ដោយៈ គង់ សូរិយា

    ភ្នំពេញៈ ក្រុមការងារជំរុញការវិនិយោគក្នុងខេត្តព្រះសីហនុ បានប្រជុំពិភាក្សាលើគម្រោងវិនិយោគ និងធុរកិច្ច ដែលស្នើការលើកទឹកចិត្តពិសេស ដោយបានសម្រេចជាគោលការណ៍ផ្តល់ការលើកទឹកចិត្ត ការអនុគ្រោះ និងការសម្រួលនីតិវិធីចំនួន៣៥គម្រោង ដែលមានទឹកប្រាក់៣២៧លានដុល្លារអាមេរិក។

គំរោងទាំងនោះរួមមាន គម្រោងពាក់ព័ន្ធនឹងអគារជាប់គាំងចំនួន២២ គម្រោងថ្មីចំនួន១២ និងគម្រោងមានស្រាប់ចំនួន១ ដែលមានទុនវិនិយោគប្រមាណ៣២៧លានដុល្លារអាមេរិក និងប៉ាន់ស្មានអាចបង្កើតការងារប្រមាណ៣៣៦៣កន្លែង។

គម្រោងទាំង ៣៥នោះ មានជាអាទិ៍ គម្រោងបង្កើតតំបន់សេដ្ឋកិច្ចពិសេស គម្រោងបង្កើតសួនឧស្សាហកម្ម រោងចក្រកែច្នៃចំណីសត្វរោងចក្រផលិតសម្ភារៈប្រើប្រាស់ក្នុងផ្ទះ គម្រោងសណ្ឋាគារ គម្រោងផ្ទះលំហែ និង អគារពាណិជ្ជកម្ម ។

ផ្អែកតាមតួលេខនេះ ក្រុមការងារបានផ្តល់ការលើកទឹកចិត្តជូនគម្រោងចំនួន១១៨គម្រោង សម្រាប់ឆមាសទី១ ឆ្នាំ ២០២៥ ក្នុងនោះ អគារជាប់គាំង ចំនួន៥១គម្រោង។ គម្រោងវិនិយោគថ្មីចំនួន៥៤គម្រោ​ង គម្រោងពង្រីកចំនួន៨គម្រោង និងគម្រោងមានស្រាប់ចំនួន ៥ គម្រោង។

កិច្ចប្រជុំនេះ ជាកិច្ចប្រជុំលើកទី ១៧ ដឹកនាំដោយបណ្ឌិតសភាចារ្យហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី រដ្ឋលេខា​ធិការក្រសួងសេដ្ឋកិច្ច និងហិរញ្ញវត្ថុ ដោយមានការចូលរួមពី ថ្នាក់ដឹកនាំ និង មន្ត្រីជំនាញរបស់ក្រសួងស្ថាប័ន។

លោកបណ្ឌិតសភាចារ្យ ហ៊ាន សាហ៊ីប មានប្រសាសន៍ថា កិច្ចការដែលក្រុមការងារ កំពុងអនុវត្តន៍នាពេលបច្ចុប្បន្ន គឺជាការចូលរួមចំណែកអភិវឌ្ឍប្រទេសជាតិ ជាមួយរាជរដ្ឋាភិបាល ក្នុងអភិក្រម “ជវភា​ពនៃប្រព័ន្ធតួអង្គតែមួយ” ដែលមានសហថាមពលព្រមគ្នា និង មានសង្គតិភាពជាមួយគ្នា ។

លោបណ្ឌិតសភាចារ្យបន្ថែមថា ស្របពេលដែលប្រទេសកំពុងជួបប្រទះបញ្ហាប្រឈមខាងក្រៅ ក្រុមការងារត្រូវបន្តកិច្ចខិតខំប្រឹងប្រែងទ្វេដង និង រួមគ្នាជាធ្លុងមួយ ក្នុងការបំពេញការងារតាមកាតព្វកិច្ចរៀងៗខ្លួន ក្នុងស្មារតីឧត្តមប្រយោជន៍ជាតិ ដើម្បីប្រែក្លាយ “បញ្ហាប្រឈម” ទៅជា “កាលានុវត្តភាព” តាមរយៈការផ្តល់កិច្ចសហការខ្ពស់ និង សម្របសម្រួល ផ្តល់សេវាដល់ម្ចាស់គម្រោង ដោយរលូន និងរហ័ស ដូចជា ការផ្តល់លិខិត អនុញ្ញាត អាជ្ញាបណ្ណ និងវិញ្ញាបនបត្រ ជាដើម ដើម្បីឱ្យម្ចាស់គម្រោង អាចដំណើរការគម្រោងបាន និងចូលរួមបង្កើតការងារជូនប្រជាពលរដ្ឋ។

រាជរដ្ឋាភិបាលបានដាក់ចេញ “កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ ២០២៤” ដែលបន្តអនុវត្តរហូតដល់ដំណាច់ឆ្នាំ ២០២៥ ក្នុងគោលបំណងជំរុញសម្ទុះសេដ្ឋកិច្ច និងបង្កើតការងារជូនប្រជាពលរដ្ឋ ព្រមទាំងកែប្រែមុខមាត់ខេត្តព្រះសីហនុ។

បច្ចុប្បន្ន ខេត្តព្រះសីហនុ មានសន្តិសុខ សណ្តាប់ធ្នាប់ និងបរិ  យាកាសវិនិយោគល្អប្រសើរ ដែលបានទាក់ទាញការវិនិយោគ និង ភ្ញៀវទេសចរ ក្នុងចំនួនច្រើននិងច្រើនជាតិសាសន៍ សមស្របជាមជ្ឈ​មណ្ឌលនៃការអភិវឌ្ឍពហុបំណង និង ជាប៉ូលសេដ្ឋកិច្ចដ៏សំខាន់របស់កម្ពុជា។

ជាមួយនេះ ក្រុមការងារជំរុញការវិនិយោគខេត្តព្រះសីហនុ បន្តលើកទឹកចិត្តឱ្យធុរជន និង វិនិយោគិន រួសរាន់អញ្ជើញដាក់ពាក្យ ឬ ស្នើមកក្រុមការងារជំរុញការវិនិយោគក្នុងខេត្តព្រះសីហនុ ដើម្បីទទួលបាន “អត្ថប្រយោជន៍ពិសេស” ទាំងការលើកទឹកចិត្តផ្នែកពន្ធ ការសម្របសម្រួលផ្នែករដ្ឋបាល និងការសម្រួលនីតិវិធីផ្សេងៗពាក់ព័ន្ធការវិនិយោគ នៅទីតាំងដែលមានអាសយដ្ឋាន នៅផ្លូវជាតិលេខ៤ ភូមិ៣ សង្កាត់លេខ១ ក្រុងព្រះសីហនុ ខេត្តព្រះសីហនុ ដែលមានលេខទំនាក់ទំនង៖ +៨៥៥ ១២ ៩០២ ២០០, +៨៥៥ ៨៩ ៧២៦ ០២៨ និង +៨៥៥ ១៦ ៣២១ ០១០ ឬ នៅអគារមជ្ឈមណ្ឌលអភិវឌ្ឍធុរកិច្ច ជាន់ទី ២១ សង្កាត់/ខណ្ឌជ្រោយចង្វារ រាជធានីភ្នំពេញ ដែលមានលេខទំនាក់ទំនង ៖ +៨៥៥ ៩៣ ៨៥៨ ៥៤៣ ៕

ដោយៈ និស្ស័យ

    ភ្នំពេញៈ តំបន់​សេដ្ឋកិច្ច​ពិសេស​(SEZ) ជាច្រើននៅកម្ពុជា បាននិងកំពុង​ដើរ​តួនាទីយ៉ាង​សំខាន់ ​ក្នុង​ការ​លើក​កម្ពស់ការ​នាំ​ចេញ​ទំនិញកម្ពុជា​ទៅ​ទីផ្សារ​អន្តរជាតិ។

ក្នុង​រយៈ​ពេល៣ឆ្នាំ​ចុង​ក្រោយ​នេះ ចំនួន​​​ទឹក​ប្រាក់​​នាំ​ចេញ​ទំនិញរបស់SEZទាំង​អស់ ​នៅ​កម្ពុជា​មាន​ចំណែក​ប្រហែល​​១/៤​នៃ​ការ​នាំ​ចេញ​សរុប​របស់​កម្ពុជា​ទៅ​កាន់​ទីផ្សារអន្តរជាតិ​។

នៅ​ក្នុង​​​​​សិក្ខាសាលាស្តីពី “ការជំរុញការវិនិយោគបៃតងក្នុងតំបន់សេដ្ឋកិច្ចពិសេសនៅកម្ពុជា” ប្រព្រឹត្តិ​ទៅ​​​កាល​ពីសប្តាហ៍មុន លោក សរ សិនិរ៉ា អគ្គលេខាធិការរងគណៈកម្មាធិការវិនិយោគកម្ពុជា​នៃ​ក្រុមប្រឹក្សាអភិវឌ្ឍន៍កម្ពុជា​(CDC) បាន​លើក​ឡើង​ថា សិក្ខាសាលា​នេះ​ធ្វើ​ឡើង​ក្នុងគោលបំណងបង្ហាញពីគោលគំនិតនៃក្របខណ្ឌសួនឧស្សាហកម្មបៃតង​(Eco-Industrial Park – EIP) ទៅ​ដល់​អ្នក​ចូល​រួម ហើយ​ក៏​មាន​កិច្ច​ពិភាក្សាអំពីគោលនយោ​បាយ និងបទប្បញ្ញត្តិអាទិភាព​មួយ​ចំនួន ​ដែល​​ជំរុញការវិនិយោគបៃតង នៅក្នុងតំបន់សេដ្ឋកិច្ចពិសេសកម្ពុជា។

លោក​បន្ត​ថា “តំបន់​សេដ្ឋកិច្ច​ពិសេស​ កំពុង​ដើរ​តួនាទីយ៉ាង​សំខាន់​​ក្នុងការអភិវឌ្ឍសេដ្ឋកិច្ចកម្ពុជា ​តាម​រយៈ​ការ​ទាក់​ទាញ​ការវិនិ​យោគផ្ទាល់ពីបរទេស ឱ្យ​ចូល​មក​បណ្តាក់​ទុន​ផ្ទាល់​កាន់តែ​ច្រើន ព្រម​ទាំង​បាន​ជួយ​លើក​កម្ពស់ ​ការ​នាំ​ចេញ​ទំនិញ​កម្ពុជា​ទៅ​ទីផ្សារ​អន្តរ​ជាតិ​ផងដែរ”។

លោកបានឲ្យដឹងទៀត​ថា កម្ពុជា​ គឺ​ជា​ប្រទេស​ដែល​មាន​សក្តានុពល​ខ្លាំង ​សម្រាប់​ការ​បណ្តាក់​ទុន​លើ​គ្រប់​វិស័យ ជាក់​ស្តែង​ច្បាប់ក​ម្ពុជា គឺ​មាន​ភាព​អំណោយ​ផល និង​អនុគ្រោះ​ច្រើន​ដល់​វិនិយោគិន​ បន្ថែម​លើ​នេះ​កម្ពុជា​ក៏​មាន​​អនុក្រឹត្យស្តីពី ការអនុវត្តច្បាប់ដែលជំរុញ និងលើកទឹកចិត្តការវិនិយោគបៃតង ដែលរួមមានការវិនិយោគក្នុងវិស័យថាមពលបៃតង, បច្ចេកវិទ្យា ដែលរួមចំណែកដល់ការបន្សុំា និងការកាត់បន្ថយការប្រែប្រួលអាកាសធាតុ ការគ្រប់គ្រង ការការពារបរិស្ថាន និងការអភិរក្សជីវៈចម្រុះ និងសេដ្ឋកិច្ចចក្រា ជាដើម។

លោក សរ សិនិរ៉ា​បានបញ្ជាក់ថា “​តំបន់សេដ្ឋកិច្ចពិសេសកម្ពុជា ដើរតួនាទីយ៉ាងសំខាន់ ក្នុងការអភិវឌ្ឍសេដ្ឋកិច្ចកម្ពុជា ដោយទាក់ទាញការវិនិយោគផ្ទាល់ពីបរទេស ជំរុញកំណើនឧស្សាហកម្ម និងការធ្វើពិពិធកម្មសេដ្ឋកិច្ច បង្កើតការងារ និងរួមបញ្ចូលកម្ពុជាទៅក្នុងខ្សែច្រវាក់តម្លៃសកល”។​

លោកក៏​បាន​បង្ហាញសុទិដ្ឋិនិយមថា នឹង​មាន​ការរួមសហការពីគ្រប់តួអង្គពាក់ព័ន្ធទាំងអស់ ដើម្បី​ធ្វើឱ្យតំបន់សេដ្ឋកិច្ចពិសេស​កម្ពុជា អាច​សម្រេចបានសក្តានុពលពេញលេញ ដែល​ជា​ធាតុ​ផ្សំ​ក្នុង​ការ​ជំរុញនៃកំណើនប្រកបដោយចីរភាព បៃតង និងបរិយាបន្ន៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនៅព្រឹកថ្ងៃពុធនេះ ក្រោយពេលតម្លៃមាសប្រភេទ Spot Gold បានជួញដូរក្នុងទំហំទឹកប្រាក់ចំនួន៣៣២៣,៧៥ដុល្លារអាមេរិកក្នុងមួយអោនគិតត្រឹមពេលបិទការជួញដូរកាលពីថ្ងៃអង្គារម្សិលមិញ។

តួយ៉ាង តម្លៃមាស Spot Gold បានងើបឡើង០,២១ភាគរយដល់ត្រឹម៣៣៣០,៧៥ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,៣៦ភាគរយដល់៣៣៤៥,៩០ដុល្លារក្នុងមួយអោនគិតត្រឹមម៉ោង១០:២៦នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៨១,៤ភាគរយ ដែលធនាគារកណ្តាលអាមេរិក (Fed) នឹងរក្សាទុកអត្រាការប្រាក់ឱ្យនៅថេរដដែលក្នុងកិច្ចប្រជុំគោលនយោបាយនៅថ្ងៃទី៣០ ខែកក្កដាខាងមុខ។

ចំណែក សន្ទស្សន៍ប្រាក់ដុល្លារ ដែលវាស់វែងប្រាក់ដុល្លារអាមេរិកធៀបនឹងរូបិយបណ្ណសំខាន់ៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់៩៧,៩១ពិន្ទុនៅព្រឹកថ្ងៃពុធនេះ បន្ទាប់ពីបានបិទការជួញដូរត្រឹម៩៧,៨៦ពិន្ទុកាលពីថ្ងៃអង្គារម្សិលមិញ៕