ដោយៈ រ៉ាណេត
កំពតៈ ខេត្តកំពតត្រូវបានក្លាយទៅជាគោលដៅ ដ៏ទាក់ទាញរបស់អ្នកវិនិយោគ និងអភិវឌ្ឍន៍ ក្នុងវិស័យអចលនទ្រព្យជាច្រើន ខណៈគម្រោងសាងសង់មួយចំនួនកំពុងដំណើរការដែលកាន់តែធ្វើឱ្យតម្លៃដី នៅលើទីផ្សារមានការឡើងជាបន្តបន្ទាប់។
ទោះជាយ៉ាងណាក៏ដោយណ អ្នកប្រតិបត្តិផ្នែកដីធ្លី និងកំពុងរស់នៅក្នុងខេត្តមួយនេះអះអាងថា តម្លៃដីថ្លៃខ្ពស់ទៅតាមតំបន់ប៉ុណ្ណោះ ព្រោះនៅតំបន់ខ្លះដីតម្លៃក្រោម២០ដុល្លារក្នុងមួយម៉ែត្រការ៉េក៏មានដែរ។
លោកសុខ ប៊ុនធឿន ដែលជាប្រតិបត្តិករផ្នែកដីធ្លីនៅក្នុងខេត្តកំពត បានប្រាប់ឱ្យដឹងនៅល្ងាចថ្ងៃទី៣០ ខែមេសា ឆ្នាំ២០២១ថា នៅក្នុងខេត្តកំពតមានគម្រោងអភិវឌ្ឍន៍ជាច្រើនជាពិសេសនៅតំបន់ជាយក្រុង ជាពិសេសគម្រោងបណ្តុំលំនៅដ្ឋាន ហើយក្រៅពីនេះជាគម្រោងអភិវឌ្ឍន៍ ជាកន្លែងកម្សាន្តធម្មជាតិកែច្នៃ និងមានការសាងសង់ផ្ទះលំហែរលក់ផងដែរ។
លោកបន្តថា កាលពីដើមឆ្នាំ២០២១ មានការផ្អើលតាមគ្នាទៅលើគម្រោងបង្កើតក្រុងបូកគោថ្មី ដែលធ្វើឱ្យតៃម្លដីមួយចំនួនឡើងថ្លៃភ្លាមៗ ជាពិសេសដីនៅក្នុងឃុំមួយចំនួនដែកត្រូវបានកាត់ចូលក្រុង ដែលស្ថិតនៅក្នុងស្រុកទឹកឈូ ខណៈដីដែលធ្លាប់តែលក់មួយឡូតិ៍ទំហំ៥x២០ម៉ែត្រតម្លៃត្រឹម១ម៉ឺនដុល្លារសោះ ឡើងដល់១៣០០០-១៥០០០ដុល្លារភ្លាម ហើយដីដែលស្ថិតនៅក្រុងបូកគោ ក្បែរភ្នំបូកគោក៏មិនថោកនោះដែរ។
លោកប៉ុនធឿន បន្តថា នៅពេលមានគម្រោងអភិវឌ្ឍន៍ណាមួយកើតឡើង តម្លៃដីក៏ឡើងភ្លាម បើទោះជាគម្រោងសាងសង់មួយចំនួន មិនទាន់បង្ហាញរូបរាងផងនោះ រហូតមានអ្នកខ្លះ ដីដែលជាចម្ការដាំធុរ៉េន ដាំស្វាយ ប្រែក្លាយទៅជាដីឡូតិ៍ក៏មានដែរ។
យ៉ាងណាក៏ដោយលោកបានបញ្ជាក់ថា ដីនៅក្នុងខេត្តកំពតមិនមែនឡើងថ្លៃខ្ពស់ទាំងអស់នោះទេ ពោលគឺនៅតំបន់ខ្លះដីមានតម្លៃ មិនដល់២០ដុល្លារក្នុងមួយម៉ែត្រការ៉េក៏មាន ប៉ុន្តែដីទាំងនោះភាគច្រើន មានទំហំធំចាប់ពី៥ហិកតាឡើងទៅ ហើយត្រូវបានគេទិញសម្រាប់ធ្វើជាចំការធុរ៉េន ចំការស្វាយជាដើម ព្រោះស្ថិតនៅឆ្ងាយពីក្រុងបន្តិច និងចូលពីផ្លូវធំទៅក្នុងជ្រៅក្បែរតំបន់ជើងភ្នំ៕
