវតែរៀនស្វែងយល់ឱ្យបានច្បាស់សិនថា តើអ្វីទៅជាអចលនទ្រព្យ តើអចលនទ្រព្យមានពាក់ព័ន្ធទៅនឹងច្បាប់អ្វីខ្លះ ហើយថាតើគួរមានទំនាក់បែបណា ជាមួយអ្នកណា”។
លោក យិន លាងគង់បានលើកឡើងថា ប្រសិនបើធ្វើជាភ្នាក់ងារ គាត់ត្រូវស្វែងយល់ពីរបៀបវាយតម្លៃ និងមើលពីស្ថានភាពទូទៅនៃអចលនទ្រព្យ ចេះពីបច្ចេកទេសនៃការវាស់វែង យល់ច្បាស់ពីច្បាប់ភូមិបាលដើម្បីងាយស្រួលក្នុងការរៀបចំឯកសារ និងរត់ការ ជាពិសេសមានចំណេះដឹងទូលំទូលាយ ចេះពីរបៀបរបបនៃវិធីសាស្ត្រចរចាជាមួយអតិថិជនដែលវាជារឿងមួយដ៏សំខាន់បំផុត។ នៅក្នុងវិស័យអចលនទ្រព្យ ពួកគាត់ត្រូវធ្វើការ និងចរចាជាមួយអ្នកដែលមានឥទ្ធពល អ្នកដែលមានទ្រព្យច្រើន ដែលទាមទារឱ្យពួកគាត់ធ្វើយ៉ាងណាផ្តល់នូវទំនុកចិត្តខ្ពស់ដល់អតិថិជន។
https://www.facebook.com/vayofm/videos/3511279522279556/
លោក យិន លាងគង់ បានមានប្រសាសន៍ទៀតថា “ក្រៅពីការលើកឡើងខាងលើនេះ គាត់ត្រូវតែកសាងបណ្តាញដែលស្ថិតនៅក្នុងវិស័យរួមគ្នា តាមរយៈការចូលជាសមាជិកនៅក្នុងសមាគមអចលនទ្រព្យណាមួយ ចូលជាសមាជិកនៃបណ្តុំអ្នកជំនួញ ឬក្លិបអ្នកជំនួញ ដើម្បីទទួលបានបណ្តាញកាន់តែច្រើនដើម្បីងាយស្រួលក្នុងការជំរុញមុខជំនួញ និងការងារឱ្យទទួលបានជោគជ័យខ្ពស់”។ ជាមួយគ្នានេះ លោកក៏បានបញ្ជាក់ថា “អ្វីដែលកាន់តែសំខាន់ និងត្រូវតែមានជាចាំបាច់នោះ គឺភាពស្មោះត្រង់ជាមួយនឹងអតិថិជន ក៏ដូចជាភ្នាក់ងារជាដៃគូ ដែលវាជាចំណុចមួយត្រួវតែប្រកាន់ខ្ជាប់មិនអាចខ្វះបាន”។
ពាក់ព័ន្ធទៅនឹងការស្វែងយល់ពីចំណេះ និងជំនាញនៅក្នុងវិស័យអចលនទ្រព្យ បច្ចុប្បន្ននេះ មានសាលាបណ្តុះបណ្តាលជំនាញមួយនេះយ៉ាងទូលាយ ក្រោមកិច្ចសហការរវាងគ្រឹះស្ថានបណ្តុះបណ្តាលឯកជន ជាមួយនឹងសមាគមជំនាញ ជាក់ស្ដែងដូចជាកិច្ចសហការរវាងសាកលវិទ្យាល័យសេដ្ឋកិច្ច និងហិរញ្ញវត្ថុ ជាមួយសមាគមអ្នកវាយតម្លៃ និងភ្នាកងារអចលនវត្ថុកម្ពុជា បើកវគ្គបណ្តុះបណ្តាលវគ្គខ្លីរយៈពេល៣ខែ។ នៅសមាគមអ្នកជំនាញអចលនទ្រព្យកម្ពុជា មានបើកបង្រៀនជំនាញវគ្គខ្លី ហើយក៏មានសាលាអចលនទ្រព្យកម្ពុជា (Real Estate School of Cambodia) ដែលបង្កើតឡើងដោយ CEO Master Club រួមជាមួយនឹងសាលាឯកជនមួយចំនួនដែលបានបង្កើតវគ្គបណ្តុះបណ្តាលជំនាញមួយនេះផងដែរ៕
