ដោយៈ គង់ សូរិយា

    កោះកុងៈ លោកបណ្ឌិត អ៊ុក ភ័ក្រ្តា អភិបាលរង នៃគណៈអភិបាលខេត្តកោះកុង បានដឹកនាំក្រុមការងារខេត្ត ទទួលស្វាគមន៍លោក Li Shengbin អនុប្រធានការិយាល័យ កិច្ចការបរទេសនៃរដ្ឋបាលប្រជាជនខេត្តហេឡុងជាំង នៃសាធារណរដ្ឋប្រជាមានិតចិនដើម្បីពង្រីកកិច្ចសហប្រតិបត្តិការលើវិស័យពាណិជ្ជកម្ម ការវិនិយោគជាដើម។

ជំនួបនេះមានគោលបំណងជួបពិភាក្សាការងារ ស្តីពីការជំរុញការផ្លាស់ប្តូរកិច្ចសហប្រតិបត្តិការ ស៊ីជម្រៅ ព្រមទាំងសិក្សាពីកាលានុវត្តភាព និងសក្តានុពលផ្សេងៗ ដើម្បីធ្វើការវិនិយោគ លើវិស័យសេដ្ឋកិច្ច ពាណិជ្ជកម្ម វប្បធម៌ និងទេសចរណ៍ រវាងខេត្តកោះកុងនៃព្រះរាជាណាចក្រកម្ពុជា និងខេត្តហេឡុងជាំង នៃសាធារណរដ្ឋប្រជាមានិតចិន នៅអគារពាណិជ្ជកម្ម នារាជធានីភ្នំពេញ។

ក្នុងជំនួបពិភាក្សាភាគីចិននេះ បានចាប់អារម្មណ៍លើភូមិសាស្រ្តខេត្តកោះកុង ក្នុងនោះវិស័យទេសចរណ៍ និងកសិកម្ម ត្រូវបានរដ្ឋបាលខេត្តស្នើសុំគាំទ្រលើបច្ចេកទេស និងការវិនិយោគផងដែរ៕

ដោយៈ ម៉ាល័យ

    ភ្នំពេញៈ ប្រទេសកម្ពុជា-ថៃមានភាពតានតឹង តើជើងហោះហើររវាងភ្នំពេញ-បាងកកមានសភាពយ៉ាងណា នេះជាសំណួរយ៉ាងរសើប។

យោងតាមផេកមួយដែលដាក់ឈ្មោះថាយន្តហោះបានបង្ហោះព័ត៌មានឲ្យដឹងថា ផ្លូវហោះហើររវាងទីក្រុងទាំងពីរ គឺជាទិសដៅមមា​ញឹកជាងគេបំផុតសម្រាប់កម្ពុជា ដែលពេលខ្លះមានរហូត15ជើង ក្នុងមួយថ្ងៃ(ភ្នំពេញ – បាងកក) ប៉ុន្តែមួយរយៈចុងក្រោយនេះស្ថានភាពមានការប្រែប្រួល ទោះបីក្រុមហ៊ុនទាំងអស់ (ទាំងអស់ដែលធ្លាប់ហោះមុនភាពតានតឹង) នៅតែបន្តមានវត្តមានហោះដដែល។

ជាក់ស្តែងក្រុមហ៊ុនដែលកំពុងហោះហើរលើទិសដៅនេះ រួមមានSky Angkor Airlines ,Cambodia Airways, Air Cambodia,Thai VietJet ,Thai AirAsia ,Thai Airways

និងBangkok Airways។

ផេកដដែលបានបញ្ជាក់ថា ប៉ុន្តែមួយរយៈចុងក្រោយនេះ ជើងហោះហើរ រវាងប្រទេសទាំងពីរមានការប្រែប្រួលខ្លាំង ដែលសម្គាល់ឃើញលើទិដ្ឋភាពមួយចំនួនដូចជា ទី១. តម្លៃមានការធ្លាក់ជាងមុន នេះបង្ហាញពីតម្រូវការទាប ការប្រកួតប្រជែងខ្ពស់ ទី២ កាត់បន្ថយជើងហោះហើរមួយចំនួនធំ។ ក្រុមហ៊ុនបន្តមានវត្តមានហោះ តែបន្ថយជើងហោះហើរ។

ជាមួយគ្នានេះSky Angkor Airlines បន្ថយជើងហោះហើរមួយចំនួន ដោយពីមុនមាន 3ជើងក្នុងមួយថ្ងៃ បន្ថយមកថ្ងៃខ្លះមាន 2ជើងនិងថ្ងៃខ្លះមាន1ជើង។ ក្រុមហ៊ុនCambodia Airways នៅរក្សាលំនឹងបានដដែល ដោយថ្ងៃខ្លះមាន 2ជើងនិងថ្ងៃខ្លះមាន1ជើង ក្រុមហ៊ុនAir Cambodia រក្សាលំនឹងបានដដែល ដោយថ្ងៃខ្លះមាន2ជើងនិងថ្ងៃខ្លះមាន1ជើង។

ចំណែកThai VietJet មិនមានការប្រែប្រួល ក្រុមហ៊ុន

Thai AirAsia បន្ថយពី 2ជើង មកត្រឹម1ជើង ក្រុមហ៊ុន

Thai Airways រក្សាជើងហោះហើរដដែល ដោយមាន2ជើងក្នុងមួយថ្ងៃ និងក្រុមហ៊ុនBangkok Airways បន្ថយមកត្រឹម 2ជើងក្នុងមួយថ្ងៃ៕

ដោយៈ និស្ស័យ

ព្រះសីហនុៈ លោកបណ្ឌិតSanto Darmosumarto ឯកអគ្គរដ្ឋសាធារណរដ្ឋឥណ្ឌូនេស៊ីប្រចាំកម្ពុជា បានស្នើសុំកិច្ចសហប្រតិបត្តិការចំនួន៣ចំណុចជាមួយអភិបាលខេត្តព្រះសីហនុ។

សំណើរនេះ ត្រូវបានលើកឡើងក្នុងពេលអភិបាលនៃគណៈអភិបាលខេត្តព្រះសីហនុ លោកម៉ាង ស៊ីណេត បានស្វាគមន៍ឯកឧត្តមស្ថានទូតឥណ្ឌូនេស៊ី និងសហការរី ដែលបានមកកាន់ខេត្តព្រះសីហនុ ហើយឆ្នាំ២០២៥ ជាខួបលើកទី៦៦ នៃទំនាក់ទំនងការទូតរវាងប្រទេសទាំងពីរ មានភាពល្អ និងស្អិតរមួត ទន្ទឹមនោះឯកឧត្តម អភិបាលខេត្ត ក៏បានជំរាបជូនពីសក្តានុពលភូមិសាស្ត្រ និងវិទ្យាសាស្ត្ររបស់ខេត្តព្រះសីហនុ មានការអភិវឌ្ឍរីកចម្រើនយ៉ាងឆាប់រហ័ស លើវិស័យហេដ្ឋារចនាសម្ព័ន្ធរូបវន្ត។

លោកបន្តថា ហេដ្ឋារចនាសម្ព័ន្ឋទាំងនោះ មានដូចជាហេដ្ឋារចនាសម្ព័ន្ធ ផ្គត់ផ្គង់អគ្គិសនី ទឹកស្អាត និងការដឹកជញ្ជូន ជាពិសេសកំពង់ផែទឹកជ្រៅ អាកាសយានដ្ឋានអន្តរជាតិ ផ្លូវល្បឿនលឿន និងផ្លូវដែកជាដើម ដែលសមស្របសម្រាប់ការវិនិយោគ។ លើសពីនេះស្របតាមទិសដៅ នៃការអភិវឌ្ឍផែនការមេ អភិវឌ្ឍខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង បានកំណត់ផែនការវិនិយោគសាធារណៈ ជាប្រព័ន្ធតាមដំណាក់កាលច្បាស់លាស់រហូតដល់ឆ្នាំ២០៣៨ ដោយរដ្ឋបាលខេត្តបានរៀបចំជា ៤តំបន់ធំៗ ទី១.ឧស្សាហកម្ម និងដឹកជញ្ជូន ២.ទីក្រុងសមាហរណកម្ម ពាណិជ្ជកម្ម តំបន់ស្នាក់នៅ និងហិរញ្ញវត្ថុអន្តរជាតិ ៣.តំបន់កោះ រៀបចំជាតំបន់ទេសចរណ៍អន្តរជាតិ ៤.រុញច្រានខេត្តព្រះសីហនុ ជាមជ្ឈមណ្ឌលពាណិជ្ជកម្ម ឧស្សាហកម្មតភ្ជាប់ទៅនឹងបណ្តាខេត្តនានា ក្នុងព្រះរាជាណាចក្រកម្ពុជា និងទៅកាន់ពិភពលោក។

ជាមួយគ្នានេះលោកបណ្ឌិត សានតូ ដាម៉ូស៊ូម៉ាតូ Santo Darmosumarto ឯកអគ្គរដ្ឋទូតសាធារណរដ្ឋឥណ្ឌូនេស៊ី ប្រចាំព្រះរាជាណាចក្រកម្ពុជា ថ្លែងអំណរគុណលោកអភិបាលខេត្ត និងសហការីដែលបានឱ្យលោកចូលជួបសម្តែងការគួរសម និងពិភាក្សា ក្រោមការដឹកនាំរបស់ឯកឧត្តមធ្វើឱ្យខេត្តព្រះសីហនុ មានការអភិវឌ្ឍរីកចម្រើន។

លោកបញ្ជាក់ថា “ស្ថានទូតបានត្រៀមរួចរាល់ ធ្វើការជាមួយរដ្ឋបាលខេត្តព្រះសីហនុ ក្នុងកិច្ចសហការជាមួយរាជរដ្ឋាភិបាល និងប្រជាជន យើងមានចំណុចចំនួន៣”។

កិច្ចសហការនោះ ត្រូវលើកយកមកពិភាក្សានាពេលនេះ ១.កិច្ចសហប្រតិបត្តិការផ្នែកសេដ្ឋកិច្ច ឆ្នាំមុនពាណិជ្ជកម្មទ្វេរភាគីរវាងឥណ្ឌូនេស៊ី និងកម្ពុជា មានការកើនឡើងដល់១០០០លានដុល្លាអាមេរិក ឥណ្ឌូនេស៊ីជាដៃគូរពាណិជ្ជកម្ម ធំជាប់ចំណាត់ថ្នាក់លេខ១២ ខេត្តព្រះសីហនុ ជាខេត្តមួយដែលមានសក្តានុពល ក្នុងការពង្រឹងកិច្ចសហប្រតិបត្តិការខាងពាណិជ្ជកម្ម ពាក់ព័ន្ធទៅនឹងច្រកទ្វារកំពង់ផែអន្តរជាតិ មានការទាក់ទងទៅនឹងការនាំនូវផលិតផល ឥណ្ឌូនេស៊ីមកកាន់កម្ពុជា ហើយយើងមានការរីករាយ ដែលកំពង់ផែក្រុងព្រះសីហនុ ត្រូវបានពង្រីកកាន់តែមានជម្រៅទឹកជ្រៅ។

ទី២ ទាក់ទងទៅនឹងទីផ្សារធំមួយ នៅក្នុងខេត្តព្រះសីហនុ ផលិត​ផលឥណ្ឌូនេស៊ី ដែលជាសេវាកម្មធ្វើឱ្យជនជាតិឥណ្ឌូនេស៊ី មានភាពងាយស្រួលក្នុងការរស់នៅ និងណែនាំផលិតផលឥណ្ឌូនេស៊ីមកកាន់ប្រជាជនកម្ពុជា ហើយក៏មានអ្នកវិនិយោគទុនជនជាតិឥណ្ឌូនេស៊ី មកធ្វើការវិនិយោគរួមទាំងវិស័យបដិសណ្ឋាកិច្ច ធ្វើឱ្យសេដ្ឋកិច្ចខេត្តព្រះសីហនុមានការរីកចម្រើនកាន់តែខ្លាំង ការរីកចម្រើននេះ ប្រសិនបើមិនមានការគាំទ្រពីរាជរដ្ឋាភិបាល និងរដ្ឋបាលខេត្តព្រះសីហនុ ផ្តល់ដោយសុវត្ថិភាព សន្តិភាពមានភាពងាយ ស្រួលក្នុងការធ្វើអាជីវកម្ម ហើយយើងឃើញមានរីហ្សត កំពង់ដឺវ៉ា កំពុងសាងសង់កាន់តែធំ បង្ហាញពីទំនាក់ ទំនងកម្ពុជា និងឥណ្ឌូនេស៊ី។

ទី៣ ជនជាតិឥណ្ឌូនេស៊ី រស់នៅខេត្តព្រះសីហនុ មានប្រជាជនឥណ្ឌូនេស៊ីមានច្រើន ក្នុងចំណោមប្រជាជនរស់នៅកម្ពុជាជាង១សែននាក់ ក្នុងនោះខេត្តព្រះសីហនុ មានចំនួន៤៣,០០០នាក់ផងដែរ។

លោកឯកអគ្គរដ្ឋទូតឥណ្ឌូនេស៊ី បានស្នើសុំគាំទ្រស្តីពីការពារពាជនជាតិឥណ្ឌូនេស៊ី នៅក្នុងខេត្តព្រះសីហនុ និងសុំជួយពន្លឿនការធ្វើមាតុភូមិនិវត្តន៍ជនជាតិឥណ្ឌូនេស៊ី ទៅកាន់ប្រទេសកំណើតវិញ។ ទន្ទឹមនោះ ពួកគាត់ក៏មានបញ្ហាផ្នែកសុខភាព កន្លងមកស្ថាតទូកតែងតែលើកទឹកចិត្តសហគមន៍ឥណ្ឌូនេស៊ី ដែលរស់នៅលើទឹកដីកម្ពុជាដោយធ្វើទំនាក់ទំនងគ្នា កាន់តែល្អជាមួយប្រជាជនកម្ពុជា។

ជាការឆ្លើយតបលោកអភិបាលខេត្ត បានទទួលយកនូវការស្នើសុំ និងសុំកិច្ចសហការផ្នែកសេដ្ឋកិច្ច ការធ្វើពាណិជ្ជកម្មមានការកើនឡើង។ ស្វាគមន៍ការស្នាក់នៅ ធ្វើការងារ និងទេសចរណ៍ និងវិនិយោគនៅខេត្តព្រះសីហនុ និងសូមជួយបន្តផ្សព្វផ្សាយ និងធ្វើការអំពាវនាវអ្នកវិនិយោគឥណ្ឌូនេស៊ី មកធ្វើការវិនិយោគនៅខេត្តព្រះសីហនុ៕

(សៀមរាប)៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា នៅព្រឹកថ្ងៃទី២៣ ខែមិថុនា ឆ្នាំ២០២៥នេះ បានប្រៀបធៀបការឆ្លើយតបរបស់កម្ពុជា ជាមួយការប្រមាថ និងគំរាមកំហែងរបស់ក្រុមយោធាថៃ ដូចជាសត្វពស់ ដែលមិននិយាយស្ដីអ្វីច្រើនឡើយ តែបើមិនស្រួលចឹកសម្លាប់ចោលតែម្ដង។

ក្នុងឱកាសអញ្ជើញជាអធិបតី​បិទកិច្ចប្រជុំគណៈកម្មាធិការកណ្តាលសហភាពសហព័ន្ធយុវជនកម្ពុជា ដែលបានធ្វើឡើងនៅទឹកដីអង្គរនៃខេត្តសៀមរាប សម្ដេចមហាបវរធិបតី ហ៊ុន ម៉ាណែត បានអះអាងថា កម្ពុជារក្សានូវជំហរទន់ភ្លន់ តែក៏ត្រូវឆ្លើយតបភ្លាមៗដើម្បីការពារកិត្តិយស និងសេចក្ដីថ្លៃថ្នូររបស់កម្ពុជាផងដែរ។

សម្ដេចមហាបវរធិបតី ហ៊ុន ម៉ាណែត បានមានប្រសាសន៍យ៉ាងដូច្នេះថា «កម្ពុជាយើងមានភាពទន់ភ្លន់របស់យើង ប៉ុន្ដែបើអ្នកឯងបំពាន យើងត្រូវតែឆ្លើយតប យើងមានសមត្ថភាពគ្រប់គ្រាន់ ក្នុងការដាក់ចេញវិធានការ ដើម្បីការពារមុខមាត់ជាតិ និងអធិបតេយ្យជាតិ។ យើងប្រើវិធីដូចពស់ អត់មានទេនៅស្ងៀម តែមករញ៉ែរញ៉ៃចឹកងាប់បាត់។ អ្នកណាជាអ្នកចាប់ផ្ដើមជាឯកតោភាគីបែបនេះ មិនមែនកម្ពុជា កម្ពុជាមិនចង់ប្រើទេព្រោះបង្កការលំបាកដល់ប្រជាពលរដ្ឋតាមព្រំដែន ប៉ុន្ដែបើអ្នក (ថៃ) ធ្វើយើងធ្វើ»។

វិធានការឆ្លើយតបបន្ទាន់របស់កម្ពុជា ដែលរក្សាភាពស្ងៀមស្ងាត់ប្រៀបដូចជាពស់ ដែលសម្ដេចមហាបវរធិបតី ហ៊ុន ម៉ាណែត បានលើកឡើងនោះ ដូចជាការបិទបើកច្រកទ្វារព្រំដែន ភាគីថៃបានសម្រេចដោយឯកតោភាគី អនុវត្តបើកនៅម៉ោង៨ព្រឹក បិទនៅម៉ោង៤ល្ងាច ដោយមិនជូនដំណឹងមកកម្ពុជា តែរំលងបានមួយយប់កម្ពុជាឆ្លើយតបវិញ ដោយបើកនៅម៉ោង៩ព្រឹក និងបិទនៅម៉ោង៤ល្ងាច។ នៅពេលនេះធ្វើភាគីថៃមានការងឿងឆ្ងល់ជាខ្លាំង ដែលកម្ពុជាមិនទាន់បើកច្រកនៅម៉ោង៨ ដោយរង់ចាំរហូតដល់ម៉ោង៩ព្រឹក។

ចំពោះករណីគំរាមផ្ដាច់ភ្លើង និងផ្ដាច់អ៉ីនធ័រណេតវិញ ក្រុមយោធាថៃបានដាក់សម្ពោធមករាជរដ្ឋាភិបាលកម្ពុជា តាមរយៈសារព្រមានផ្ដាច់បណ្ដាញទាំងពីរនេះ មិនឲ្យផ្គត់ផ្គង់មកពលរដ្ឋប្រើប្រាស់នៅតាមព្រំដែន។ គ្រាន់តែឮការព្រមានបែបនេះ កម្ពុជាមិនទាន់មានការឆ្លើយតប ឬបញ្ចេញសារត្រឡប់ទៅថៃវិញឡើយ ដោយសម្ដេចបញ្ជាឲ្យមន្ដ្រីជំនាញ និងអាជ្ញាធរខេត្តជាប់ព្រំដែន កាត់ផ្ដាច់ចោលភ្លើង និងអ៉ីនធ័រណេតមកពីប្រទេសថៃទាំងអស់ ហើយងាកមកប្រើប្រាស់បណ្ដាញរបស់ជាតិ និងអ៉ីនធ័រណេតក្នុងស្រុកវិញដោយមិនមានបញ្ហាចោទឡើយ។

មួយវិញទៀត ចំពោះបណ្ដឹង៤ចំណុចទៅកាន់តុលាការយុត្តិធម៌អន្ដរជាតិ ICJ ពាក់ព័ន្ធតំបន់មុំ៣ ប្រាសាទមាន់តូច ប្រាសាទតាមាន់ធំ និងប្រាសាទតាក្របី, ក្រោយសិក្សាល្អិតល្អន់ថាមិនមានលទ្ធភាពទៅសួរក្នុងការជជែកទ្វេរភាគីតាមរយៈយន្ដការ JBC សម្ដេចមហាបវរធិបតី ហ៊ុន ម៉ាណែត បន្ទាប់ពីមានការគាំទ្រយ៉ាងពេញទំហឹងក្នុងសមាជរដ្ឋសភា-ព្រឹទ្ធសភា សម្រេចប្ដឹងទៅតុលាការយុត្តិធម៌អន្ដរជាតិ ដោយមិនបានជូនដំណឹងទៅភាគីថៃនោះឡើយ។

ដោយឡែក ចំពោះវិធានការថ្មីៗមួយទៀតចុងក្រោយនេះ ភាគីថៃបានគំរាមកាត់ផ្ដាច់ការផ្គត់ផ្គង់ប្រេងដល់កម្ពុជា ដើម្បីដាក់សម្ពាធកាន់តែធ្ងន់ក្នុងរយៈពេលមួយខែ ប៉ុន្ដែក្រោយការប្រកាសប៉ុន្មានម៉ោង រាជរដ្ឋាភិបាលកម្ពុជា បានដាក់ចេញវិធានការវាយបកវិញ ដោយបញ្ឈប់ការនាំចូលប្រេង និងឧស្ម័នពីប្រទេសថៃ ចាប់ពីម៉ោងសូន្យឈានចូលថ្ងៃទី២៣ ខែមិថុនា ឆ្នាំ២០២៥នេះតែម្ដង កុំរង់ចាំភាគីថៃផ្ដាច់ទាន់។

បើតាមប្រសាសន៍របស់សម្ដេចមហាបវរធិបតី ហ៊ុន ម៉ាណែត, ការសម្រេចចិត្តដោយឯកតោភាគីក្រោយការតានតឹងដាក់គ្នាលើបញ្ហាព្រំដែន គឺភាគីថៃជាអ្នកសម្រេចចិត្តមុនកម្ពុជាទាំងអស់ ហើយកម្ពុជាគ្រាន់តែដើរជំហ៊ានបន្ទាប់មួយ ដើម្បីបញ្ជាក់អំពីជំហរម្ចាស់ការរបស់ខ្លួនប៉ុណ្ណោះ ដើម្បីការពារមុខមាត់ជាតិ អធិបតេយ្យ និងបូរណភាពទឹកដី និងបង្ហាញអំពីការទទួលខុសត្រូវចំពោះប្រជាពលរដ្ឋ។

ក្នុងន័យនេះ សម្ដេចមហាបវរធិបតី ហ៊ុន ម៉ាណែត បានសង្កត់ធ្ងន់ថា រាល់ការសម្រេចចិត្តឆ្លើយតបវិធានការណាមួយរបស់រាជរដ្ឋាភិបាលកម្ពុជា គឺមិនមែនធ្វើដោយភាពកត់ក្រហលនោះទេ ពោលបានសិក្សា និងគិតគូរយ៉ាងម្មត់ចង់គ្រប់ជ្រុងជ្រោយ។ សម្ដេចបង្ហើបថា កម្ពុជានៅមានសន្លឹកបៀរច្រើនទៀតដែលត្រូវលេងជាមួយភាគីថៃ ប្រសិនបើថៃចង់លេងបន្ដទៀត គឺកម្ពុជាអាចកំដរបានគ្រប់ពេល៕

ដោយ: គង់ លាងហួរ
អន្តរជាតិ: ទីក្រុងហូជីមិញនៃប្រទេសវៀតណាមបានប្រកាសផែនការបង្កើតមជ្ឈមណ្ឌលហិរញ្ញវត្ថុខ្នាតអន្តរជាតិក្នុងសង្កាត់លេខ១ និងតំបន់ Thu Thiem ក្រោមទំហំទឹកប្រាក់វិនិយោគចំនួន១៧២ទ្រីលានដុង (ប្រហែល៧ពាន់លានដុល្លារអាមេរិក)។

មជ្ឈមណ្ឌលហិរញ្ញវត្ថុខ្នាតអន្តរជាតិនេះនឹងលាតសន្ធឹងលើផ្ទៃដីទំហំ៧៨៣ហិកតា ស្ថិតនៅក្នុងតំបន់ចំនួន២ទល់មុខគ្នាដែលត្រូវបានពុះចែកដោយទន្លេ Saigon។

ដំណាក់កាលទី១ នៃគម្រោងនេះនឹងលាតសន្ធឹងលើដីទំហំ៩ហិកតាស្ថិតនៅក្នុងតំបន់ Thu Thiem។ បច្ចុប្បន្ន ផែនការលម្អិតរបស់ទីក្រុងហូជីមិញកំពុងត្រូវបានត្រួតពិនិត្យដោយរដ្ឋាភិបាលកណ្តាលរបស់វៀតណាមនៅរដ្ឋធានីហាណូយ។

ដំណាក់កាលទី១នេះ គ្រោងនឹងចំណាយពេលសាងសង់ប្រមាណ២ឆ្នាំ ឬ៣ឆ្នាំ ដោយគ្រោងចំណាយទុនវិនិយោគ១៦ទ្រីលានដុង ដោយទុនចំនួន២ទ្រីលានដុងបានមកពីរដ្ឋាភិបាល ហើយចំណែកដែលនៅសេសសល់បានមកពីបណ្តាអ្នកវិនិយោគ។

ក្រៅពីការកសាងហេដ្ឋារចនាសម្ព័ន្ធ និងក្របខ័ណ្ឌបទប្បញ្ញត្តិ ទីក្រុងហូជីមិញក៏កំពុងបង្កើតយុទ្ធសាស្រ្តធនធានមនុស្សសម្រាប់ចាក់បញ្ចូលទៅកាន់មជ្ឈមណ្ឌលនេះផងដែរ។

កម្មវិធីបណ្តុះបណ្តាលចំនួន៥ នឹងចាប់ផ្តើមនៅឆ្នាំ២០២៥ ហើយទីក្រុងហូជីមិញបានបញ្ជូនមន្ត្រីរបស់ខ្លួនទៅសិក្សាគម្រូនៃការបង្កើតមជ្ឈមណ្ឌលហិរញ្ញវត្ថុខ្នាតអន្តរជាតិនៅប្រទេសអង់គ្លេស ទីក្រុងហុងកុង ចិនដីគោក និងប្រទេសកាហ្សាក់ស្ថាន។

មជ្ឈមណ្ឌលហិរញ្ញវត្ថុខ្នាតអន្តរជាតិនៅក្នុងទីក្រុងហូជីមិញនឹងផ្តល់ជូននូវផលិតផល និងសេវាកម្មជាច្រើន រួមទាំងធនាគារ ទីផ្សារមូលធន ដែលផ្សារភ្ជាប់ទៅនឹងការគ្រប់គ្រងទ្រព្យសម្បត្តិ និងមូលនិធិ និងអ្វីៗជាច្រើនទៀត៕

ដោយៈ គង់ សូរិយា

    ភ្នំពេញៈ វត្តមានអាគារខ្ពស់កប់ពពក កំពស់២៨ជាន់FTB Towerបាននិងកំពុងបង្អួតសម្រស់ នៅតំបន់ពាណិជ្ជកម្មដ៏មមា​ញឹក កណ្តាលរាជធានីភ្នំពេញបណ្តើរៗហើយ។

អាគារកំពស់២៨ជាន់នេះ ស្ថិតនៅលើមហាវិថីសហព័ន្ឋរុស្ស៊ី ទីកន្លែងដែលបណ្តុំដោយអាគារខ្ពស់ៗកប់ពពក ជាការិយាល័យកណ្តាលរបស់ធនាគារFTB។

កាលពីព្រឹកថ្ងៃទី២០ ខែមិថុនា ឆ្នាំ២០២៥ ថ្នាក់ដឹកនាំធនាគារ FTB បានអញ្ជើញធ្វើដំណើរទស្សនៈកិច្ច ពីដំណើរការសាងសង់អគារការិយាល័យកម្រិតA របស់អគារFTB Tower និងការចូលរួមទស្សនកិច្ចដោយផ្ទាល់នៅទីតាំងអគារ FTB Tower ពីអ្នកឧកញ៉ាលាង ពៅ (ភីធើរ) អគ្គនាយកនៃ ក្រុមហ៊ុនជីប ម៉ុង អ៊ីនស៊ី ស៊ីមេន ខបភើរេសិន លោកជំទាវ គឹម ចាន់ថា អគ្គនាយិកាក្រុមហ៊ុន ជីប ម៉ុង អ៊ីនដាស្ទ្រីស៍ និងថ្នាក់ដឹកនាំ ក្រុមហ៊ុនអឹមអេសអិនអេច អ៊ិនវេសម៉ិន ឯ.ក  (MSNH Investment Co., Ltd) ។

ការសាងសង់អគារថ្មីរបស់ធនាគារFTB Towerមានផ្ទៃអគារសរុប 77,593 ម៉ែត្រការ៉េ និងមានកម្ពស់28ជាន់ ដែលជាការសហការរវាង ក្រុមហ៊ុនអិមអេសអិនអេច អ៊ិនវេសម៉ិន (MSNH) ដោយប្រើប្រាស់បេតុងរបស់ក្រុមហ៊ុន ជីប​ ម៉ុង​ អ៊ីនដាស្ទ្រីស៍ ដែលជាប្រភេទ ស៊ីម៉ងត៍អូដ្ឋ ទទួលស្គាល់លើគុណភាពដ៏ល្អបំផុត ក្នុងការសាងសង់អគារ។

ធនាគារពាណិជ្ជកម្មក្រៅប្រទេស នៃកម្ពុជា(FTB) និងក្រុមហ៊ុនអឹមអេសអិនអេច អ៊ិនវេសម៉ិនឯ.ក  (MSNH Investment Co., Ltd) បានរៀបចំពិធីបញ្ចប់ ការសាងសង់គ្រោងអគារ FTB Tower ដែលជាទីស្នាក់ការកណ្តាលថ្មីរបស់ខ្លួន កាលពីថ្ងៃទី១២ ខែឧសភា ឆ្នាំ២០២៥ កន្លងទៅនេះ៕