ដោយៈគង់ សូរិយា
ភ្នំពេញៈ ក្រុមហ៊ុនវិនិយោគអាកាសយានដ្ឋានអន្តរជាតិភ្នំពេញថ្មី (CAIC)បានចំណាយទឹកប្រាក់ រហូតដល់ជាង១២០លានដុល្លារអាមេរិក សំរាប់មូលដ្ឋានដំបូងៗមុនឈានទៅសាងសង់ព្រលានយន្តហោះនេះ។
គំរោងព្រលានយន្តហោះតម្លៃ១៥០០លានដុល្លារអាមេរិក និងស្ថិតនៅលើផ្ទៃដីទំហំ២៦០០ហិកតានេះ មានទីតាំងស្ថិតនៅស្រុកកណ្តាលស្ទឹង ស្រុកស្អាង ខេត្តកណ្តាល និងស្រុកបាទីខេត្តតាកែវ។
អ្នកឧកញ៉ាពុង ឃាវសែអគ្គនាយកក្រុមហ៊ុន CAIC ដែលបានដឹកនាំព្រលានយន្តហោះនេះបានមានប្រសាសន៍ថា ដើម្បីកសាងព្រលានយន្តហោះនេះ រាជរដ្ឋាភិបាល និងអ្នកឧកញ៉ាពុង ឃាវសែ បានបង្កើតក្រុមហ៊ុនរួមគ្នាមួយឈ្មោះ Cambodia Airport Investment Cooperation’s (CAIC)។
អ្នកឧកញ៉ាបានបន្តថា សម្រាប់ការប្រឹក្សារចនាគូប្លង់ ការខួងគ្រឹះ ការចាក់ដី បង្ហាប់ដី កែលំអរគុណភាពដីចំណាយ រហូតដល់១២០លានដុល្លារអាមេរិក ដែលទំហំកំលាំងពលកម្ម នឹងមានរហូតដល់២០,០០០នាក់ក្នុងមួយថ្ងៃ ហើយការចំណាយនឹងកើនរហូតដល់១,១៥លានដុល្លារអាមេរិកក្នុងមួយថ្ងៃ។
លក្ខណៈពិសេសរបស់ព្រលានយន្តហោះថ្មី
ដំណាក់កាលទី១ នឹងដាក់ឲ្យដំណើរការនៅឆ្នាំ២០២៣ ដែលអាចទទូលអ្នកដំណើរបាន១៣លាននាក់ក្នុងមួយឆ្នាំ។
ការសាងសង់ដំណាក់កាលទី១នេះ រួមមាន ទី១ ការសាងសង់អាគារទទួលអ្នកដំណើរកំពស់៤៥ម៉ែត្រ កំពស់៥ជាន់ និង១ជាន់ក្រោមដី ដែលមានផ្ទៃក្រឡា២៤៣,០០០ម៉ែត្រការ៉េ ដែលអាគារនេះ គ្រោងនឹងបញ្ចប់នៅឆ្នាំ២០២២ ។ ទី២ ការសាងសង់ផ្លូវរត់របស់យន្តហោះ មានប្រវែង៤០០០ម៉ែត្រ និងទទឹង៦០ម៉ែត្រ។ ទី៣ ការសាងសង់អាគារត្រួតពិនិត្យផ្លូវអាកាសរបស់យន្តហោះមានកំពស់១០៨ម៉ែត្រ គ្រោងនឹងបញ្ចប់២០២២ ទី៤ ការសាងសង់អាគារផ្សេងៗប្រមាណ ៤០អាគារ រួមមានស្ថានីយ៍អ្នកដំណើរ VIP ទីតាំងស្តុកកាកសំណង់ ទីតាំងស្តុកប្រេង ទីតាំងជួសជុលរថយន្ត ងទីតាំងស្តុកទំនិញ និងស្ថានីយ៍ពន្លត់អគ្គិភ័យជាដើម។
ការសាងសង់ព្រលានយន្តហោះ ដំណាក់កាលទី២ នៅឆ្នាំ២០៣០ ដែលអាចទទួលអ្នកដំណើរ៣០លាននាក់ និងដំណាក់កាលទី៣បញ្ចប់នៅឆ្នាំ២០៥០ ដែលមានសមត្ថភាពទទូលអ្នកដំណើរ៥០លាននាក់ក្នុងមួយឆ្នាំ។
អ្នកឧកញ៉ាពុង ឃាវសែបានបន្តថា “ព្រលានយន្តហោះថ្មីនេះ នឹងលើកមុខមាត់កម្ពុជាទាំងក្នុងវិស័យអាកាសចរណ៍ វិស័យពាក់ព័ន្ឋ និងរូមចំណែកជំរុញកំនើនសេដ្ឋកិច្ចជាតិ” ។ អ្នកឧកញ៉ាបន្ថែមថា “បច្ចុប្បន្ន ការអភិវឌ្ឍសាងសង់ព្រលានយន្តហោះនេះបានឆ្ពោះទៅមុខតាមផែនការ និងនៅឆ្នាំ២០២៣ ផ្លូវរត់របស់ព្រលានយន្តហោះនេះ អាចរូចមួយឬពីរខ្សែ ក្នុងចំណោមផ្លូវរត់របស់យន្តហោះចំនួន៤” ៕
